Т.Баярхүү: Фортуна Н.Батбаярын хэргийн хөөн хэлэлцэх хугацаа дууссан, Ц.Элбэгдоржийг яллагдагчаар татаагүй

Авлигатай тэмцэх газраас өнөөдөр /2019.11.11/ ээлжит хэвлэлийн хурлаа хийж, 2019 оны эхний арван сарын байдлаарх ажлын явцаа тайлагнав. Мөн энэ үеэр олны анхаарал татсан зарим хэргүүдийн талаар сэтгүүлчдийн асуултад хариуллаа.

2009-2019 ОНД ТАВ БОЛОН ТҮҮНЭЭС ДЭЭШ ДАВЖ ШӨВГӨРСӨН 192  БӨХӨӨС ДАХИН ШИНЖИЛГЭЭ АВЧ ДАХИН ШАЛГАХ АЖИЛЛАГАА ҮРГЭЛЖИЛЖ БАЙНА

-УИХ-ын гишүүд мөрийтэй тоглоом тоглож байгаад баригдсан гэдэг асуудлаар мэдээлэл өгнө үү?

-Мөрийтэй тоглосон гэх асуудал зөрчлийн тухай хуулиар шийдвэрлэгдэх асуудал тул манай АТГ дээр мөрийтэй тоглосон ирэхгүй.

-Жигжиднямаатай холбоотой хэрэг шалгагдаж байгаа юу?

-Тиймээ. Шалгагдаж байгаа. Уг хэрэгт АТГ-ын даргын тушаалаар ажлын хэсэг байгуулагдаж, мөрдөн шалгах ажиллагааг явуулж байна. Тодорхой хэмжээнд шалгах асуудлууд байгаа учраас мөрдөн шалгах ажиллагаа удаашрах асуудал бий.

-Бөхчүүдийн допинг хэрэглэсэн асуудлаар АТГ-аас хэрэг нээн шалгаж байгаа гэсэн. Юу болж байгаа бол?

-Бөхчүүдийн допингийн асуудал шалгагдаж байгаа. Үндэсний их баяр наадмын үндэсний бөхийн барилдаанд тав болон түүнээс дээш давж шөвгөрсөн 16 бөхөөс сэргээшийн шинжилгээ авах ажлын  хэсэгт ажиллаж байсан албан тушаалтнууд шинжилгээний сорьцыг өөрчлөх, итгэмжлэгдсэн лабораторийн хариуг хууль бусаар өөрчилж, олон нийтэд худал мэдээлэл тараах замаар албаны эрх мэдлээ урвуулан ашиглаж, их хэмжээний хахууль авсан байж болзошгүй гэх асуудал дээр мөрдөн шалгах ажиллагаа үргэлжилж байгаа. Уг асуудлыг сүүлийн 10 жилийн байдлаар буюу 2009-2019 оны байдлаар шалгаж үзэж байгаа. Энэ хугацаанд нийт шөвгөрсөн 192 бөх давхардсан тоогоор, давхардаагүй 109 бөхөөс дахин шинжилгээ авч, Дэлхийн допингийн эсрэг төвийн Солонгост итгэмжлэгдсэн лабораторийн шинжилгээний хариутай харьцуулан шалгах ажиллагаа хийгдэж байна.

-Тогтохсүрэн гишүүнтэй холбоотой асуудал шалгагдаж байгаа нь үнэн үү?

-Тогтохсүрэн гишүүнтэй холбоотой асуудлаар хэрэг бүртгэлийн хэрэг нээгээд шалгагдаад явж байгаа.

-ЖДҮХС-тай холбоотой найман гишүүд шалгагдаж байгаа гэсэн. Хэн хэн бэ?

