УЛС ТӨР

Хууль: Шинэ Ерөнхийлөгч тангараг өргөх хүртэл С.Бямбацогт бүрэн эрхийг нь хэрэгжүүлнэ. Сонгууль дөрвөн сарын дараа болно

Ерөнхийлөгч У.Хүрэлсүх өнөөдөр үүрэгт ажлаа өгч, хууль хяналтын байгууллагад шалгуулж, нэр төрөө сэргээлгэхээ мэдэгдлээ. Түүний бүрэн эрхийн хугацаа энэ зургаан сард дуусах байв. Тэгвэл үлдсэн долоон сарын хугацаанд түүний бүрэн эрхийг хэн хэрэгжүүлэх вэ гэдэг асуулт ургана.

Хуульд, шинэ Ерөнхийлөгч сонгогдож, тангараг өргөх хүртэл УИХ-ын дарга бүрэн эрхийг нь хэрэгжүүлдэг байна. Процессын хувьд,

Өргөдөл. Ерөнхийлөгч ажлаас чөлөөлөгдөх хүсэлтээ Улсын Иx Хуралд өргөдлөөр гаргана. Хуулийн нөхцөл нь өргөдлийг Улсын Их Хурал "ёсоор болгосон" байх (Ерөнхийлөгчийн тухай хуулийн 6.3.1). Тиймээс Улсын Их Хурал саналаа хураана. Онолын хувьд хүсэлтийг дэмжихгүй байх боломж ч бий. [ӨНДӨР ИТГЭЛ]

Байнгын хороо. "Ерөнхийлөгчийн асуудал" Төрийн байгуулалтын байнгын хорооны эрхлэх хүрээнд багтдаг (Улсын Их Хурлын тухай хуулийн 23.8.2, 2024 оны шинэчилсэн найруулга).

Дэг батлах. Дэгийн хуульд тухайн асуудлыг хэлэлцэх журам заагаагүй бол Төрийн байгуулалтын байнгын хороо дэгийг хэлэлцээд, саналаа нэгдсэн хуралдаанд оруулна. Нэгдсэн хуралдаан түүнийг хуралдаанд оролцсон гишүүдийн олонхын саналаар батална. Батлагдсан дэг зөвхөн тухайн асуудалд үйлчилнэ (дэгийн хуулийн 5.1–5.3).

Байнгын хорооны хуралдаан. Байнгын хороо өргөдлийг хэлэлцэж, санал, дүгнэлтээ ил санал хураалтаар, гишүүдийнхээ олонхын саналаар гаргана. Дараа нь нэгдсэн хуралдаанд танилцуулах гишүүнээ томилно (2020 оны дэгийн хуулийн 35.3-ын ерөнхий журам).

Нэгдсэн хуралдаан. Гишүүдийн олонх ирсэн бол хуралдаан хүчинтэй (11.1). Ерөнхийлөгчийг хүсэлтээр нь чөлөөлөхөд тусгай босго заасан заалт олдсонгүй. Ерөнхий журмаар тогтоол хуралдаанд оролцсон гишүүдийн олонхын саналаар батлагдана.

Бүрэн эрх шилжих. Тогтоол батлагдмагц Ерөнхийлөгчийн бүрэн эрхийг Улсын Их Хурлын дарга бүтнээр хэрэгжүүлнэ. Тэрбээр зарлиг, захирамжид "Ерөнхийлөгчийн үүрэг гүйцэтгэгч" гэж гарын үсэг зурна (Ерөнхийлөгчийн тухай хуулийн 11.4, 11.6). 11.4-т энэ асуудлыг Улсын Их Хурал тухай бүр нэгдсэн хуралдаанаараа шийдвэрлэнэ гэж заасан гэж ойлгож байна. Тиймээс бүрэн эрх шилжихийг тогтоолд тусгах магадлалтай.

Сонгууль зарлах. Улсын Их Хурал Ерөнхийлөгчийн сонгуулийг дөрвөн сарын дотор зарлан явуулна (Үндсэн хуулийн 37.2, Ерөнхийлөгчийн тухай хуулийн 11.8). Үүний дараа Сонгуулийн ерөнхий хороо сонгуулийн хуанли гаргана.

Ийм нөхцөлд Улсын Их Хурлын дарга үлдсэн долоон сарын турш ажиллахгүй. Ерөнхийлөгчийн сонгууль гурван сараар наашилж, 2027 оны гуравдугаар сараас өмнө болж таарах нь.

Өөрийн сэтгэгдлээ илэрхийл
Like
Love
Haha
Wow
Sad
Angry

О. Онон

МУИС-ийг Сэтгүүлч мэргэжлээр төгссөн. 2023 оноос эхлэн Eguur.mn мэдээллийн агентлагийн Эрэн сурвалжлах, эдийн засгийн албанд ажиллаж байна.

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

guest
1 Сэтгэгдэл
Шилдэг
Шинэ Хуучин
Inline Feedbacks
View all comments
Зочин
Зочин

УРАААААА, УРААААААА. УРА

Холбоотой мэдээ

Back to top button