Баярлалаа, баяртай МАСК

Тэд анх 2006 онд Туул голын эрэг дээр "Алтан Маск" нэрээ олж өдийг хүртэл 20 жил үйл ажиллагаагаа явуулахдаа Монголын хошин урлагийн өнгийг тодорхойлж байв. "Маск" продакшныг хошин урлагийн “Өнгөт инээд” хамтлагаас өрх тусгаарлаж жүжигчин П.Эрдэнэзаан, Ж.Мөнхсайхан, М.Баярмагнай нар үүсгэн байгуулж, хожим тэд "Маскийн гурван ах" хэмээн дуудуулж гурвуул МУГЖ цолоор энгэрээ мялаасан.

Энэ жил 20 жилийн ойн баяр дээрээ "Сүүлчийн шилийн сайн эрс" дэлгэцийн уран бүтээлээрээ бэлэг барьсан "Маск" продакшн үйл ажиллагаагаа зогсоож, албан ёсоор тарахаар болжээ. Энэ тухай хамтлагийн ахлагч П.Эрдэнэзаан "Алтан Маск" нэвтрүүлэгт орох үеэрээ зарлалаа. "Маск"-ийг "дотоод зөрчлөөс болж тарж байгаа", "Алтан маск" нэвтрүүлэгт М.Баярмагнай, Ж.Мөнхсайхан нар оролцоогүй нь үүнтэй холбоотой" гэх мэдээлэл нийгмийн сүлжээгээр яригдах болов. Тэгвэл "Алтан Маск" нэвтрүүлгийн дараагийн хоёр анги М.Баярмагнай, Ж.Мөнхсайхан нарын тухай байх аж.

Тэд өнгөрсөн 20 жилийн хугацаанд "Масктай Монгол” “Их хотын жиргээ”, “Инээхэд зиндаа хэрэггүй”, "Mask Show” гэх мэт тоглолтуудыг тайзнаа тавьж, үзэгчдийн хүртээл болгожээ. “Маск” продакшн тайзны бүтээлүүдээс гадна кино урлагийн салбарт хэд хэдэн томоохон дэлгэцийн бүтээлүүдийг хийсэн. Тухайлбал, “Баярлалаа, Ааваа” “Би гишүүн баймааргүй байна”, "Хайр, харуусал", “No Wifi Zone”, “Соёлын довтолгоо” зэрэг үзэгчдийн сэтгэлд хүрсэн бүрэн хэмжээний олон кино бүтээжээ.

Монголын орчин цагийн хошин урлагийг өнгөлж буй 20 жилийн түүхтэй "Маск"-ийг ахин бүрэн бүрэлдэхүүнээрээ тайз, кино урлагт харахгүй нь үзэгчдэд харамсалтай. Харин хамтлагийн ахлагч П.Эрдэнэзаан "Бид жүжиг хийх тухай олон ярьсан. Чадсангүй өнөөдрийг хүрлээ, гэхдээ эргэн цуглаж сүүлчийн жүжгээ хийнэ" хэмээн нэвтрүүлгийн үеэр хэлэв. "МҮЭСТО"-г тоглолт бүрдээ дүүрэн үзэгчтэй байлгаж чадсан "МАСК"-д бид "баярлалаа, баяртай" гэж хэлэх болжээ.

Б.САНАА

Өөрийн сэтгэгдлээ илэрхийл

Share Tweet