Тойм: Намрын чуулган нээхтэй зэрэгцэн гадны хоёр ч хөрөнгө оруулагч Монголыг орхилоо

НИТХ-ын сонгууль үргэлжилж буй энэ цаг үед улс төрийн голлох үйл явдал нь намрын ээлжит чуулганы хуралдаан байлаа. Засгийн газар дээрээ яригдаад байгаа 14 мега төслөө тал бүрээс нь хэлэлцэх талбар нь УИХ юм. Холмиог тогтолцооноос гарч ирсэн УИХ-ын 126 гишүүнтэй анхны парламент бүрдэж, анхны намрын чуулганы хуралдаанаа эхлүүлж буй юм.

126 гишүүнтэй шинэ парламентийг чангална гэдгээ Д.Амарбаясгалан ил тод мэдэгдэв

Иргэдийг төрд төлөөлж сууж буй шинэ парламентийн гишүүд эхний өдөр 100 хүний ирцтэй байсан бол хоёр дахь өдрөө 126 гишүүнээс 46 нь чуулганы хуралдаанд ирсэнгүй. УИХ-ын дарга Д.Амарбаясгалан намрын чуулганы нээлт дээр одоогийн парламентийн үйл ажиллагааг илүү нягтшуулж, гишүүдийн үүр хариуцлагыг чангаруулна гэдгээ нээлтийн үгэндээ хэлээд авсан. Тухайлбал,

• 5 намын төлөөлөл бүхий 126 гишүүн иргэдийн зүгээс илүү нээлттэй, ил тод байлгана
• Хуучин сэтгэлгээнээсээ салцгаана
• Илүү шинэлэг, үр нөлөөтэй ажиллах хэрэгцээ шаардлагатай
• Шинэ парламент өргөн мэдүүлсэн хуулийн төслөөрөө ажлаа тайлагнадаг байдлыг хална
• Санаачилж батлуулсан хуулиараа иргэдийн нийгмийн амьдралд хэрхэн нөлөөлж буй бодит хэрэгжилт дээр дүгнэлт хийх, үр дүнтэй холбон дүгнэдэг шинэ арга барил руу шилжих цаг нь болсон
• Хууль иргэдийн амьдралд дарамт, шахалт биш амьдралд нь өөдөө дээшлэхэд дэмжин туслахад чиглэдэг байх ёстой. Тиймээс эргэх холбоотой парламентийг төлөвшүүлж, хуулийг чанаржуулахад тууштай анхаарч ажиллана гэв.

Угтаа бол “Намынхаа хууччуулын хоцрогдмол арга барилыг өөрөөрөө дамжуулан уламжлуулахгүй” гэдэг санаагаа илэрхийлсэн нь энэ. Нам доторх ах нарынхаа фракцад хаягласан, амбиц ханхалсан дүр зураг байв.

Үгийг нь хүчитгэж Ерөнхий сайд Л.Оюун-Эрдэнэ ч мөн чуулганы хуралдааны нээлтийн хоёр дахь өдөр “Хуучныг хална” гэдгээ цухалзуулсан. Засгийн гол амбиц болсон 14 мега төслөө зайлшгүй урагшлуулна гэдгээ ч мөн тулгаад авав. 14 мега төслийг дараалуулан УИХ-д танилцуулахаар болсон юм. Засгийн газрын халамж, анхаарал уг төслүүд дээр төвлөрсөн тул парламентад зөв дүрээ олж урагшлах эсэх сорилт үлдээд буй.

Монголыг долоо хоногийн дотор хоёр том хөрөнгө оруулагч орхилоо

Эдийн засгийн салбарт ихээхэн сонирхол татсан хоёр дүр зураг болж өрнөсөн долоо хоног байлаа.

Уул уурхайн талбарт Монголын томоохон ордын тоонд багтаж буй “Хүрэл үнэг”-ийг эзэмшиж байсан “Kincora Copper” өнгөрсөн жилээс эхлэн уг төслөө худалдахаа зарлаж эхэлсэн. “Хүрэл үнэг”-ийн хувьд гараанаасаа сайн байсан төсөл. Гэвч “Kincora Copper” 12 жилийн дараа уг төслийг Австралийн “Woomera Mining” –руу тодорхой тохироогоор худалдаж, шилжүүлэх шийдвэрээ энэ долоо хоногт эцэслэснээр энэ төслөөс гарч байна. Манайдаа хэрэгжиж буй томоохон жишиг төслийн нэг бол Оюутолгой. Гэтэл өнөөдрийг хүртэлх нөхцлийг харвал Оюутолгойг ноолоогүй нам засаг, татварын дарамт, элдэв хөдөлгөөнүүд гэж байхгүй. Хөндлөнгийн хөрөнгө оруулагчдад харсан ч энэ бол маш төвөгтэй, адармаатай байдал. Тиймээс уул уурхайн салбар руу хөрөнгө оруулагчаар орно гэдэг хувь компанид өөрт нь эрсдэлтэй байхад нэмээд улс төрийн нөлөөлөл үүсэх ямар байх нь ойлгомжтой.

Улаанбаатарын үл хөдлөх хөрөнгийн зах зээлийн бас нэгэн тоглогч Торонтогийн хөрөнгийн биржид бүртгэлтэй "Mongolia Growth Group" Монгол дахь үл хөдлөх хөрөнгүүд болон оффисоо зарж байгаагаа албан ёсоор мэдэгдсэн юм. Эдийн засгийн таатай мөч ирэхийг хүлээх нь хэтэрхий эрсдэлтэй гэж үзсэн учраас хөрөнгүүдээ зарж, компаниа бүр мөсөн татан буулгаж магадгүй гэдгээ ч мөн илэрхийлсэн байна. 13 жилийн турш Монголд тогтвортой үйл ажиллагаа явуулж байсан тус компанийн хувьд хотын А зэрэглэлийн бүсд томоохон бүтээн байгуулалтуудыг хийж ирсэн билээ.

Ийнхүү долоо хоногийн дотор үл хөдлөх хөрөнгийн болон уул уурхайн салбарын гадны хоёр хөрөнгө оруулагч компани шил даран Монголын зах зээлээс гарсан явдал болов.

Ц.ТАМИР

Энэ мэдээнд өгөх таны үнэлгээ

Хуваалцаарай Жиргээрэй