Н.Лхагвасайхан дарга аа, Сүхбаатар аймгийн цагдаа нар нэгийгээ буудаж, амь насанд нь хүрсэн гэх хэрэгт тайлбар өгнө үү

–ГАЛ АЛДСАН ГЭХ АХЛАХ ДЭСЛЭГЧИЙГ ЦАГДАН ХОРЬЖЭЭ-

Сүхбаатар аймгийн цагдаагийн байгууллагын жолооч сумны хүнд шархтай эмчллүүлж байгаад, өчигдөр /2020.03.02/Цэргийн төв эмнэлэгт нас барсан харамсалтай тохиолдол гарлаа. Тэрбээр цагдаагийн байгууллагад 19 жил ажилласан, ахлах ахлагч цолтой нэгэн байжээ.  

Хэргийг сануулбал, 2020.02.22-ны өглөөний 08:40 цагт “Цагдаа бусдад буудуулсан байна” гэсэн дуудлага тус аймгийн Нэгдсэн эмнэлгийн Яаралтай түргэн тусламжийн газарт иржээ. Ингээд тус аймгийн Цагдаагийн газарт ажилладаг 46 настай Б нь хэвлийн хөндий, цээжин хэсэгтээ буудуулсан байдалтай эмнэлэгт хүргэгдсэн байна. Тухайн үед өвчтөний биеийн байдал хүнд байсан тул Цэргийн төв эмнэлэгт шилжүүлэн эмчилж байсан аж.

Сүхбаатар аймгийн Цагдаагийн газрын дарга Н.Лхагвасайхан энэ талаар “Хэргийг шалгаж буй тул мэдээлэл өгөх боломжгүй” гэж мэдэгдээд байгаа юм. Эх сурвалжуудын зүгээс “Ээлжийн ахлах дэслэгч жолооч цагдаагаа буудсан. Одоогоор буудсан гэх ахлах дэслэгчийг цагдан хорьж шалгаж байгаа. Албан үүргээ гүйцэтгэх үедээ буу хэрэгслээр бусдын аминд хүрсэн гэх зүйл ангиар шалгагдана” гэх мэдээлэл өгөв.

Зарим хэвлэлүүдэд уг хэргийг “Санамсаргүй буу алдсан” гэж мэдээлсэн ч эх сурвалжууд ингэж үгүйсгэж байгаа нь анхаарлал татав.

–ЭЭЛЖИЙН АЖИЛТНУУД ХООРОНДОО МАРГАЛДСАНЫ УЛМААС ГАЛТ ЗЭВСЭГ АШИГЛАСАН УУ-

Одоогоор сум алдсан гэх хэргийг шалгаж буй бөгөөд олон нийтийн дунд “Цагдаагийн ажилтнууд маргалдаж нэгнийгээ буудсан, тухайн үед жижүүрийн өрөөнд таван алба хаагч байсан дүрс камерт бичигдсэн” гэх хардлагууд явж байна.

Бидэнд олдсон мэдээллээр, гал алдсан гэгдээд байгаа буу нь цагдаагийн албан журмаар ашигладаг гар буу байжээ. Талийгч сумны нэг шархтайгаар эмчлүүлж байсан бөгөөд хэргийг гал алдсан болгож зориуд нуун дарагдуулж байна гэх хардлага явсаар байна. Сүхбаатар аймгийн Цагдаагийн байгууллагаас гаргасан эмгэнэлдээ “…албан үүргээ гүйцэтгэж яваад харамсалтайгаар амиа алдлаа” гэж тодотгожээ.

Өмнө нь,  2019.05.19-нд Сүхбаатар аймаг дахь цагдаагийн газар, Түмэнцогт сум дахь хэсгийн төлөөлөгч, цагдаагийн дэслэгч Түвшинжаргалын Жаргалсайхан нь ажил үүргээ гүйцэтгэж яваар зуурдаар нас барсан. Түүнийг машиндаа угаартаж нас барсан гэх мэдээлэл түгэж  байв.  

Ийм байдлаар Сүхбаатар аймагт хагас жилийн дотор хоёр цагдаа нас бараад байна. Сонирхолтой нь, ийм төрлийн харамсалтай тохиолдлууд гарах бүрд Сүхбаатар аймгийн Цагдаагийн газрын дарга Н.Лхагвасайхан эвтэйхэн “амиа аргалж”, ямар ч харицлага хүлээхгүй өнгөрдөг нь хачирхалтай. Албан үүргээ гүйцэтгэж явсан, ажлын байран дээрээ нас барсан цагдаагийн үхлүүд Н.Лхагвасайхан даргад огт хамаагүй хэрэг үү. Энэ асуудлаараа тэр тайлбар хийх ёстой билээ, яагаад таныг удирдах үед Сүхбаатарт цагдаа нар амиа алдах болов.

Г.ИТГЭЛ

Энэ мэдээнд таны өгөх үнэлгээ

Хуваалцах Жиргэх