Төрийн наадам тавтиргүй аваргын тоглоом биш

Ардын хувьсгалын 100, 101 жилийн ойд дархан аварга А.Сүхбат, Г.Өсөхбаяр нар барилдахаар бүртгүүлснээс хойш “Хэн нь хэнийхээ өмнө эрэмбэлэхдэх бол” гэсэн хүлээлт олны дунд байв. Үүний сацуу “Би манлайлна, өмнө нь эрэмбэлэгдэнэ” гээд дахин марган, наадам үймүүлж, түмэн олныг бухимдуулах вий гэсэн болгоомжлол байлаа. МҮБХ үүнээс болгоомжилж, Г.Өсөхбаяр А.Сүхбатын өмнө эрэмбэлэгдэнэ гэж зарласан.

Тэд ийн жигүүр магнайлахын төлөө маргах болсон нь ийм учиртай.

Ц.Элбэгдорж Ерөнхийлөгч байхдаа зарлиг гарган, тэдэнд дархан аварга цол нөхөж олгосон, 2014 онд. Тэр жилийн наадмын өмнө Г.Өсөхбаяр аваргыг эхэнд эрэмбэлж, зүүн жигүүрийг манлайлуулсан. Гэтэл А.Сүхбат үүнийг хүлээн зөвшөөрөөгүй. “Би зүүнийг манлайлна. Би өмнө чинь эрэмбэлэгдэнэ” гээд бөөн маргаан дэгдээж, наадамчин олныг бухимдуулсан. Удтал маргалдсаны эцэст Г.Өсөхбаяр аварга буулт хийгээд “Төрөө, наадамчин олноо хүндэллээ” гэсэн.  

Улмаар А.Сүхбат зүүн жигүүрийн манлайлан, гурвын даваанд цолоо дуудуулсныхаа дараа Г.Өсөхбаярыг амлан авч, шуугиан тарьсан. Дараа нь А.Сүхбат барилдалгүйгээр шууд элэг, бүсээ тайлж өгсөн. Монгол наадмын түүхэнд дархан аварга цолтой бөх гурвын даваанд дархан аваргаа амласан тохиолдол үүнээс өөр үгүй.

Энэ нэг талаар хоёр бөхийн хоорондын асуудал мэт боловч төрт ёсны баяр цэнгэл наадмыг үймүүлсэн, наадамчин олныг бухимдуулсан үйлдэл байлаа. 2008 онд зодог тайлж буйгаа дуулиантайгаар зарлан, цолны найраа, допингтой тэмцэж буй илэрхийлсэн А.Сүхбат түүнээс хойш барилдаагүй.

Өнөө жил хоёр аварга хамтдаа барилдах нь хэмээн наадамчин олон баярлаж байлаа. Дархан аварга Б.Бат-Эрдэнэ зүүн жигүүрийг магнайлсан тул А.Сүхбат аварга баруун жигүүрийг магнайлна гээд нэлээд маргалдав. Удтал маргалдсаны эцэст наадамд барилдахгүй гээд зүлэг ногоон дэвжээнээс адис аваад явлаа. МҮБХ аваргуудын эрэмбийг гаргасан тул Г.Өсөхбаяр барууныг магнайлна гэдгийг А.Сүхбат мэдэхийн дээдээр мэдэж байсан.

Гэтэл мэдсээр байж бүртгүүлээд, нэгийн давааны өмнө дахин маргаан дэгдээж, наадамчин олныг бухимдууллаа. Дархан аварга төр, түмний наадмаа, наадамчин олноо хүндэлсэнгүй. Одоо А.Сүхбат залуу бөх биш. “Барилдана, барилдахгүй” гээд хүссэн үедээ айлгаж, тунирхдаг тоглоом нь төрийн наадам биш.

Энэ мэдээнд өгөх таны үнэлгээ

Хуваалцаарай Жиргээрэй