Сурвалжилга: Нарантуулыг нүүлгэх шийдвэрийг худалдаа эрхлэгчид эсэргүүцэж, иргэд дэмжив

Хотын дарга Х.Нямбаатар 2024-2028 онд нийслэлд хот доторх анхны хурдны замын ажил, метроны төсөлтэй холбоотойгоор "зах худалдааны төвийг нүүлгэнэ" гэдгээ илэрхийлсэн.

Угтаа Нийслэлд буй томоохон худалдааны төвүүд түгжрэлийн гол шалтгаан болж байгааг дурдсан байдаг. Энэ мэдэгдэлтэй холбоотойгоор бид Нарантуул худалдааны төвийг нүүлгэх ажил хэзээнээс эхлэх талаар хотын дарга Х.Нямбаатараас тодруулахад, "Ирэх дөрөвдүгээр сараас нүүлгэх ажил эхэлнэ" гэх хариултыг өгсөн юм.

Тэгвэл тус худалдааны төвийг нүүлгэх асуудалд худалдаа эрхлэгч нар болоод иргэд ямар байр суурьтай байгааг тодруулан хүргэж байна.

-Худалдаа эрхлэгч Чимэгсайхан: Хаашаа нүүлгэсэн ч түгжирнэ шүү дээ-

-Нарантуул худалдааны төвийг нүүлгэх гэж буй талаар сонссон уу?

-Нарантуулыг нүүлгэх гэж байгааг дуулсан. Хотын зах руу нүүлгэх гэж байгаа хэмээн энд худалдаа эрхэлдэг хүмүүс ам уралдан ярьж буй. Миний хувьд энэ шийдвэрийг буруу гэж бодож байна. Биднийг хаашаа яв гэж байгаа юм бол. Өр төлбөр ихтэй, зөвхөн энэ захаас амьдралаа болгодог өчнөөн хүмүүс бий шүү дээ.

-Зах худалдааны төвүүд хотын төвдөө төвлөрсөн байгаа нь түгжрэх шалтгаан болдог хэмээн үзээд буй?

-Хаашаа нүүлгэсэн ч түгжирнэ шүү дээ. Хурдны зам байгуулна л гэх юм, ялгаа гарахгүй л гэж харагдаж байна.

-Худалдаа эрхлэгч Эрдэнээ: Одоогоор шинэ зах барина гэж л ярихаас биш түр хугацаанд биднийг хаана ажлаа эрхлэх талаар ам нээсэнгүй-

Би энэ худалдааны төвийг анх нээгдсэн цагаас хойш л ажиллаж буй. Хорь гаруй жил энд худалдаа эрхэлж байна. Үе үеийн хотын дарга нар нүүлгэх тухай ярьж л байдаг. Энэ удаад хурдны зам тавих гэж байгаатай холбоотойгоор манай худалдааны төвийг хотын захад байгуулна гэх сураг дуулсан.

Нүүх шийд нэг мөр гарлаа гэж бодоход очих газар нь тодорхой байх нь чухал. Одоогоор шинэ зах барина гэж л ярихаас биш түр хугацаанд биднийг хаана ажлаа эрхлэх талаар ам нээсэнгүй. Зах нүүлээ гээд түгжрэл буурах нь юу л бол. Түгжрэл дан ганц зах, худалдааны төвлөрлөөс шалтгаалаагүй байх.

-Худалдаа эрхлэгч: Нарантуулд ирж үзээгүй хүмүүс л дээр гарчхаад "шийдвэр, шийдэл" яриад байна-

Нарантуул худалдааны төвөөс амь зуудаг хүмүүс ямар олон гээч. Гэтэл гэнэт нүүлгэнэ гэх. Очих газар нь ч тодорхойгүй, түгжрэлийн шалтгаан хэмээн чичлэн хөөж байгаа мэт л санагдаж байна. Анхнаасаа замаа зөв шийдэж чадаагүйгээ хэдэн худалдааны төвтэй холбоотой гэж үзэж байдаг.

