Ерөнхийлөгчийн "Миний үед утаагүй болсон" гэх мессеж

Нүүрсний сонсголын өмнө нэг Ерөнхийлөгч ингэж загнасан сан. "Ажлаа хийцгээ" гэж зандраад л. Тухайн үед нийгмийн сүлжээний зарим хэсэг "Зөв үг хэллээ, энэ нь дээр" хэмээн хүлээж авсан. Харин арай хэрсүү хэсэг нь Үндсэн хуулиар Ерөнхийлөгчийн институт УИХ, Засгийн газарт ямар асуудлын хүрээнд чиглэл өгөх эрхтэй билээ? гэж асуугаад хоцорч байв.

Энэ өвөл Улаанбаатарын утаа, агаарын бохирдол хэр хэмжээнээс хэтэрч, гамшгийн түвшинд оччихлоо. Өөр зуураа ярьснаас өөрөөр үүнийг ядаж УИХ-ын чуулганы хуралдаанд нухацтайхан сөхөж тавьсан хүн олдохгүй байв. Ч.Ганжавхлан жагсаал гэж уриалсны эцэст ямартай ч УИХ дээр Утааны сонсгол явуулах нөхцөл бүрдэж, гарын үсэг цуглав.

Гэхдээ арай л дөжирсөн мэт, агаарын бохирдлыг хэн ч дорвитой сөхөж тавихгүй, дахиад зээлээр зуух тараана гэхчлэн зүйлсийг Хотын орлогч нь ярьж явлаа.

Харин өчигдөр Ерөнхийлөгч У.Хүрэлсүх ЗГ-ын гишүүдийг дуудаж уулзлаа, агаарын бохирдлын асуудлаар үүрэг чиглэл өглөө. Энэ тухай мэдээлэл анх түгэхэд л "Дахиад загнасан даа, загнасан бичлэг нь удахгүй цацагдана даа" гэж хоржоонтой хүлээцгээсэн нь ёсоор ч болов.

Тэр ерөнхийдөө битгий назгайр, найрааны Засгийн газар болов, амгай хазаараа бүтэн дээр нь тат гэхчлэн хэллээ. Хамгийн гол мессежээ харин "Гурван жилийн өмнө зүгээр байсан. Бид амжилтад хүрсэн, утаагүй болсон. Яагаад гаргасан амжилтаасаа ухарч байна. Ажлын уялдаа холбоо яагаад алдагдав?" гэж зангидав.

Сайжруулсан шахмал түлшний автор бол Ерөнхийлөгч У.Хүрэлсүх. Тэр Ерөнхий сайд байхдаа үүнийг гардаж хийсэн. Агаарын бохирдол тухайн үед нүдээр үзэгдэх, хэмжиж бараалахад ч багассан нь бас үнэн. У.Хүрэлсүхийн үед шахмал түлшний чийглэг 4 хувьтай байв. Одоо 15 гараад явчихсан. Чийглэг их байх тусам уугьж, утаа гардаг. Энэ үзүүлэлтийн зөрүүг ч Ерөнхийлөгч дурдаад авна лээ.

Өөрөөр хэлбэл түлшний үйлдвэрлэлийн процесс, барьцуулдагчийн тендер алдагдаж назгайрсан нь нэг талдаа үнэн. У.Хүрэлсүхийн Засгийн газрын үед татаас өгч босгож авсан "Тавантолгой түлш" ХХК одоо өөрөө санхүүгийн загварын хувьд уналтад орчхоод байгаа. Нэг ч удаа ашигтай ажиллаагүй, бөөн алдагдал. Түүнийгээ мэдэхгүй замбараагүй захиран зарцуулалттай. Татаж босгоход амаргүй ийм компанийг сүүлдээ Засгийн газар Нийслэлийн мэдэлд бушуу хариуцуулж санаа амраад байгаа.

Ер нь бол одоо эргээд сайжруулсан шахмал түлш гэдэг шийдэл өөрөө төвөг болчихсон. Түлшээ дахиад солих уу. Эсвэл гэр хорооллын айлуудыг бүр сэргээгдэх эрчим хүчээр халаах уу гэдэг цоо шинэ, хурдтай, сэтгэл зүрхтэй алхмын өмнө ирлээ.

Харин Утааны сонсгол болох нь, түүгээр шахмал түлшний түүх эхнээсээ өнөөг хүртэл сөхөгдөх нь гэдгийг тооцсоны хувьд Ерөнхийлөгч тэгж дуугарав. Өөрөөр хэлбэл "Миний үед лав зүгээр байсан шүү. Цааш нь л олигтой авч явсангүй шүү" гэдэг мессежийг Засгийн газарт болон иргэдэд дам утгаар өгчихөж байгаа юм.

Энэ У.Хүрэлсүхийн хувьд яг л 2025 оны улсын төсөвт хориг тавьсан шиг нь мэдрэмжтэй улс төрийн алхам.

Гэхдээ Үндсэн хуулиа нэг саная. Түүнд гүйцэтгэх засаглалд шууд чиглэл өгөх эрх байхгүй. Харин асуудлыг ҮАБЗ-өөр хэлэлцүүлэх, УОК-ын түвшинд ярих боломж байгаа. Түүнийгээ ч хийв.

Харин сонсголоор юу яригдах нь л анхаарал татаж үлдлээ. Улсын Ерөнхийлөгч хамгаалагдах үлдэх нь үү. Ерөнхий аудитор Д.Загджав лав байнгын хорооны хуралдаанд "У.Хүрэлсүх Ерөнхий сайд байхдаа гэмт хэрэг үйлдсэн" гэх ухааны мэдэгдэл хийж, жаал "сандаргасан" нь саяхан.

Юутай ч төрийн тэргүүн өнөөдрийн утаанд буруугүй гэж л хэлэхийг хүсжээ.

Г.САНСАРМАА

Өөрийн сэтгэгдлээ илэрхийл

Share Tweet