А даалгавраа цуцлуулагсдын дунд Н.Багабандийн хоёр барилга багтжээ

Нийслэлийн Засаг дарга Д.Сумъяабазар өнөөдөр мэдээлэл хийх үеэрээ барилга барихаар 1642 архитектур төлөвлөлтийн даалгавар батлуулсныг хүчингүй болгоно гэж мэдэгдлээ. Өөрөөр хэлбэл барилга барих эрхийг нь цуцална гэсэн үг юм.

Эл жагсаалтад Ерөнхийлөгч асан Н.Багабандийн хоёр газар барилга барихаар батлуусан А даалгавар багтжээ. Тодруулбал,

Хан-Уул дүүргийн 11-р хорооны нутаг дэвсгэрт нэг блок барилга барихаар 2010 нэгдүгээр сарын 25-нд А даалгавар батлуулж авчээ.

Хан-Уул дүүргийн 11-р хорооны нутаг дэвсгэрт нэг барилга барих А даалгавраа 2013 оны зургаадугаар сарын 27-нд батлуулжээ.

Нэмэлтээр мэдээлэхэд, уржигдар /2023.08.16/ ЦХХХ-ны сайд Н.Учрал Барилга, хот байгуулалтын яамнаас 2008-2023 оныг хамарсан улсын комиссын 8404 дүгнэлт болон 2004-2023 оны хооронд архитектур төлөвлөлтөд орсон 11668 барилга, 3941 эзэмшигчийн мэдээллийг shilen.gov.mn сайтад нээлттэй байршуулсныг зарласан.

Ил болсон мэдээлэлд, Монгол Улсын Ерөнхийлөгч асан Н.Багабанди, түүний охин Б.Баярмаа, хүү Б.Батбаяр нарын нэр дээр Хан-Уул дүүргийн нутаг дэвсгэрт буюу Стадион Оргил-2 байршилд хоёр барилга барихаар А даалгавар батлуулсан.

• Хоёр давхар амины орон сууц барих архитектур төлөвлөлтийн даалгавраа 2018 оны арваннэгдүгээр сарын 30-нд,
• гурван давхар үйлчилгээний барилга барих архитектур төлөвлөлтийн даалгавраа 2021 оны зургаадугаар сарын 29-нд тус тус батлуулжээ.  

Улаанбаатар хотод одоогоор 294,852 барилга байгууламж бүртгэлтэй байгаа юм байна. Үүн дээр одоо байгаа 1,642 барилгын архитектур төлөвлөлтийн даалгавар нэмэгдвэл 304,979 барилга байгууламж болж нягтаршил дараах байдлаар  нэмэгдэх хандлагатай байна. 

Өөрийн сэтгэгдлээ илэрхийл

Share Tweet