А.Ариунзаяа "Хүүхдийн төлөө сан"-гийн хөрөнгийг эрж, Л.Энх-Амгалан хэдэрлэв

Гэр бүл, хөдөлмөр, нийгмийн хамгааллын сайд Л.Энх-Амгалан, УИХ-ын гишүүн А.Ариунзаяа нар "Хүүхдийн төлөө сан"-гийн хөрөнгөний асуудлаар мэтгэлцэв.

УИХ-ын гишүүн А.Ариунзаяа, "Хүүхдийн төлөө сан"-гийн 22 тэрбум төгрөгөөс найман тэрбумыг юунд зарцуулсан бэ. Үлдсэн 14 тэрбум яагаад хүү бодогдохгүй хадгалаад байгаа юм бэ. Ядаж ангиудад утаа шүүгч авах мэтээр хөрөнгө оруулалт хийж болдоггүй юм уу. Ашиглахгүй бол энэ сан татан буугдах тал руугаа явах гээд байна уу" хэмээжээ.

Харинд нь Гэр бүл, хөдөлмөр, нийгмийн хамгааллын сайд Л.Энх-Амгалан "Та төрийн ой санамжтай байх ёстой шүү. Өөрөө ямар сан байгуулж, ямар журам батлуулчихаад явсан гэдгээ санах хэрэгтэй. Ямар ч юм хийх боломжгүй чөдөр, тушааболсон журамтай, юу ч шийдэж чаддаггүй байсан шүү дээ. Энэ журмууд сая л өөрчлөгдөж Засгийн газраар батлагдаж байна" гэх хариу тайлбар хийв.

Засгийн газрын 172 дугаар тогтоолоор 2021 онд Хүүхдийн төлөө сан байгуулагдсан бөгөөд 2024 оны аравдугаар сарын байдлаар нийт 19 тэрбум төгрөг төвлөрснөөс 217 хүүхдэд 490.9 сая төгрөгийг шагнал урамшуулал болгон олгоод байгаа аж.

Гэр бүл хөдөлмөр нийгмийн хамгааллын яамнаас өгч буй мэдээллээр Авто тээврийн хэрэгслийн улсын дугаар борлуулсны орлогоос 16.9 тэрбум, Хүүхдийн фонд төрийн бус байгууллагаас буюу соёл урлаг спортын тоглолтын орлогоос 2.1 тэрбум, байгууллага иргэдээс ирүүлсэн хандиваар 17.2 сая төгрөг нийт 19 тэрбум төгрөг цугларчээ.

Уг санд төвлөрсөн мөнгийг журамд заасны дагуу олон улсын тив, дэлхийн соёл, урлаг, спортын уралдаан тэмцээнд амжилттай оролцож, болзол шалгуур хангасан 217 хүүхдэд шагнал урамшуулал болгон 490.9 сая төгрөг зарцуулжээ.

У.УЯН

Энэ мэдээнд өгөх таны үнэлгээ

Хуваалцаарай Жиргээрэй