Хангийн боомтоор нүүрс ЭКСПОРТОЛЖ эхэллээ
“COVID-19” халдварт өвчнөөс урьдчилан сэргийлэх хүрээнд манай улс нүүрсний экспортоо зогсоогоод хоёр сарын нүүрийг үзээд байв. Улмаар энэ сарын 23-нд Гашуунсухайт боомтыг нээж нүүрсний экспортыг эхлүүлсэн билээ.
Харин өчигдөр /2020.03.30/ Өмнөговь аймгийн Гурвантэс сумын нутаг дахь Шивээхүрэн боомтоор нүүрс экспортолж эхэлсэн бол өнөөдөр Хангийн боомтоор нүүрс экспортолж эхэлжээ.
Ингэснээр Монгол Улсын нүүрсний экспорт Замын-Үүд, Гашуунсухайт, Шивээхүрэн, Ханги гэсэн дөрвөн боомтоор хийгдэж байна.
Нүүрс тээвэрлэлтийг дахин эхлүүлэхтэй холбоотойгоор Засгийн газраас өгсөн чиглэлийн дагуу Монгол Улсын Шадар сайд Ө.Энхтүвшин тэргүүтэй ажлын хэсэг хилийн боомтуудын бэлтгэл ажилтай газар дээр нь танилцаж, үүрэг чиглэл өгч ажилласан.
Ингэхдээ нэн тэргүүнд мэргэжлийн байгууллагуудын заавар зөвлөмжийн дагуу тээврийн хэрэгсэлд ариутгал, халдваргүйжүүлэлтийг хийж, мөн жолооч, зохицуулагч операторууд халдвар хамгааллын хувцас хэрэгсэлтэй, тусгай журмын дагуу тээвэрлэлтийг гүйцэтгэнэ гэдэг шаардлагыг тавьсан ажээ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.