ИНЕГ-ын даргыг түр орлон гүйцэтгэгчээр Б.Алтанцомыг томилжээ

Өчигдрийн Засгийн газрын хуралдаанаар ИНЕГ-ын дарга Л.Бямбасүрэнг ажлаас чөлөөлсөн.

Тэгвэл түүний оронд тус байгууллагын даргын түр орлон гүйцэтгэгчээр дэд дарга болох Б.Алтанцомыг томилжээ.

Б.Алтанцом нь нислэгийн хөдөлгөөний удирдлагын инженер мэргэжилтэй. 1984 онд ИАТУЕГ-т Хөдөлгөөний диспетчерээр ажлын гараагаа эхэлснээс хойш иргэний нисэхийн салбарт тасралтгүй 32 дахь жилдээ ажиллаж байгаа аж.

Тэрээр 1984-1988 онд ИАТУГ-ын Хөдөлгөөн штурманы хэлтэст хөдөлгөөний диспетчер, 1988-1993 онд “МИАТ” нэгтгэлийн харьяа Агаарын хөдөлгөөн удирдах алба, Нислэгийн хөдөлгөөний хэлтэст нислэгийн ахлах удирдагч, байцаагч, инженер, 1993-1994 онд Нислэгийн хөдөлгөөн удирдах үндэсний төв/НХУҮТ/-ийн Тэргүүн дэд захирал, 1994-1996 онд ИАТУГ-ын Мэргэжлийн бодлогын хэлтэст мэргэжилтэн, 1996-1997 онд НХУҮТ-ийн Ерөнхий менежер, захирлаар ажиллаж байв. Мөн 1997-2000 онд “МИАТ” ХК-ийн Япон дахь төлөөлөгчийн газрын Ерөнхий төлөөлөгч, аэропорт менежер, 2000-2003 онд “МИАТ” ХК-д мэргэжилтэн, хэлтсийн дарга, 2003-2006 онд “МИАТ” ХК-ийн БНСУ дахь Ерөнхий төлөөлөгч, борлуулалтын менежер, 2006-2008 онд БНХАУ-ын Бээжин хотноо Азийг хариуцсан бүсийн захирал, 2008-2013 онд ИНЕГ-ын Аэронавигацийн үйлчилгээ хариуцсан дэд даргаар ажиллаж байжээ.

Энэ мэдээнд өгөх таны үнэлгээ

Хуваалцаарай Жиргээрэй