И-мартын ажилтан 63 настай Б.Сарантуяа: Эх хүн байж хүүхдүүдээсээ мөнгө зулгаахгүй шүү гээд ажилд орсон

И-март сүлжээ дэлгүүрт ажилладаг 64 настай малчин эмэгтэй Б.Сарантуяатай ярилцлаа. Тэр тэтгэвэртэй гараад 14 жил болж байгаа. Гэсэн ч одоо тэр сүлжээ дэлгүүрт өрөгчөөр ажилладаг. Бусад ажилчдаасаа насаар ахмад ч ажиллах чадвар, цаг барилтаараа бусдыгаа манлайлдаг байна.

-Юуны түрүүнд та манай үзэгч болон уншигчдад өөрийгөө танилцуулаач?

-Би Завхан аймгийн Цагаан хайрхан сумын Онц багийн иргэн. Одоогоос 4 жилийн өмнө хотод нүүж ирсэн. Нэг охин, хоёр ихэр хүүхэдтэй. Би уг нь Гачууртын тэнд зээгээ хараад суудаг байсан юм. Тэгсэн энэ жил хүүхдүүдийн маань хамгийн бага нь хоёр ой хүрээд цэцэрлэгт орсон. Харж байсан хүүхэд маань цэцэрлэгийн хүн болчиход надад олдохоо больсон. Тэгээд л ажил хийе гэж бодож эхэлсэн юм. Хүүхдүүд маань ч ажил хийнэ гэхэд дуртай хүлээж аваагүй л дээ. Гэхдээ тэгээд өөрөө дуртай байсан болохоор найзаараа дамжуулж ажил асууж байгаад И-март тэтгэврийн ахмад ажилд авна гэсэн зарыг хараад анх ирж уулзаж байлаа. Хүний нөөцийн ажилтан гээд нэг хөөрхөн ааштай охин “та ямар ажил хийх юм” гэхээр нь би “ямар бол ямар ажил хийнэ ээ” гээд л ажилд орж байсан. Би чинь сард 600 мянган төгрөгийн цалин авдаг. Юмны үнэ нэмэгдээд хэрэглээндээ хүрэхээ больсон л доо. Тэглээ гээд хүүхдүүдээсээ зулгаах эх хүнд сайхан санагдахгүй шүү дээ. Тиймээс л ажиллая гэж шийдсэн юм.

-Олуулаа ажилладаг юм байна. Ийм олон хүнтэй байгууллагад ажиллах танд ямар санагдав?

-Энд ажиллаж эхэлсэн өдрөөс л сайхан санагдсан. Ажилчдын харилцаа сайтай. Бусад ажилчид маань ааш зан сайтай. Гоё л байна. Өдөртөө нэг хоёрдугаар хоолонд орчихно. Ажлын дундуур амралтын цагтай. Ажил нь ч амархан. Хангамж нь ч сайн. Дээрээс нь би чинь энэ хэдэн ажилчдаасаа арай өндөр настай юм болохоор энэ хэд маань намайг сайн бөөцийлнө. Ажиллахын хажуугаар халамжлуулаад л байж байна даа эгч нь. Гэр ойрхон болохоор өглөө ажилдаа алхаад орж ирдэг. Цагийг бол яс барина шүү дээ. Оройн нь харьж амарчхаад өглөө нь хүүхдээ хөхүүлэх гэж байгаа эх хүн шиг л И-мартыг хараад гүйгээд ороод ирнэ. Орж ирэхээр эхэнд таардаг жижүүр “За сайхан амарсан уу. Ажлын амжилт хүсье” гэж өглөө болгон хэлнэ. Тэр нь надад хачин сайхан санагддаг.

-Та ажилд ороод хэр удаж байна. Цаашид ер нь энэ ажлаа хийгээд л байх уу?

-Би дөрвөн сар ажиллаж байна. Цаашдаа ажиллаад л байвал ажиллаад л баймаар байна. Гэхдээ жоохон хүүхдүүдээ аваад хөдөө гарах ажил бас үе үе гарна. Би тэр ажлаа ч зохицуулж, энэ ажлаа ч зохицуулаад аваад явна л гэж бодож байгаа. Зун хөдөө гараад үнээ мал саагаад, сүү таргандаа хүүхдүүдээ байлгаж байгаад намар орж ирээд ажилдаа орно доо.

-Тэтгэвэр хэрэгцээнд хүрдэггүй гэж байсан. Цалин нэмэгдэхээр том нэмэр болж байгаа байх?

