Дорнод аймгийн Халхгол сумын ЕБС-ийн хими, физикийн багш н.Алтан-Од 8-р ангийн сурагчдаа “даалгавар хийгээгүй” гэх шалтгаанаар зодсон тухай бичлэг цацагдсан.
Үүнтэй холбогдуулан БШУ-ны сайд Л.Энх-Амгалан өөрийн албан ёсны цахим хуудсаар дамжуулан хүлцэл өчив.
Тэрбээр, "Нэг ч хүүхэд хүчирхийллийн золиос болох ёсгүй. Амралтын өдрүүдээр хөдөө орон нутагт ажиллах зуур Дорнодын багш хүүхдүүдээ зодож буй, Эрдэнэтийн сургуулийн сурагч ахлах ангийн ах нартаа зодуулж тархины хүнд гэмтэл авсан тухай эмгэнэлтэй гэмт үйлдлүүдийн тухай мэдээллүүд сошиалаар цацагдсанд салбарын сайдын хувьд ч, эцэг хүний хувьд ч гүнээ харамсаж, сэтгэл зовнин сууна. Хүчирхийлэлийн золиос болсон сурагчид мөн тэдний эцэг эх, асран хамгаалагчдаас нь гүн хүлцэл өчье. Багш сурагчаа зодсон асуудал удаа дараа гарсаар байна. Энд тохиолдолд багшийн 100% буруу. Багшид арга хэмжээ авагдах нь зүй. Гэхдээ бид тогтолцоогоо бас сэтгэлгээгээ өөрчлөх нь хамгийн амин чухал асуудал болоод байна.
Дээрх үзэгдэл нь магадгүй бүр хуучирсан "хүүхдэд гар хүрч болдог" гэдэг ядуу сэтгэлгээний нэг илрэл юм. Хүүхдүүд сургууль дээрээ ч, гэр орондоо ч ийм уур амьсгалыг мэдэрч байгаа. Үүнд оролцогч гурван тал байгаа нь сурагч, багш, асран хамгаалагч гурав. Сурагчид урам зориг, чиг баримжаа өгөх ёстой бол насанд хүрсэн нөгөө хоёр талынх нь сэтгэлгээг өөрчлөх шаардлагатай байгаа.
Энэ бүхэн мэдээж өргөс авсан юм шиг хурдан өөрчлөгдөхгүй, харин үргэлж явагдах соён гэгээрлийн ажлын үр дүнд өөрчлөгдөх ёстой. Тиймээс Боловсролын яамнаас энэ жилийг “Ёс зүйн жил” болгон зарласан. Энэ нь уг сэдвийг үргэлж анхаарлын төвд байлгахын эхлэл болно.
Ёс зүйн жилийн хүрээнд зөвхөн соён гэгээрэл, нөлөөллийн ажлын зэрэгцээ бүтцийн хувьд ч хэд хэдэн өөрчлөлтийг хийсэн. Тухайлбал, Боловсролын салбарын түүхэнд анх удаа хэрэгжилтийн агентлагийг шинээр байгуулж, аймаг, дүүрэг, цэцэрлэг, сургууль болгонд Ёс зүйн зөвлөл, хороог байгуулж, сэтгэл зүйчтэй болгож үйл ажиллагааг нь идэвхжүүлж байна.
Мөн мэргэжлийн холбоод, төрийн бус байгууллагуудын оролцоо, үүрэг, хариуцлагыг нэмэгдүүлэх болно.
Энэ бүхний үр дүн эхнээсээ гарч сурагчид болон багш нарын хандлага, харилцаанд эерэг өөрчлөлт үзэгдэж буй. Дээр дурдсан үзэгдэл ч сурагч, асран хамгаалагчийн зүгээс “шүгэл үлээж”, далд үзэгдлийг ил болгож буй эерэг өөрчлөлт юм. Урт удаан хугацаанд үргэлжлэх үйл явцын эхлэл тул тодорхой тайлагнах цаг хараахан болоогүй байна.
Энэ ажлаа бид эрчийг нь алдуулахгүй хийж байгаа, харин үр дүнг хамтдаа хүлээцгээе. Эцэг эх, асран хамгаалагч та бүхэн ч үр хүүхдийнхээ төлөө, ёс зүйтэй ирээдүйн нийгмийг бүтээхийн төлөө энэхүү аянд идэвхтэй оролцож дуу хоолойгоо өргөөрэй гэж урьж байна. Эцэст нь дээрх асуудлыг бас багшийн талаас харахыг та бүхнээс хүсэх гэсэн юм. Өнөөдөр Монгол улсад багшийн ажил нь тийм ч хүсүүштэй ажлын байр байж чадах уу гэдэг асуулт зүй ёсоор тавигдана. Цалин бага, тэгсэн атал нэг багшид оногдох хүүхдийн тоо хэтэрхий их. Багшийн стресс дарамт хангалттай байгаа. Гэхдээ энэ нь хүүхэд зодох ёстой гэсэн үг биш нь мэдээж. Тиймээс Боловсролын яамнаас багшийн хүлээх ёс зүйн үүрэг хариуцлагыг тодотгох, ойлгуулах, хэвшүүлэх маш олон ажлуудыг эхлүүлснээс гадна нийгмийн асуудалд нь онцгой анхаарал хандуулан ажилласаар байгаа. Энэ ажилд бас багш нарыгаа идэвхтэй оролцож, санаа бодлоо уралдуулахыг уриалж байна. Эцэст нь сурагч, багш, эцэг эх, асран хамгаалагч гэсэн 3 алтан гурвалжны хамтын итгэлцэл, хамтын ажиллагаа, хамтын дэмжлэгээр бид үе тэнгийнхний дээрэлхэлт болон сургуулийн орчин дахь бүх хэлбэрийн хүчирхийлэлд хамтдаа цэг тавьж чадна..." гэжээ.
Сурагч хүүхдүүд удаа дараа хүчирхийллийн золиос болсоор. Зөвхөн цахим орчинд бичлэгээр цацагдаж, задарсан нь л бидний дунд хэлэлцүүлэг маргаан болж байна. Улмаар багшийг сургуулиас хөөсөн болоод асуудал намждаг. Гэвч хөөгдсөн багш нар өөр сургуульд орчихсон явж байдаг гажиг тогтолцоо манайд ужгарчихсан. Уг үндсээр нь сайжруулах асуудал бол Монголын боловсролын тогтолцоо. Түүнээс биш нэг сайд нийгэмд гоё сайхан үнэлэгдэх гэж эмзэглэсэн дүр үзүүлж сошиал орчинд хүлцэл өчөөд, багш ажлаасаа халагдаад өнгөрдөг болмооргүй байна.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.