-УИХ-ын гишүүнээс бүрэн эрхийнхээ хүрээнд 2019 оны долоодугаар сарын 24-ний өдөр манай байгууллагад хүсэлт ирүүлсэн байгаа. Манай байгууллагаас 2019 оны наймдугаар сарын 01-ний өдөр хариу өгөхдөө ЖДҮХС-гийн санхүүжилтэд хамрагдсан иргэн аж ахуйн нэгж дотор барьцаалан зээлдүүлэх үйлчилгээ эрхэлдэг, банк бус санхүүгийн байгууллага, хадгаламж зээлийн хоршоотой хамаарал бүхий 34, албан тушаалтнуудтай хамаарал бүхий 11 иргэн аж ахуйн нэгж байгааг тогтоож, уг аж ахуйн нэгжүүд мөнгө угаасан гэмт хэргийн шинжтэй үйлдэл байгаа эсэхийг тогтоох зорилгоор тухайн байгууллагуудын дансны гүйлгээнд шалгалт хийсэн. Энэ хугацаанд өндөр хүүтэй хадгаламжид мөнгө байршуулсан найман тохиолдол гарч, шалгагдаж байгаа. Үүн дээр найман гишүүн гэдэг асуудал яригдаагүй. Өөрөөр хэлбэл, ЖДҮХС-тай холбоотой асуудал дээр зээл олгосон, албаны эрх мэдлээ урвуулсан, бусдад давуу байдал олгосон гэдэг хэрэг нэг тусдаа шалгагдаж байгаа бол үүнээс гадна авсан санхүүжилтээ 34 аж ахуйн нэгж банк бус санхүүгийн байгууллага, хадгаламж зээлийн хоршоотой холбоотой, үүнээс 11 нь албан тушаалтантай хамаарал бүхий аж ахуйн нэгж байна. Үүнд:

Уран сэлэнгэ ХХК

Цагийн элч ХХК

Грийнтовер ХХК

Эс эл эм и ХХК

Цамбагарав трейд ХХК

Жигүүрт хүсэл ХХК

Тэ бэ эм тэ ХХК гэсэн найман аж ахуйн нэгж авсан зээлээ өндөр хүүтэй хадгаламжид зарим хэсгийг нь, зарим нь бүгдийг нь байршуулсан байна.

ФОРТУНА БАТБАЯРЫН ХЭРГИЙН ХӨӨН ХЭЛЭЛЦЭХ ХУГАЦАА ДУУССАН

-Ерөнхийлөгч асан Ц.Элбэгдорж, П.Цагаан нартай холбоотой 3 сая ам.долларын хэрэг юу болсон бэ?  

-Ачит эх компанитай холбоотой асуудалд хэрэг бүртгэлтийн хэрэг нээгээд, шалгалтын ажил үргэлжилж байгаа.

-Ерөнхий прокурор Дорлигжавтай холбоотой 4 сая ам.долларын хэргийг шалгаж байгаа юу?

-Шалгагдаж байгаа. Нэмж шалгах ажиллагаа байгаа учраас үргэлжлүүлээд шалгаад явж байна.

-УБТЗ-ын дарга асан Жигжиднямаатай холбоотойгоор хэчнээн хэрэг үүсгээд шалгаж байгаа вэ?

-Өмнөх хэвлэлийн хурлаар хэлсэн, нийт 20 гаруй үйлдэл дээр шалгаж байгаа. Шалгалтын ажиллагаа зөвхөн манай байгууллагаас үл хамааран гадны байгууллагуудтай хамтын ажиллагаа шаардагддаг тул цаг хугацаа хэрэгтэй.

-Ерөнхийлөгч асан Ц.Элбэгдоржийг Солонгос иргэнийг залилсан гэх асуудал танай дээр шалгагдаж байгаа юу?

-Шалгагдаж байгаа.

-УИХ-ын тамгын газрын дарга Өлзийсайханы хэрэг шалгагдаж байгаа юу?

-Тийм асуудал одоогоор шалгагдаж байгаа гэх мэдээлэл надад алга байна.

-Фортуна Батбаярын хэрэг юу болж байгаа юм бол?

-Манайхаас шүүхэд шилжүүлэх саналтай явуулаад, хөөн хэлэлцэх хуагцаа дууссан учир хэрэгсэхгүй болсон гэх мэдээлэл надад байна.

-Шалгагдаж байх явцдаа гадаадад байгаа хэд хэдэн иргэн байгаа гэх? Ямар ямар иргэн байгаа вэ?

-Манай дээр Ерөнхий сайд асан Ч.Сайханбилэг хилийн чанадад эмчилгээ хийлгэж байгаа гэдгээ мэдэгдсэн. Шүүхээс тухайн хүнийг гэмт хэрэг үйлдсэн, гэм буруутай гэж тогтоогоогүй байгаа шүү дээ. Тиймээс мөрдөн шалгах ажиллагааны явцад тухайн этгээдийг хилээр гарахыг хориглож, таслан сэргийлэх арга хэмжээ авсан байсан. Эмчилгээ хийлгэх шаардлага байгаа гэх хүсэлтээ шүүхэд өгч, тэндээс зөвшөөрөл өгсөн тул хилийн чанадад эмчилгээ хийлгэхээр явсан байна.

