2.6 тэрбумын өртөгтэй “Мангасын ам”-ны БОЛОВСРОНГУЙ хувилбар

Их Эзэн Чингис хааны үнэнч анд Хөлөг жанжин Боорчийн өлгий нутаг Хэнтий аймгийн Батноров суманд “Андлалын өргөө” цогцолбор сүндэрлэээд байна. Энэ талаар Хэнтий аймгийн Засаг дарга н.Ганбямба саяхан өөрийн твиттер хуудаснаа жиргэсэн байдаг.

Гэтэл сүүлийн хоёр өдөр тус өргөөтэй холбоотой сайн муу сэтгэгдлүүд цахим орчинд хөврөв. Өөрөөр хэлбэл бүтээн байгуулалт нүдээ оносон эсэх нь олон хүнд эргэлзээ төрүүлж буй. Зарим нь "манай Мангасын амны арай боловсронгуй хувилбар болжээ" хэмээн дажинтайхан шогложээ.

-Л.ОЮУН-ЭРДЭНЭ: “АНДЛАЛЫН ӨРГӨӨГ” ХАРЛУУЛБАЛ, МОНГОЛ УЛСЫН ҮНДЭСНИЙ АЮУЛГҮЙ БАЙДАЛТАЙ ХОЛБООТОЙ-

Харин бүтээн байгуулж, сүндэрлүүлсэн цогцолборыг нь муу хэлсэн хүмүүст ЗГХЭГ-ын дарга Л.Оюун-Эрдэнэ их л “ширүүн” хариулт өгч харагдана лээ. Өөрийн санаачилсан зүйлийг муулбал ҮАБ-ийн хэмжээний асуудал хэмээж “адрав”.

Тэрээр “Өнгөрсөн нэг жилийн хугацаанд энэ төслийг зогсоох зориудаар сатааруулах зорилготой хүмүүс байдаг юм байна гэдгийг харлаа. Хэрэв ийм байдлаар гацаавал цаашид хэвлэлийн бага хурал хийж зарлана. Том хааны төслөө нэг гишүүн, нэг сайдын нэрд хамаатуулж авторлаад жижиг сэтгэж болохгүй шүү дээ. Түүхэндээ хөрөнгө оруулалт хийчихье гэхэд яагаад заавал болохгүй талаас нь яриад байгаа юм бэ. Энэ бол ҮАБ, Монгол Улсын тусгаар тогтнолтой холбоотой асуудал. Энэ нэг гурван үсэгтэй компанийн гар хөл, утсан хүүхэлдэй болсон хэдэн хүмүүс аятайхан байгаарай. Монголд төр гэж бий. Компани төрийн дээр гарч байсан түүх байхгүй” хэмээсэн юм.

-2.6 ТЭРБУМ ТӨГРӨГИЙН ӨРТӨГ БҮХИЙ “АНДЛАЛЫН ӨРГӨӨ” -НИЙ ТОГ ЦАХИЛГААН ТАТАХ 600 САЯЫГ ЭНЭ ЖИЛ УЛСЫН ТӨСӨВТ СУУЛГАЖЭЭ-

2.6 тэрбум төгрөгийн өртөгтэй уг төслийг санаачлагч нь Засгийн газрын Хэрэг эрхлэх газрын дарга Л.Оюун-Эрдэнэ юм.

Уг цогцолборын санхүүгийн асуудал ихээхэн анхаарал татдаг. Үндсэндээ Ерөнхий сайд У.Хүрэлсүх, ЗГХЭГ-ын дарга Л.Оюун-Эрдэнэ нар хүч хавсарч байгаад маш өндөр хэмжээний төсвийг улсын төсвөөс гаргаж чадсан.

Шавийг тавьж байхад, бүтээн байгуулалтад нийт 2 тэрбум төгрөгийн санхүүжилт шаардлагатай гэж яригдаж байгаад улсын төсөвт 1.4 тэрбум төгрөг амжилттай суулгасан.

Тэгвэл цогцолборыг сүндэрлүүлэх мөнгө хөрөнгө ямартай ч улсын төсвөөс буюу татвар төлөгч бидний халааснаас гараад дуусч. Улсын комисс нь ч барилгыг саадгүйгээр хүлээн аваад байгаа аж. Улмаар сонгуулийн дараа буюу ирэх ЕСДҮГЭЭР сард нээлтээ хийхээр төлөвлөгдсөн байна.

Харин ирэх жил 600 сая төгрөг тусгуулахаар ажиллаж байгаа. Эл мөнгөөр цахилгаан татуулах асуудлаа шийдвэрлэх ажээ.

Тэгээд ерөнхийдөө анд барилцахыг хүссэн хүн бүр эл цогцолборт очиж баталгаажуулах нь.

-н.ТАЙВАНЖАРГАЛ: АНД БОЛОЛЦОХЫГ ХҮССЭН ХҮН БҮР ЭЛ ӨРГӨӨНД ИРЖ ЁС ЗАНШИЛ ҮЙЛДЭЖ БОЛНО-

Бид Хэнтий аймгийн Батноров сумын Засаг дарга н.Тайванжаргалтай холбогдож хэдэн асуултад хариулт авсан юм.

-Танай сумын нутагт “Андлалын өргөө” сүндэрлэжээ. Хэдий хэр хугацаанд баригдаж дуусав. Барилгын ажил бүрэн дууссан уу?

-Энэхүү цогцолбор нь 18 метр өндөртэй, Чингис хаан, Боорчи нарын дүрслэл бүхий хөшөө цогцолбор. Барилгын ажил дууссан. Өнгөрөгч хавар эхэлж байлаа. Ерөнхийдөө жил гаруй хугацаанд дуусчихав уу даа. Одоо үүдний довжоо, цахилгаан татах зэрэг жижиг сажиг засварууд л үлдээд байгаа.

-Түүхэн талаасаа анд нөхөр бололцох зориулалт бүхий бүтээн байгуулалт гэж ойлгож болох уу?

-Газар газрын сайн эрс андын тангараг өргөж байх утга учир бүхий байгууламж юм. Ерөнхийдөө андын тангараг барилдах зан үйлүүд хийгдэнэ.

Энэ мэдээнд өгөх таны үнэлгээ

Хуваалцаарай Жиргээрэй