Дан ганц худалдаа эрхлэгчдэд чирэгдэл учрахгүй. Хол нүүчихвэл худалдан авагчдад ч гэсэн хүндрэл учрах байх. Энд хүмүүс хэрхэн амьдарч, хэрхэн ажиллаж байгааг хараагүй, Нарантуулд ирж үзээгүй хүмүүс л дээр гарчхаад "шийдвэр, шийдэл" яриад байна.

Нүүлгэлээ гэж бодоход худалдаа эрхлэгчдийн хураалттай барааг хаана хадгалах, энд буй хүмүүс хаана ажлаа үргэлжлүүлэх нь тодорхой бус. Миний хувьд сайн төлөвлөөгүй энэ ажлыг эсэргүүцэж байна.

-Худалдаа эрхлэгч Лхагваа: Худалдааны төвүүдтэй холбоотой түгжрэл үүсээд байгаа нь үнэн шүү дээ. Тиймээс хотынхоо захад гарах нь зөв санагдсан-

Би Нарантуулд худалдаа эрхлээд арав гаруй жил болж буй. Захыг нүүлгэх гэж буй талаар энд амтай болгон л ярьж, эсэргүүцэж байгаагаа илэрхийлж байна. Аргагүй биз, энэ том худалдааны төвөөс амьжиргаагаа залгуулдаг хэр олон хүн байдаг гэж бодно. Хотын зах руу нүүлгэлээ гэж бодоход ажилтайгаа ойр гээд энд гэрээ төвхнүүлчихсэн хүмүүст хэцүү.

Гэхдээ улс эх оронд хэрэгтэй л шийдвэр санагдсан. Худалдааны төвүүдтэй холбоотой түгжрэл үүсээд байгаа нь үнэн шүү дээ. Тиймээс хотынхоо захад гарах нь зөв санагдсан.

-Иргэн Лхагваа: Зах худалдааны төвүүд хотын төвд байршиж буй нь түгжрэлийг үүсгэж буй гол шалтгаан мөн-

Зах худалдааны төвүүд хотын төвд байршиж буй нь түгжрэлийг үүсгэж буй гол шалтгаан гэдэг нь үнэн. Ажиглаад байхад Нийслэлийн ард иргэдээс гадна 21 аймгаас хотыг зорьж буй иргэдийн хөл ер тасардаггүй шүү дээ.

Гэхдээ үе үеийн хотын дарга нарын ярьдаг л сэдэв. Ажил хэрэг болгох гэж байгаа бол сайн төлөвлөөд, хэн хэндээ чирэгдэл, хохиролгүй л шийдээсэй гэж иргэний зүгээс харж байна.

-Иргэн Цэцгээ: Хотын түгжрэлийн дийлэнх нь Нарантуулын дөрвөн замаас эхлэлтэй гэдэгтэй санал нийлнэ-

Захуудыг хотын төвөөс гаргах шийдвэрийг зөв гэж харж байна. Төвдөө төвлөрөөд түгжрэлийн гол шалтгаан болохгүйгээр хотын захад байрлах нь зөв. Монгол орон минь уудам шүү дээ. Мөн унаа тэрэггүй хүн үгүй болсон энэ цагт шаардлагатай үедээ цаг гаргаад худалдааны төв рүүгээ очоод хэрэгцээтэй бараагаа авахад буруудахгүй л байх.

Би Эрдэнэт хотын иргэн. Хамаатны айлууд Нарантуултай ойр байдаг тул ирэх бүрдээ Нарантуулын түгжрэлд олон цагийг өнгөрөөдөг. Хотын түгжрэлийн дийлэнх нь Нарантуулын дөрвөн замаас эхлэлтэй гэдэгтэй санал нийлнэ.

-Иргэн: Төсөв зарцуулаад дахиад нэг түгжрэлийн эх үүсвэр байгуулчхаж болохгүй. Тиймээс хаашаа нүүлгэхээ сайн судлаасай-

Нарантуул худалдааны төвөөс гарах хөдөлгөөн түгжрэл үүсгэж байгаатай санал нийлнэ. Гэхдээ хаа газаргүй л түгжрэл ихтэй байгаа энэ цагт төсөв зарцуулаад дахиад нэг түгжрэлийн эх үүсвэр байгуулчхаж болохгүй. Тиймээс хаашаа нүүлгэвэл түгжрэл гэх том асуудлыг шийдэж чадах талаар сайн судлаасай хэмээн бодож байна.

