Дулааны III цахилгаан станцыг ОХУ-аар өргөтгүүлэх тохироог анх У.Хүрэлсүх хийсэн

Эдийн засгийн байнгын хорооны өчигдрийн /2024.12.24/ хуралдаанаар “Монгол Улсын Улаанбаатар хотын Дулааны гуравдугаар цахилгаан станцын өргөтгөл, шинэчлэлийн төслийн зураг төсөл боловсруулах тухай Монгол Улсын Засгийн газар, Оросын Холбооны Улсын Засгийн газар хоорондын хэлэлцээр”-ийг соёрхон батлах тухай хуулийн төслийг хэлэлцэж, гишүүдийн 70 хувийн саналаар дэмжиж хуулийн төслийг Аюулгүй байдал, гадаад бодлогын байнгын хороонд хүргүүлсэн.

Харин өнөөдөр Төсвийн байнгын хороо /2024.12.25/ дээрх хуулийн төслийн хэлэлцэх юм.

Уг төслийг байнгын хороо хэлэлцэх үеэр гишүүд хэд хэдэн жинтэй асуулт асуусан ч Б.Чойжилсүрэн сайд ерөнхийдөө бөглүү, тойруу хариулт хэлсэн.

Гишүүд “угаасаа буулгаад барих барилгыг яагаад заавал оросоор бариулах гээд байгаа юм. ОХУ-ын тоног төхөөрөмж яг сүүлийн үеийн шийдэл байж чадах уу. Станцыг өргөтгөх ажилд ОХУ-аас хэт өндөр дүнтэй зээл авч байгаа юм биш үү. Нэгэн өндөр дүнтэй зээл авч байгаа бол манай талд ашигтай байхаар Эгийн голын УЦС-ын төсөл зэргээ хавчуулчхаж болоогүй юу. ОХУ манай улсын дээрэлхэж байгаа юм шиг цаанаас нь компанийг нь сонголтгүйгээр тулгаад өндөр дүнтэй төсөл оруулж ирж байна. Станц бидэнд хэрэгтэй хэдий ч бид заавал аманд нь ороод байх шаардлага байгаа юу зэрэг асуултыг асуусан.

Хариуд нь Эрчим хүчний сайд Б.Чойжилсүрэн “ОХУ-аас заавал энийг хэрэгжүүлнэ гэж тулгасан зүйл байхгүй. Манайх өөрөө ОХУ-д хүсэлт тавьсан юм байна лээ. Бидний байгаа царай энэ. Төсөв дээр хуримтлалтай байсан бол хүнээс мөнгө гуйлгүй өөрсдийн мөнгөөр барих байсан. Гэтэл мөнгө байхгүй. Хуримтлал байхгүй. Гэтэл хэрэглээ маань өсөөд байгаа учир ийм байдалд орчихсон. ОХУ-аас өндөр дүн санал болгосон ч бид тус дүнгээр станц өргөтгөж чадахгүй гээд татгалзсан байдалтай байгаа. Үнэ ханш дээрээ тохирч чадахгүй бол төсөл цааш явахгүй” гэсэн юм.

Ингэхдээ яагаад ОХУ-аас өөр улс байж болохгүй болон шууд барих компанийг нь тулгаж байгаа асуудалд тодорхой хариулаагүй. Мөн тэр нэг хариулахдаа Монгол Улсын Засгийн газар ОХУ-д санал тавьсан гээд. Дахин ярихдаа ОХУ манайд санал тавьсан гээд байв.

Эднээс тодорхой болсон нэг зүйл нь 2019 онд Монгол Улсын Ерөнхий сайд У.Хүрэлсүх ОХУ-д айлчлах үеэр ОХУ-ын Ерөнхийлөгч В.Путин "ТЭЦ-3-ыг манай технологиор барьсан. Өргөтгөн шинэчлэх ажлын төслийг ОХУ-ын компаниуд дунд зарлаач" гэх санал тавьсан талаар өчигдрийн хурлын үеэр тодорхой дурдаад өнгөрөв.

Мөн уг төслийг хэрэгжүүлэх мөнгөн дүн өндөр байгаа талаар шүүмж гарч буй. Төслийг 1 тэрбум 326 сая еврогоор барих саналыг ОХУ-аас ирүүлсэн. Харин манай улс 814 сая доллароос илүү өртгөөр бариулж чадахгүй гэсэн байр суурьтай байгаа. Тиймээс өргөтгөлийн ажлын зураг төсвөө хийчхээд үнэ тохирохоор болсон бөгөөд хэрэв үнэ тохирохгүй бол төсөл хэрэгжихгүй гэж Эрчим хүчний сайд Б.Чойжилсүрэн байнгын хорооны хуралдаанаар хэлсэн.

Гэхдээ дээрх соёрхон батлах тухай хуулийн төслийг Эдийн засгийн байнгын хороо дэмжсэн. Өнөөдөр Төсвийн байнгын хороогоор маргааш УИХ-ын чуулганаар оруулж дэмжих эсэхийг хэлэлцэнэ.

Хэрэв төсөл батлагдвал хэлэлцээрт төслийн үнийг яаж зааснаас хамаарч тухайн дүнгээр төслийг хэрэгжүүлэх юм. Харин дээрх төслийн танилцуулга дээр Дулааны гуравдугаар цахилгаан станцын өргөтгөлийн үнийг 1.5 сая евро хэмээн зааж, оруулж ирээд байгаа билээ.  

Д.ЖАРГАЛМАА

Энэ мэдээнд өгөх таны үнэлгээ

Хуваалцаарай Жиргээрэй