Орос дахь Монголын элчингийн ажлыг С.Амарсайхан хийдэг болов

Өчигдөр МУЭИС-ийг түшиглэн “Орос улстай хамтран ажиллах санаачилгын Монгол төв” гэх нэртэй газрын нээлт болов. Уг төвийн зорилго нь Монгол, Оросын хооронд дипломат болон эдийн засаг, соёл, хүмүүнлэгийн харилцааг хөгжүүлж орчин үеийн Орос орныг судлах, цаашлаад эрдэм шинжилгээ, судалгааны баазыг өргөжүүлж, сайжруулна гэсэн урт тайлбартай. Нээлт дээр нь Оросын тодотголтой сэдэв Монголд хаана л болно тэнд явж байдаг Шадар сайд С.Амарсайхан мөн л очиж, хоёр орны найрсаг харилцааны талаарх хуучинсаг үгсээр мэндчилгээ дэвшүүлсэн.

Наймдугаар сард ОХУ-ын Байгалийн нөөц, экологийн сайд А.А.Козлов  тэргүүтэй албан төлөөлөгчид манай улсад ирэх үеэр хэд хэдэн асуудал хөндсөний нэг нь Евроазийн эдийн засгийн холбоонд Монголын талаас чөлөөт худалдааны түр хэлэлцээг энэ ондоо багтаан хийхэд ихээхэн ач холбогдол өгч байна хэмээх байр суурийг Шадар сайд С.Амарсайхан илэрхийлсэн байдаг.

Мөн есдүгээр сард МҮХАҮТ-д “Made in Russia” нэртэй бизнес форумыг зохион байгуулахад Шадар сайд С.Амарсайхан хэлсэн үгэндээ хоёр улсын хооронд төлбөр тооцоо хийхэд хүндрэлтэй байаа тул Оросын банк Монголд салбараа нээх үү, шинэ төлбөр тооцооны систем нутагшуулах уу гэж хэлснээсээ хэдхэн хоногийн дараа “Монголд Оросын банк байгуулахгүй” хэмээн өөрийнхөө үгийг няцаасан.

Эл хурал дээр “Манай улс Европын холбоо, Японтой Чөлөөт худалдааны гэрээтэй. Одоо Евроазийн эдийн засгийн холбоо, БНСУ-тай мөн Чөлөөт худалдааны гэрээ байгуулахаар Эдийн засгийн хөгжлийн яам ажиллаж байна. Евразийн эдийн засгийн холбоотой байгуулах гэрээ нь импортын татваргүйгээр, тоо хэмжээний хязгааргүйгээр, таван бүлгийн барааг монголоос экспортлох боломжийг олгоно” хэмээн яг үнэндээ уг холбоонд элссэнээр 375 нэр төрлийн ямар бараа бүтээгдэхүүн экспортлох, буцаагаад манайд ямар бараа бүтээгдэхүүн гаалийн тарифгүй, татваргүй орж ирэх талаар нарийн мэдээлэл өгөөгүй. Эндээс гадагшаа бид бараа, бүтээгдэхүүн экспортлох юм байна гэсэн өөдрөг зураглал л дотоодын үйлдвэрлэгчдэд бий болсон.

Бүхэл бүтэн форумаас зөвхөн монголд ашигтай нөхцөл үүсэх нь гэдэг ойлголтыг л үндэсний үйлдвэрлэгчдэд өгсөн учраас өнөөдөр илүү мэдээлэлтэй болсныхоо МҮХАҮТ-ын дэргэдэх холбоод болон аж ахуй нэгжүүд дургүй хүлээж авч, уг хэлэлцээг шүүмжилж, улмаар эрсдэл, асуудлыг нь хөвөрдөж байна шүү дээ.

Ингээд асуудал өндрийг аваад ирмэгц нь мөн л өчигдөр Засгийн газрын хуралдаанаар хэлэлцэж, чөлөөт худалдааны түр хэлэлцээг цуцлалгүй хойшлуулаад аж ахуй нэгж, үйлдвэрлэгчидтэй хэлэлцэж саналыг нь тусгасныхаа дараа үргэлжлүүлнэ гэж С.Амарсайхан хэлсэн. Ажлын хэсгүүд мэдээллээ дутуу солилцсон гэх тодорхойлолт өлгөөд орхино лээ.

Яагаад ОХУ-тай холбоотой төсөл, эдийн засгийн хэлэлцээ, тэр ч бүү хэл Орос, Монголын төв барих асуудал дээр хүртэл Шадар сайд нь яваад байгаа нь гайхмаар. Оросын бодлогыг Монголд таниулах, хүргэх, холбох тэр бүх үүрэг роль нь Монголоос ОХУ-д суугаа Монгол Улсын Элчин сайд болоод ОХУ-аас Монголд суугаа элчин сайд нар баймаар. Өөр өөрийн чиг үүрэг, статустай.

Өнөөдөр МАН-ын тодотголтой нэр бүхий гишүүд геополитикийн асуудалтай Орос улстай яагаад ингэж гүнзгий харилцаа тогтоох болов. Яагаад улс төрчид ганцхан улс дээр ийм илт давуу анхаарал хандуулаад байна вэ гэдэг дээр бодох л асуудал.

Оростой холбоотой олон талт ажлыг гардаж яваа С.Амарсайханыг ОХУ-руу Элчин сайдаар нь томилбол яасан юм бэ.

Т.БАТСҮРЭН

Энэ мэдээнд өгөх таны үнэлгээ

Хуваалцаарай Жиргээрэй