Жагсаалаас тэрбумтнууд төрдөг болсон гэх Б.Энхбаярын үг хэр ортой вэ

Өчигдөр /2025.04.22/ Хууль зүйн байнгын хороо хуралдах үеэр

УИХ-ын гишүүн Б.Энхбаяр: Хаашдаа манайхан чинь иргэн О, Т гээд мэддэг болчихсон шүү дээ. Нөгөө төлбөртэй жагсагчид. Ер нь эд нараас татвар авъя. Хуучин бол төрөөс төрсөн тэрбумтан гээд ярьдаг байсан. Одоо жагсаалаас тэрбумтнууд төрдөг болчихсон байна. Тэрийгээ ил тод хэлдэг.

Хүмүүс мэддэг болчихсон. Сүүлд бүр Хууль зүйн яаман дээр оччихсон жагсчихсан явж байсан уу яасан. Тэр нөхдүүдээс татвар авъя. ХОМ бөглүүлье. Бид нар болохоор ХОМ бөглөөд яваад байдаг. Нөхөр болохоор ард түмний нэр бариад тэрбумтан болчихсон суугаад байдаг хэмээсэн.

Түүний эл яриа ортой байх үндэслэл бий. Тодруулбал манай улсад органик буюу иргэд өөрийн дураар нэгдсэн жагсаал цөөн болдог гэж хэлж болно. Гурван жилийн өмнө болсон "Ажлаа хий" жагсаалыг хамгийн сүүлд болсон органик жагсаалаар нэрлэж болно. Бусад томоохон жагсаал, цуглаан бүгд асуудал дагуулж нийтийн үзэл санаа, нийгмийн олонхын байр суурь дээр үндэслэгдээгүй буюу төлбөртэйгөөр зохион байгуулагдсан хэмээгдэж буй. Жагсаалыг төлбөртэйгөөр зохион байгуулахын цаана олонхын бус эрх мэдэл албан тушаалтай хэсэг бүлэг хүний ашиг сонирхол хөндөгдсөн, улс төрийн зорилго нуугдсан, эрх баригчид болоод сөрөг хүчний нөлөөгөөр хөдөлсөн зэрэг олон шалтгаан бий.

Ихэвчлэн энгийн иргэд эсвэл тэмцэгч нэртэй хүмүүсийг дүр болгон сонгож цөөнхийн эрх ашгийн төлөө дуугаргадаг энэ үзэгдэл нийгэмд байдаг л зүйл мэтээр хоногшиж байгаа нь асуудал энэ хэмжээнд яригдах хүртэл толгойны өвчин болж буйг илэрхийлнэ. Үүнийг дагаад мөнгөний төлөө чанга дуугарч, талбай дээр суулт өлсгөлөн зарлаж, энгийн иргэн, тэмцэгч мэт жүжиглэх хүмүүсийн тоо олширсоор байгаа нь үнэн. Тэдний ханш тодорхойгүй ч эрэлт их байгааг ойр ойрхон болж буй үйл явдлуудын араас бид бэлхнээ харж, анзаарч болохоор байна.

Д.УЛСАА

Энэ мэдээнд өгөх таны үнэлгээ

Хуваалцаарай Жиргээрэй