ЭМЯ коронавирусийн халдварын тархалтын талаар ээлжит мэдээлэл хийлээ.
ЭМЯ-ны Шуурхай удирдлагын газрын дарга Д.Нарангэрэл: Халдвар дэлхийн 135 оронд бүртгэгдсэн. Европын орнуудад халдвар эрчимтэй тархаж байгаа бол БНХАУ, БНСУ-д халдварын тархалт буурч байна. Эрүүл мэндийн яамнаас шинжлэх ухаанд суурилсан зөвлөгөө, мэдээллийг тогтмол хүргэсээр байна. Цаашид ч мэдээллээ цахимаар олгохыг эрмэлзэж байна. Хүмүүсийн сонирхсон асуултад цахимаар хариулах боломжтой чатботыг НҮБ-ын Хүүхдийн сантай хамтарч хөгжүүлж байна.
ДЭМБ-ын мэргэжилтэн О.Ариунтуяа: ДЭМБ-ын гуравдугаар сарын 14-ний өдрийн мэдээллээр шинээр 13 улсад короновирусийн халдвар нэмэгдээд байна. Европ COVID-19-ийн гол төв болж байна. Дэгдэлтийг хязгаарлах зорилгоор олон нийтийн арга хэмжээг цуцалж, аль болох гэрээсээ гарахгүй байхыг зөвлөж байна. Итали, Иран, Испани улсад хоногт 1000-1500 тохиолдол бүртгэгдсэн. Соёл урлагийн байгууллага, дэлгүүр, рестораныг хааж, аль болох гэрээсээ гарахгүй байх зөвлөмж өгч байна.
