Ч.Хүрэлбаатар: Тэтгэврийн зээл тэглэлт Сангийн яамтай ямар ч хамаагүй

Сангийн сайд Ч.Хүрэлбаатар сэтгүүлчдийн асуултад хариулт өглөө.

-Монгол Улс саарал жагсаалтаас гарахын тулд ямар арга хэмжээ авч, хэрэгжүүлж байгаа вэ?

-Монгол Улс мөнгө угаах, терроризмтай холбоотойгоор саарал жагсаалтад орсон. Сараал жагсаалтад орсноос дөрвөн сар тутамд бид тайлангаа тавих үүрэгтэй. Нэгдүгээр сарын дундуур Бээжин хотод очиж өөрийн хийсэн ажлаа тайлагнасан. Нийт зургаан зөвлөмж өгснөөс гурвыг нь хамгаалж, гурав дээр нь нэмж ажиллах шаардлагатай байгаа.

-Ямар гурван зөвлөмж дээр нэмж ажиллах шаардлагатай гэсэн бэ?

-Мөнгө угаахтай холбоотой “гэмт хэргийг шийдэх” тал ажиллах шаардлагатай. Ийм хэрэг цагдаа, прокурорын байгууллага дээр алга болдог, шийдэгддэггүй, зүйл анги нь өөрчлөгддөг талаар анхаарах юм. Хоёрдугаарт хяналт шалгалт дээр нэмж ажиллах шаардлагатай гэсэн бол гуравдугаарт, үй олноор хөнөөх зэвсэглэлтэй холбоотой санхүүжилтийг нэмж шийдвэрлэх зүйл байна гэж үзсэн.

-Саарал жагсаалтаас гарахын тулд долоон хуульд өөрчлөлт оруулна гэж байсан. Энэ асуудлаар Х.Нямбаатар гишүүн мэдээлж байсан?

-Х.Нямбаатар гишүүн үнэн л ярьсан. УИХ-ын гишүүн Х.Нямбаатарын оруулж ирсэн “Мөнгө угаах гэмт хэрэгтэй тэмцэх, мөрдөх арга замууд”-тай холбоотой хоёр хуулийн төсөл унасан. Төвөгтэй байдалд оруулж байгаа юм. Монгол улс Саарал жагсаалтад удаан байх нь иргэд, ААН-үүдэд ашигтай биш. Энэ тал дээр бид бүгд хичээх ёстой. Эдийн засагт үзүүлэх сөрөг нөлөөг нь хэрхэн багасгах вэ гэдэг дээр ажиллаж байна.

-Ирэх сараас тэтгэврийн зээлтэй ахмадууд тэтгэврээ бүрэн авах уу?

-УИХ-ын дарга Г.Занданшатар, Монголбанкны Ерөнхийлөгч Б.Лхагвасүрэн нараас асуу. Энэ асуудал Сангийн яаманд хамаагүй. Төсөвт огт хамаагүй.

Энэ мэдээнд өгөх таны үнэлгээ

Хуваалцаарай Жиргээрэй