Сүрьеэгийн эмнэлэг: Д.Сарангэрэлийн үед тендерт шалгараагүй компани ТХААГ-тай шүүхдэн ялжээ

2019 оны улсын төсөвт Сүрьеэгийн эмнэлгийн барилгын санхүүжилтийг 10 тэрбум төгрөгөөр баталсан байдаг. Улмаар 2019.12.19-нд ТХААГ-аас төслийн гүйцэтгэгч компанийг сонгон шалгаруулах тендер зарласан. Энэ үед Эрүүл мэндийн сайдаар Д.Сарангэрэл ажиллаж байв. Харин түүний хүү Х.Улам-Өрнөх ТХААГ-ын даргын албыг одоо хүртэл хашиж байна.

Тэгвэл, тухайн үед тендерт “Гангар инвест” ХХК шалгарч байжээ. Харин шалгаруулалтад оролцсон “Хар чонот” ХХК шударга бус шийдвэр гэж үзэн, Нийслэл дэх Захиргааны хэргийн анхан шатны шүүхэд гомдол гаргасан байна. Гомдлыг 2021.10.06-нд хэлэлцэн шийдвэрлэж, тендер шалгаруулалтын дүнг хүчингүй болгожээ. Улмаар “Хар чонот” ХХК-ийн үнэлгээг дахин хийхээр болжээ.

ШҮҮХЭД ЯЛСАН "ХАР ЧОНОТ" ХХК-Г ӨДГӨӨ ТЕНДЕРТ ШАЛГАРСНААР БҮРТГЭЖЭЭ

Шүүхийн маргааны процессыг тайлбарлавал, “Хар чонот” ХХК-иас:

• “Гангар инвест” ХХК-ийг тендерт шалгаруулсан шийдвэрийг хүчингүй болгуулах
• Тендерийн хүрээнд “Хар чонот” ХХК-ийн үнэлгээг дахин хийх зэрэг шаардлага тавьжээ.

Тухайн үед “Хар чонот” ХХК тендерийн бүх шаардлагыг хангаж байснаас гадна хамгийн бага үнийн санал ирүүлсэн тул ийнхүү шүүхэд нэхэмжлэл гаргасан байна. Дээр дурдсанчлан, “Хар чонот” ХХК ялсан. Улмаар “Гангар инвест”-ийг шалгаруулсан шийдвэр хүчингүй болжээ.

Эндээс, Д.Сарангэрэл, Х.Улам-Өрнөх нарын үед тендер шалгаруулалт шударга бус болсон гэж харах үндэслэл бий болж байна. Мөн “Хар чонот” ХХК-д дахин үнэлгээ хийхээр болсон нь Д.Сарангэрэлийг Эрүүл мэндийн сайдын суудлаас буусны дараа 2021 оны аравдугаар сард таарч байгаа юм.

Өнөөдрийн байдлаар, Сүрьеэгийн эмнэлгийн барилгын тендерт “Хар чонот” ХХК-ийг шалгарсан гэж тодотгожээ. “Хар чонот” болон “Гангар инвест” ХХК-иудын өмчлөгч, хувьцаа эзэмшигчдийн тухай мэдээллийг дата орчноос шүүхэд Д.Сарангэрэл, Х.Улам-Өрнөх нарын хамаарал гарч ирсэнгүй.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй