Орон сууцны үнийг буулгаж зарах боломжгүй хуулийг эсэргүүцэж, ҮХЦ-д хандлаа

Үл хөдлөх хөрөнгийн тухай хуульд оруулсан нэмэлт өөрчлөлт оруулснаар үл хөдлөх хөрөнгийг анх захиалсан үнээс бууруулж зарах боломжгүй заалт бий болсон. Тодруулбал,

9 дүгээр зүйл. Эрхийн улсын бүртгэлд тусгах үл хөдлөх эд хөрөнгийн үнэ

/Эдгээр зүйлийг 2023 оны 12 дугаар сарын 07-ны өдрийн хуулиар өөрчлөн найруулснаар/

9.1.Эрхийн улсын бүртгэлд тусгах газрын хязгаарлагдмал эрх, гэрээгээр ашиглах эрх, үл хөдлөх эд хөрөнгийн үнийг дараах тохиолдолд доор дурдсан дэс дарааллаар тодорхойлно:

9.1.1.газраас бусад үл хөдлөх эд хөрөнгийн өмчлөх эрхийг анх удаа эрхийн улсын бүртгэлд бүртгэхэд тухайн хөрөнгийн захиалгын гэрээнд заасан үнэ, захиалгын гэрээнд заасан үнэ байхгүй бол батлагдсан төсөвт өртгөөр тодорхойлогдсон үнэ;

9.1.2.газрын эрхийг анх удаа эрхийн улсын бүртгэлд бүртгэхэд эрх бүхий байгууллагаас тогтоосон суурь үнэ, суурь үнэ байхгүй бол дуудлага худалдааны үнэ;

9.1.3.өмчлөх эрх болон түүнтэй холбогдсон эд хөрөнгийн бусад эрх, газрын эрхийг худалдах, эсхүл шилжүүлэн бүртгүүлэх тохиолдолд гэрээ, хэлцэл, эсхүл эрх шилжүүлсэн шийдвэрт тусгагдсан үнэ;

9.1.4.газрын эрх, үл хөдлөх эд хөрөнгийг барьцаалах тохиолдолд эд хөрөнгийн эрхийн улсын бүртгэлд бүртгэгдсэн барьцааны гэрээ, эсхүл барьцаалбарт тусгагдсан тухайн эд хөрөнгийн барьцааны үнэ;

9.1.5.үнийн талаар өөрчлөлт орсныг эрхийн улсын бүртгэлд бүртгэхэд хуульд заасны дагуу хөрөнгийн үнэлгээ хийх эрх бүхий этгээдээр тогтоолгосон үнэ.

9.2.Мэдүүлэг гаргагч эд хөрөнгийн үнийг бодитой мэдүүлнэ.

9.3.Энэ хуулийн 9.1.5-д зааснаас бусад тохиолдолд энэ хуулийн 9.1.3, 9.1.4-т заасан үнийг хамгийн сүүлд бүртгэгдсэн үнээс бууруулж бүртгэхгүй.

Тэгвэл уг хуулийн хүчингүй болгохоор хуульч О.Батхүү Үндсэн хуулийн цэцэд хандана гэдэг мэдэгдлээ.

Тэрбээр, "Хуульд өөрчлөлт оруулснаар Монгол Улсын иргэд өөрийн өмчлөлийн үл хөдлөх хөрөнгийг зарж борлуулах эрхгүй болсон. Жишээ нь, Та хоёр өрөө байраа 150 сая төгрөгөөр авсан байлаа гэж бодъё. Тэр байраа хямдруулаад, 120-130 сая төгрөгөөр заръя гэвэл нэр шилжүүлэхгүй. Улсын бүртгэлийн байгууллага таны худалдан борлуулах гэрээг хүлээн авч бүртгэхгүй гэсэн үг.

Энэ хууль иргэд болон ААН-үүдэд хүндээр тусаж байна. Жишээлбэл, Дархан-Уул аймагт нэг гурилын компанийн захирал мөнгөний хэрэг гарлаа гээд компаниа хямдруулаад заръя гэтэл нэр шилжихгүй ийм нөхцөл үүссэн. Монгол Улсын иргэд өмч хөрөнгөө хэзээ, хэдээр зарахаа өөрсдөө мэдэж шийддэг баймаар байна" гэлээ.

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй