ТОДРУУЛГА: Сайд нарт буу тараадаггүй

Монгол Улсын Ерөнхий сайд У.Хүрэлсүх зэвсэгт хүчний Хээрийн команд, штабын сургалтын үеэр цэргийн хувцас өмсөж, гар буу агссан нь олон нийтийн шүүмжлэлийг дагуулж буй.

Дайран дээр давс гэгчээр БСШУ-ны сайд асан, одоо АНУ-д суугаа бүрэн эрхт Элчин сайд Ё.Отгонбаяр твиттер хуудаснаа, “Засгийн газрын гишүүдэд гар буу өгдөг. Одоо ч надад бий” хэмээн жиргэсэн нь олны анхааралд өртөж, ярианы сэдэв болов.

Иймд Засгийн газрын гишүүдэд үнэхээр гар буу өгдөг эсэх тухай асуудлыг бид холбогдох албаныхнаас тодруулахыг зорьсон юм.

Хамгийн түрүүнд бид Батлан Хамгаалах Яамны Стратегийн бодлого төлөвлөлтийн газрын Орон нутгийн хамгаалалт, улсын дайчилгааны хэлтсийн ахлах мэргэжилтэн, дэд хурандаа С.Рагчаадоржтой холбогдсон юм.

Тэрээр энэ тухай “Засгийн газрын гишүүдэд галт зэвсэг тараадаггүй. Нарийн зүйлсийг Зэвсэгт хүчний жанжин штаб хэлж өгнө” гэсэн юм.

Үүний дагуу ЗХЖШ-ын Зэвсэглэлийн хэлтсийн дарга, хурандаа П.Чинзоригтой холбогдоход “Засгийн газрын гишүүдэд буу олгодог асуудал байхгүй. Дээр үед бэлтгэл үүрэгтэнд сургуулилтын үеэр буу тарааж байсныг үгүйсгэхгүй. Түүнээс биш одоо буу тарааж байгаа асуудал байхгүй” гэв.

ГАЛТ ЗЭВСГИЙН ТУХАЙ ХУУЛИНД ТУСГАСНААР: "гар буу” гэж 100 метр хүртлэх зайд хөнөөх чадалтай, 20 сантиметр хүртлэх урт гол төмөртэй галт зэвсгийг хэлнэ.

 17  дугаар зүйл. Галт зэвсэг авч явахад тавих шаардлага

• 17.2. Хот, суурин газарт нийтийн тээврийн хэрэгслээр галт зэвсэг авч явахыг хориглоно.
• 17.3. Галт зэвсгийг гэрчилгээний хамт авч явах ба аюулгүй байдлыг хангаж, сумнаас тусад нь зориулалтын гэрэнд хийсэн байна.

21 дүгээр зүйл. Хууль тогтоомж зөрчигчид хүлээлгэх хариуцлага

• 21.1.1. иргэн, хуулийн этгээд энэ хуулийн 4.1-д заасан галт зэвсэг хууль бусаар олж авсан, эзэмшсэн, ашигласан бол иргэнийг 30000-50000, хуулийн этгээдийг 50000-150000 төгрөгөөр торгох;
• 21.1.6. энэ хуулийн 10.2-т зааснаас бусад тохиолдолд хот суурингийн газарт галт зэвсэг ашигласан бол 30000-50000 төгрөгөөр торгох;
• 21.1.9. галт зэвсэг авч явах журам зөрчсөн иргэнийг 5000-10000 төгрөгөөр торгох;

Тэгэхээр журамдаа Засгийн газрын гишүүдэд буу тараадаггүй болж таарлаа. Буу авсан гээд байгаа АНУ-д суугаа бүрэн эрхт Элчин сайд Ё.Отгонбаяр ямар ар өврийн хаалгаар хэнээс галт зэвсэг авч өвөртлөв. Иргэдийн зовлогоо зовоож олсон хэдэн төгрөгийг татвар нэрийдлээр авч, түүгээрээ “амьд пабжи” тоглодог эрхмүүд гарч ирж тайлбар тавина уу.

ӨМНӨХ КОНТЕНТ:

"Ё.Отгонбаяр: Засгийн газрын гишүүдэд гар буу өгдөг, одоо ч надад бий” контентыг ЭНД ДАРЖ уншина уу.

О.ЭНЭРЭЛ

Энэ мэдээнд өгөх таны үнэлгээ

Хуваалцаарай Жиргээрэй