Ц.ЭЛБЭГДОРЖИЙГ ЯЛЛАГДАГЧААР ТАТААГҮЙ, Ж.ЭРДЭНБАТЫГ ШАЛГАЖ БАЙГАА

-Салхитын мөнгөний ордтой холбоотой зургаан шүүгчийн хэрэг юу болж байгаа бол? 17 шүүгч байсан, яагаад зургаа болох болов оо?

-Салхитын мөнгөний ордтой холбоотой асуудалд холбогдсон зургаан нэр бүхий шүүгч бий. Уг хэргийн мөрдөн шалгах ажиллагаа дуусаад шүүхэд шилжүүлэх саналтайгаар Прокурорын байгууллагад шилжүүлсэн байгаа. Зөвхөн Салхитын мөнгөний ордтой холбоотой хэргээр нэр бүхий 17 шүүгч яригдаагүй, бусад шүүгч нарыг өөр гэмт хэрэгтэй холбогдуулан шалгагдаж буй асуудал байгаа. Анхнаасаа хэвлэл мэдээллийн хэрэгслээр гарч байгаа зарим мэдээлэл хэргийн бодит байдалтай таарах ч тохиолдол бий, таарахгүй ч тохиолдол бий. Энэ хэрэгт анхнаас нь 17 хүн гэж явсан ч нийт зургаан шүүгч л холбоотойгоор шалгагдаж байгаа. Бусад нь өөр хэрэгт буюу зарим дээр нь үндэслэлгүйгээр хөрөнгөжсөн гэмт хэргийн шинжтэй үйлдэл бий тул шалгаж байгаа.

-Хөгжлийн банкны асуудал юу болж байгаа вэ?

-Хөгжлийн банктай холбоотой олон асуудал бий. Түрүүн нэр дурдагдсан хоёр сайд асанд холбогдох хэрэг бол тухайн хэргийн нэг хэсэг нь гэж хэлж болно. Хөгжлийн банкны хэрэг гэж дан ганц хэрэг байхгүй. Хөгжлийн банкны санхүүжилт, түүнээс гарсан зээлтэй холбоотой асуудлуудтай холбоотой хэд хэдэн хэрэг шалгагдаж байгаа. Үүний хүрээнд Хөгжлийн банкны ТУЗ-ийн дарга Шинэбаатар, гүйцэтгэх захирал Мөнхбаатар нартай холбогдох хэрэг буюу ХХБ-аас 27.5 тэрбум төгрөгөөр байр авсан гэх хэргийг шалгаад шүүхэд шилжүүлэх саналтайгаар прокурорт явуулсан.

-Оюутолгойн гэрээтэй холбоотой хэрэг юу болсон бэ?  

-Оюутолгойн гэрээтэй холбоотой асуудлаар С.Баяр, С.Баярцогт, Ч.Сайханбилэг нарт холбогдох хэргийн мөрдөн шалгах ажиллагаа дууссан. Шүүхэд шилжүүлэх саналтай прокурорын байгууллагад шилжүүлсэн байна.

-Монгол улсын ерөнхийлөгч асан Ц.Элбэгдоржийг гадаад улс руу оргон зайлсан гэх мэдээлэл байна. Энэ үнэн үү?

-Тухайн хүнийг яллагдагчаар татаагүй байгаа. Шалгаж буй ажиллагаа явагдаж буй тул тодорхой хариулт өгөх боломжгүй.

-Ерөнхий сайд асан Ж.Эрдэнэбатыг шалгаж байгаа юу?

-Шалгагдаж байгаа. Албан тушаалаа ашигласан, урвуулсан гэх асуудлаар.

-ЖДҮ-тэй холбоотой хэрэгт Батзоригийг шалгаж байгаа юм бол бусад гишүүдэд холбогдох хэрэг ямар шатанд явж байгаа бол?

-Маш өргөн хүрээтэй шалгагдаж байгаа. Шалгагдах явцад заавал тухайн хүнээс өөрөөс нь мэдүүлэг авах шаардлагагүй. Тодорхой хэмжээнд холбогдох нотлох баримтуудыг хуульд заасны дагуу бэхжүүлж авдаг. Нэр дурдагдсан асуудлууд бүгд шалгагдаад явж байгаа.

Т.САНТ

ГЭРЭЛ ЗУРГИЙГ: А.МАНДУУЛ

Энэ мэдээнд өгөх таны үнэлгээ

Хуваалцаарай Жиргээрэй