Монголын Буддын шашны төлөөлөгчид анх удаа Ватиканд айлчилж Ромын Паптай уулзалт хийжээ
Ромын Пап лам Франциск Монголын Буддистуудын төлөөлөлтэй уулзаж, шашин шүтлэгийн эрх чөлөө, Католик сүмийн ойн жил, Ватикан болон зүүн Азийн улс хоорондын “тогтвортой харилцаа”-ны талаар ярилцлаа гэж Vacitan news агентлаг мэдээллээ.
Уулзалтаар Ромын пап Франциск 1990-ээд оноос хойш Монголд өрнөсөн “шашны гүн гүнзгий шинэчлэл”-ийг өндрөөр үнэлж буйгаа илэрхийлжээ.
Тодруулбал, Ромын Пап лам Франциск даваа гарагт /2025.02.24/ Монголын Буддистуудын төлөөлөлтэй уулзахдаа “Монгол Улс 1921 оноос 1980-аад оны сүүл хүртэл ЗХУ-тай нягт холбоотой нэг намын тогтолцоотой байсан бөгөөд шашин шүтлэгийг хүчирхийлэн хэлмэгдүүлсэн. Буддизм энэ үед хэлмэгдүүлэлтийн гол бай байсан. Гэсэн ч монголчууд уламжлалт оюун санааны зан үйлийг сэргээж, улс орны хөгжилд тусгаснаараа “шашны баялаг өв”-өө сэргээж чадсан” хэмээн онцолсон байна.
Ватиканд анх удаа Монголын Буддын шашны төлөөлөгчид болон Ромын Пап лам нарын хооронд болж буй энэхүү уулзалт нь “онцгой ач холбогдолтой” бөгөөд Гэгээнтэн ба "Монголын эрхэм ард түмэн" хоорондын найрсаг, тогтвортой харилцааг илэрхийлсэн гэж Ромын Пап лам хэлжээ.
Ингээд уулзалтын үеэр Ромын Пап лам Францискын хэлсэн үгийг хүргэж байна.
Эрхэм найз нөхөд,
Та бүхэнд, Улаанбаатар хотын Гандантэгчинлэн хийдийн хамба лам Д.Жавзандорж, Улаанбаатар хотын Төлөөлөгч, Эрхэм дээд Кардинал Жоржио Маренго нарын хамтаар мэндчилж байгаадаа туйлын их баяртай байна. Таны Ватикан улсад хийсэн анхны айлчлал Монголын эрхэм ард түмний найрсаг, бат бөх харилцааг илэрхийлж байгаагаараа онцгой ач холбогдолтой юм. Мөн энэ нь миний бие 2023 онд Монгол Улсад айлчилсантай салшгүй холбоотой.
Би та бүхнийг “Бидний шашны хамтын эрэл хайгуулын нэрийн өмнөөс та бүхэнд ах дүүсийн хувиар” мэндчилж байна.
Танай улс 1990-ээд оноос хойш шашин шүтлэгт гүн гүнзгий шинэчлэлт хийсэн бөгөөд үүнд таны хичээл зүтгэл, оруулсан хувь нэмрийг сайшааж байна. Уламжлалт оюун санааны зан үйлийг сэргээж, улс орныхоо хөгжил дэвшилд тусгаснаар Монгол улс ардчилсан шилжилтийг амжилттай хэрэгжүүлэхийн төлөө тууштай зүтгэж байгаагаа харуулж, шашны баялаг өв соёлоо сэргээж чадсан. Түүнчлэн, шашин шүтлэгийн эрх чөлөө, янз бүрийн шашны бүлгүүдийн хоорондын яриа хэлэлцээг тууштай баримталж байгаа нь бүх уламжлалыг харилцан хүндэтгэх орон зайг бий болгож, зөвхөн материаллаг хөгжил цэцэглэлт төдийгүй ахан дүүсийн эв нэгдлийн чухал үнэт зүйлсээр баяжсан нийгмийг төлөвшүүлж байна. Эдгээр үнэт зүйлсийг сурталчлахад шашин нь шударга, эв нэгдэлтэй нийгмийг бий болгоход чухал үүрэг гүйцэтгэдэг.
Таны хувийн айлчлал энэ ойн жилийн эхэнд болж байна. Христийн шашны уламжлалд энэ бол мөргөлийн цаг, эвлэрэл, итгэл найдвар юм. Байгалийн гамшиг, хүн төрөлхтний мөргөлдөөн ихтэй энэ цаг үед энэ ариун жил биднийг ард түмэн, нийтлэг гэр оронтойгоо эв найрамдалтай, энх тайван дэлхийг цогцлоох хамтын зорилгод уриалж байна. Энх тайвны төлөөх бүх нийтийн хүсэл эрмэлзэл нь бид бүгдийг тодорхой арга хэмжээ авахыг уриалж байна. Тодруулбал, шашны удирдагчдын хувьд бид өөрсдийн сургаалаас үндэслэсэн тул хүн төрөлхтнийг хүчирхийллээс татгалзаж, энх тайвны соёлыг төлөвшүүлэхэд түлхэц өгөх үүрэгтэй.
Таны Ромд өнгөрүүлсэн цаг хугацаа таатай, баялаг болж, Шашин хоорондын яриа хэлэлцээний дикастертай хийсэн уулзалт яриа хэлцэл, ахан дүүс, шашны эрх чөлөө, шударга ёс, нийгмийн эв найрамдал дээр суурилсан нийгмийг дэмжих хамтын ажиллагааг гүнзгийрүүлэх боломж болно гэдэгт итгэлтэй байна. Та бүхний энх тайван, сайн сайхны төлөө эдгээр зарчмуудыг тууштай баримталж, Монгол дахь Католик сүмтэй харилцаагаа бэхжүүлэхийг уриалж байна.
Танд болон Монголын Буддын шашны сүм хийдүүдийг төлөөлж буй бүх хүмүүст би залбирч, сайн сайхны ерөөлийг өргөн дэвшүүлье. Та амлалтдаа тууштай байж, энэрэн нигүүлсэхүйд идэвхтэй, итгэл найдвардаа баяр баясгалантай байх болтугай. Баярлалаа.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.