З.Дашдаваа: Н.Удаанжаргалыг хөөцөлдөж байна, АНУ-тай харилцан туслалцах гэрээ байгуулах хүлээлттэй

Т.Бадамжунайг "Чингис хаан" ОУНисэх буудалд газардсан дор АТГ-аас саатуулаад байна. Түүнийг хилээр нууцаар гарснаас нь хойш ийн таван жилийн дараа Монголд авчирч байгаа юм. Т.Бадамжунайг Филиппинд байхад нь, тус улсын иммигрейшний байгууллагатай хамтран ажилласны хүрээнд пасспортыг нь хүчингүй болгож, дансыг нь царцааснаар ийн баривчлан авчирчээ. Энэ талаар АТГ-ын дарга З.Дашдаваа мэдээлэл өглөө.

-Т.Бадамжунайг ямар хэрэгт холбогдуулан шалгаж байгаа юм бэ?

-Эрүүгийн хуулийн тусгай ангийн 22-р бүлэгт заасан авлигын бүлэг хэргийн дагуу Т.Бадамжунайг шалгасан.

-Хэзээнээс?

-Урьд нь хэрэг бүртгэлийн хэрэг нээн шалгаж байсан. Сая яллагдагчаар татаж, мөрдөн шалгах ажиллагааг эхлүүлээд байна. Энэ хүн шалгагдаагүй гараад явсан. Шалгагдаж эхлэхээсээ өмнө гарсан, шалгагдаж байхдаа гарсан гэж оргон зайлсан хүмүүсийг хоёр ангилдаг.

-Одоо прокурорт ямар санал хүргүүлэх вэ?

-Процессын ажиллагаа хуулийн дагуу явагдана, шүүх хэлэлцэнэ. Гадаадад оргон зайлсан иргэдээ буцааж авах чиглэлд бид ажилласаар байна. Бид эрх зүйн харилцан туслалцах гэрээг 20 гаруй оронтой байгуулсан. Ийм гэрээтэй орнуудаас шууд шилжүүлэн авах боломжтой. Авлигын эсрэг конвенцын хүрээнд мэдээлэл солилцох л боломжтой.

-Энэ оргон зайлсан этгээдийг эх оронд нь авчирч буй АТГ-ын анхны тохиолдол уу?

-Бараг анхных байх. УИХ-аас авлигатай тэмцэх хууль тогтоомжийг сайжруулна гэж байгаа. Энэ ажиллагаанд хуулийн байгууллагаас гадна иргэд, олон нийт ч дэмжлэг үзүүлж байгаа нь сайшаалтай. Оргон зайлсан хүмүүст анхааруулга, сэрэмжлүүлэг хүргүүлж буй. Бичиг баримт хүчингүй болох нь, банк санхүүгийн үйл ажиллагааг царцаах нь гэж. Зарим нь эргэж ирэхээ илэрхийлж байгаа. Энэ бол авлигатай тэмцэх ажилд олон нийт хийгээд төр засгийн идэвх санаачилга нөлөөлж байна.

-Дараагийн ажиллагаа хэн рүү чиглэх вэ?

-20 гаруй нэр гаргачхаад ажиллаж байна. Их, бага гэхгүй тодорхой хэргүүдээ шийдээд явна гэсэн хүлээлттэй байна. Шүүх ч тэгж ажиллах байх.

-Ер нь ийм процесс саадтай, олон жил үргэлжилж байгаа дүр зураг бий?

-Олон жил өрнөнө л дөө. Гэм буруутай эсэхийг зөвхөн шүүх шийдвэрлэнэ. Тодорхой хэмжээгээр хэрэгт сэрдэж хүнийг шалгана. Шалгаж байгаа үед оргон зайлсан нь шүүхээр хэргээ шийдүүлэхээс зугтах санаархал байдгийнх байх.

-Т.Бадамжунайг 2018 онд хилээр гарахад нь шалгаж эхлээгүй байсан гэсэн үг үү?

-2018 онд шалгаж эхлээгүй байсан.

-Түүнийг хил гарахаас өмнө оффистоо авлига авсан баримт олдсон гэдэг?

-Энэ бол мөрдөн шалгах ажиллагааны нууцтай холбоотой мэдээлэл.

-"Тавантолгой төмөр зам"-ын захирал Н.Удаанжаргалыг авчрах чиглэлд ажиллаж байгаа юу?

-Хөөцөлдөж байгаа. Үр дүн гарах байх. Болохгүй, бүтэхгүй асуудалгүй гэж ойлгож байгаа.

-АНУ-тай манай улс эрх зүйн харилцан туслалцах гэрээгүй. Ерөнхий сайд асан Ч.Сайханбилэг тэнд байгаа шүү дээ?

-Гэрээг ЗГ-ын хэмжэнд байгнуулна, гэрээтэй улсынхаа тоог өргөжүүлнэ гэсэн хүлээлттэй байна.

Г.САНСАРМАА

Өөрийн сэтгэгдлээ илэрхийл

Share Tweet