С.Энхболдыг ЭМДЕГ-ын даргаар томилохдоо бид "шалгаад асуудалгүй гэж үзсэн" гэх Т.Мөнхсайханы үг худал болж таарав

Дарга асан нь авлигын хэрэгт холбогдож суудал нь хоосон хоцорсон ЭМДЕГ-ын даргын суудалд Засгийн газар прокурортяллагдагчаар татсан Эрүүл мэндийн сайд асан С.Энхболдыг томилсон.

Угаас асуудалтай байгаа тус газрын даргад дахиад л баригдаад явж мэдэх, эрх мэдлээ урвуулан ашиглаж улсад их хэмжээний хохирол учруулсан хэрэгт нэр холбогдсон хүнийг суулгасан нь нөгөөх арын хаалганы томилгоо нь явчих вуу гэх хардлагыг төрүүлсэн. Харин үүний нөгөө талд С.Энхболдын хэрэг яасан бэ гэх асуулт гарч ирсэн.

Иймд томилгооны дараа түүний хэрэг хэрхсэн яагаад яллагдагчаар татагдсан хүнд эл суудлыг өгөв гэх асуултыг салбарын сайд Т.Мөнхсайханаас нь асуухад, “С.Энхболдыг ЭМДЕГ-ын даргын түр орлон гүйцэтгэгчээр томилохдоо шаардлагатай бичиг баримтыг нь нягталсан. Бид АТГ руу албан хүсэлт явуулж хариу бичиг аваад асуудалгүй гэж үзсэн учир түүнийг уг суудалд томилоод байгаа” гэсэн юм.

Гэтэл түүнд холбогдох хэргийн явцын талаар НПГ-аас өчигдөр /2024.01.27/ “Тухайн этгээдийг албан тушаалд томилох эсэх нь мөрдөх байгууллага болон прокурорын байгууллагад хамаарахгүй. Мөрдөн шалгах ажиллагаа үргэлжилж байна” гэх мэдээллийг өгөв.

Тэгэхээр Засгийн газар С.Энхболдыг шалгагдаж байгааг мэдсэн хэр нь ЭМДЕГ-ын даргын суудлыг өгсөн болж таарав. Үүнийгээ ч чимээгүй дарах, нуух зорилготой байсан нь Эрүүл мэндийн сайд Т.Мөнхсайханы “С.Энхболдыг ЭМДЕГ-ын суудалд томилохдоо шаардлагатай бүх бичиг баримтыг нь шалгаж, АТГ-т хүсэлт илгээгээд асуудалгүй гэж үзсэн” гэх өмнөх сайдаа өмгөөлсөн тайлбараас харж болно.

Д.ЖАРГАЛМАА

Энэ мэдээнд өгөх таны үнэлгээ

Хуваалцаарай Жиргээрэй