-Тэгэлгүй яах вэ. Би заримдаа сая гаргаж, заримдаа саяыг авдаг. Өөрөө хөдөлмөрлөөд авч байгаа мөнгө болохоор сайхан. Бас хэрэглээндээ ч хангалттай хүрээд аятайхан л байна. Би уг нь 650 мянган төгрөгийн цалинтай байхад л болно гэж бодож байсан юм. Тэгсэн И-март таны цалин сая төгрөгөөс эхэлнэ шүү гэсэн. Би чинь одоо цалин буухаар эндээсээ авна гэж харж байсан юмнуудаа авчихна. Өөр хэрэгцээ гарахгүй. Тэгээд тэтгэвэр маань цаана нь бүтнээрээ үлдчихнэ. Их аятайхан байгаа биз.

-Ажлаас нь хүнд санагдаж байгаа зүйл байна уу?

-Тэр нэг утсан дээрээ нэг юм оруулаад уншуулж үнэ хараад байдгийг л чаддаггүй байсан. Хүүхдүүд маань ч заагаад, энд ажилдаг бусад маань ч туслаад бүх юм аа дор нь сурсан.

-Та аль тасагт ажилладаг вэ?

-Би эхлээд гэр ахуйн тасаг дээр ажиллаж байсан. Дараа нь хямдралын тасаг. Тэгээд байж байсан ёолкны тасаг нээгдээд тэнд нь очиж юмнуудаа зарсан. Харин дараа нь хямдралын тасаг дээр байж байгаад хүүхдийн тоглоом дээр очсон. Тэгээд сая дахиад цагаан сарын тасаг нээгдсэн. Одоо тэнд нь ажиллаж байна. Би чинь И-мартын цагийн ажилтнаар явдаг. Намайг үдсэнээр орвол цалин өндөр гэсэн. Би зундаа хөдөө явчих болохоор хүнд төвөг удаад яах вэ гээд цагийн ажилтнаараа л байгаа.

-Та өмнө нь юу хийдэг байв?

-Би тракторчин мэргэжилтэй. Арван жилээ Завхан аймагт төгссөн. Дараа нь гадаад яваад Ленинград хотод хоёр жил сургуульд сурчхаад ирсэн. Ирээд мэргэжлээрээ 10 жил аймагтаа ажилласан. Тэгээд л хөдөө гарсан даа. Хөдөө мал малласаар байгаад энд ирээд ач зээ нараа өсгөлцөөд явж байна. Хоёр охин, хоёр хүүгийнхээ хүүхдүүдийг өсгөлцдөг. Эмээ болсны хэрэг энэ хэдийгээ өсгөлцөнө өө би гээд л хотод ирсэн. Би чинь Ленинградад сурч байхдаа гэр бүлийнхээ хүнтэйгээ танилцсан байсан юм. Манай хань одоо байгаа. Тракторын жолооч. Олон жил трактор барьсан. Бид хоёр чинь хоёулаа мал маллаж байгаад мянгат малчин болсон. Завхан аймгийн сайн малчин болсон. Тэмдэг одонгууд нь байгаа. Бид хоёр малаа сайн малласан. Бид хоёр одоо Сансрын тэнд хүүгийнхтэйгээ ойрхон байгаа. Ажилдаа яваад ирэхээр орой очиход хоол хийчихсэн байж байна.

-Ажилд нь танаас өөр өндөр настан бий юу?

-Манайд таван ч хүн бий. Зарим нь надаас дүү. Зарим нь яг чацуу. Би өмнө нь ийм том дэлгүүр байтугай түц-нд ч ажиллаж байгаагүй болохоор олон хамт олонтой ёстой сайхан байна. Би чинь бас энэ олон дотор гологдохгүй байх юм сан гээд л адилхан ажилладаг. Манай үеийнхэн чинь ер нь цаг их баримталдаг, зарчимч, социализмын үеийнх болохоороо тийм байдаг юм байна. Гэхдээ одоо үеийн хүүхдүүд бас их сайхан их сайхан боловсон болчихсон юм байна. Тэтгэвэртээ гарсан ахмадуудыг ажиллуулж байгаа энэ сайхан хамт олондоо ажлын өндөр амжилт хүсэж, амьдралд нь эрүүл энх, сайн сайхан бүхнийг хүсэн ерөөе.

Энэ мэдээнд өгөх таны үнэлгээ

Хуваалцаарай Жиргээрэй