-Зах худалдааны төвийг нүүлгэх ажил санаачилж байсан хотын захирагчид-

Хотын даргын энэхүү шийдвэр нь анх удаа яригдаж байгаа асуудал биш.

• Зах худалдааны төвүүдийг нүүлгэх ажил 2007 оноос хойш яригдаж эхэлсэн бөгөөд тухайн үеийн нийслэлийн захирагчаар ажиллаж байсан Ц.Батбаяраас энэ санал гарсан байдаг.
• Харин 2016 онд нийслэлийн засаг дарга асан С.Батболд "Хот баруун тийш тэлнэ. Зах, худалдааны төвийг түгжрэл сааруулах зорилгоор нүүлгэнэ. "Нарантуул", "Да" хүрээ зэрэг захуудыг ажиллаж байх хугацаандаа нэн тэргүүнд нүүлгэн шилжүүлнэ" гэж байв.
• 2018 онд хотын дарга асан С.Амарсайхан барилгын зах болон бусад томоохон худалдааны төвийг нүүлгэх шийдвэр гаргасан байдаг. Үүний хүрээнд захуудыг нүүлгэх ажлын хэсэг хүртэл байгуулагдсан. Хэдий ажлын хэсэг байгуултлаа ахицтай явж байсан ч урьдын адил ажил зогссон.
• 2022 онд Д.Сумъяабазар нийслэлийн захирагч байх үедээ хотын баруун зах буюу Сонгинохайрхан дүүрэгт 28 га газар төлөвлөж захуудыг байршуулна хэмээж байсан.
• Харин өдгөө хотын дарга Х.Нямбаатар энэ асуудал дээр ам нээж эхэллээ. Тэрбээр төлөвлөгөөгөө танилцуулах үедээ "Мягмар гарагт Нарантуул захын ойролцоо ямар ч түгжрэлгүй болдог. Тэгэхээр худалдаа эрхлэгчдэд санал тавьж хурдны замын дагуу хоёр худалдааны төвийг байгуулна. Дэлхийн жишигт хурдны замынхаа орц, гарц дээр томоохон худалдааны төвүүд байдаг. Манайх шиг айлуудынхаа суурьшлын бүсэд байрлалтай улс бараг л байхгүй. Нарантуул худалдааны төв 21 аймгийн хүнсний болон ахуйн бараа, малын эм хэрэгслийн бөөний төв болчхоод байгаа учраас Туулын хурдны замынхаа баруун хэсэгт буюу Туул голын хойд хэсэгт Нарантуул захыг шилжүүлнэ. Харин одоогийн газар дээр нь орон сууц барих зориулалтыг нь өөрчилж өгье гэдэг уулзалт, хэлэлцээрийг хийнэ. Тэгэхээр Улаанбаатар хот баруун талдаа нэг авто худалдааны төвтэй, зүүн талдаа нэг худалдааны төвтэй болно. Ирэх гурван жилийн хугацаанд замаа барьж дуусгах учраас энэ хугацаанд Нарантуул захыг байгуулах шаардлагатай" хэмээлээ.

Худалдаа эрхлэгчдийн зүгээс "нүүхгүй, хаана очиж хэрхэн үйл ажиллагаагаа үргэлжлүүлэх нь тодорхойгүй байна" гэх байр суурийг илэрхийлсэн бол иргэд "түгжрэлийн гол шалтгаан болсон Нарантуулыг хотын захад гаргах нь зөв" гэх байр суурийг илэрхийлж байна. Тэгвэл 2007 оноос хойш хотыг захирч буй дарга нарын ярьсан ч амжаагүй эл нүүлгэлт энэ удаад ажил хэрэг болж чадах эсэхийг харах л үлдлээ.

Энэ мэдээнд өгөх таны үнэлгээ

Хуваалцаарай Жиргээрэй