Айрагны хөшөө сүндэрлүүлсэн анхдагч

Өнөөх хөшөө барих дон үргэлжилсээр. Манайхан улсын төсвийн мөнгөөр ч хөшөө барих хоббитой хүмүүс. Тэгвэл "анхдагчид"-ын өлгий нутаг хэмээгддэг Булган энэ удаад айрагны хөшөөтэй болсон анхны аймаг болох нь тэр. Энэ нэршлийг давхар зүүхэд нь УИХ-ын гишүүн, Булган аймгийн нутгийн зөвлөлийн тэргүүн Ц.Анандбазар гол үүрэг гүйцэтгэв.

Тодруулбал, Булган аймгийн Орхон сумын нутаг, Өрмийн цагаан нуурын зүүн талд Айрагны хөшөө сүндэрлүүлсэн талаар түүний ажлын албаныхан цахим хаягаараа мэдээлсэн юм. Айрагны баяртай давхцан хийж буй нь энэ аж.

Түүний сүндэрлүүлсэн хөшөөнийх нь оройд "Айргаа тааваараа ууж, архиа бага уугаарай" хэмээн сийлжээ. Одоогоор Ц.Анандбазар эл хөшөөг ямар мөнгөөр барьсан нь тодорхойгүй. Хувийн мөнгөөрөө барьсан гэгдэж байна. Хувийнх ч бай, улсынх ч бай, "хөшөө сүндэрлүүлэх өвчин" төрийн түшээдийн дунд байсаар буй нь гол асуудал.

Нэг хүнд ногдох хөшөө дурсгалын тоогоороо манай улс дэлхийд нэгдүгээрт жагсдаг хэмээн Зааны ясан эрэг улсын төв хэвлэл DMN онцолсон байдаг.

Монголч эрдэмтэн Лаурен Жбагбогийн манай улсын талаар хоёр жил судалсны дараах судалгаагаа 2016 онд танилцуулахдаа хөшөө дурсгалтай холбоотой сонирхолтой тоон мэдээллийг гаргасан байдаг.

1990 оноос хойш 26 жилийн хугацаанд нарийвчилсан тоогоор:

• 1032 морины
• 538 бөхийн
• 341 төр нийгмийн нэрт зүтгэлтнүүдийн
• 1652 хонь ямааны
• 123 аргаль янгирын
• 756 үхэр тэмээний
• Чингис хааны 27
• Өэлүн эхийн 11
• нохойны 231
• эвтэй дөрвөн амьтны 26
• тарваганы 25 ширхэг хөшөөтэй гэж тэмдэглэгдсэн байх юм.

Түүнчлэн дээрх 26 жилийн хугацаанд,

• сансарын 5 пуужин
• атомын 2 цахилгаан станц
• 6000 цэцэрлэг
• 4000 гаруй эмнэлэг
• 2500 сургууль
• 20 сая хүүхдийн мөнгөөр хөшөө босгосон байна хэмээн олон улсын "Эмнести интернэшл байгууллага" дүгнэлт гаргасан байдаг.

Тэгэхээр 2016 оноос хойш хэмээн тооцоолбол долоон жилийн хугацаанд эл тоо өссөн ч хэд хүрэн талаарх нарийн мэдээлэл алга.

Хөшөө бүр тухайн цаг үеийн түүхийг илэрхийлдэг. Түүхийн үнэт өв хөшөө байгальд байхад нь тоодоггүй атлаа хувь, улсаас төсөв гарган хөшөө нэртэй "булшны чулуу" босгох нь утгагүй хэрэг. Хэнд ч хэрэгтэй юм, ямар ч түүх агуулж байгаа нь тодорхойгүй.

Хэдийгээр Түрэг угсаатнуудын үлдээсэн том соёл бидэнд үлдсэн учраас л хөшөө дурсгалын эх орон болсон хэрэг. Гэсэн хэдий ч олон жилийн түүхт хөшөө дурсгалаас илүүтэй эрх баригчдын нээлт хийж, зураг татуулах хөшөөг харах нь олонтаа болсон нь түүх талаасаа хөшөө дурсгалын үнэ цэнийг үгүй хийж буй.

Одоо бидэнд хөшөөнд хөшөө барих л үлдлээ.

Өөрийн сэтгэгдлээ илэрхийл

Share Tweet