Үндэслэлгүй хөрөнгөжсөн байж болзошгүй хэмээн Гаалийн 11 байцаагч АТГ-д шалгагдаж байна

Нэр бүхий 13 гаалийн Улсын байцаагч нарыг хууль бусаар хөрөнгөжсөн байж болзошгүй гэх мэдээлэл олон нийтийн сүлжээ, хэвлэл мэдээллийн байгууллагуудаар мэдээлээд буй. Энэ асуудлаар Гаалийн Ерөнхий Газрын Хуулийн хэлтсийн дарга Ч.Тамираа мэдээлэл өглөө.

-Үндэслэлгүй хөрөнгөжсөн хэмээн нэрлэгдээд буй ажилчид АТГ-д шалгагдаж байгаа гэсэн. Энэ талаар мэдээлэл өгөхгүй юу?

-2024 оны 11 сарын 14-нөөс эхлүүлэн хэвлэл мэдээлэл болон сошиал сүлжээгээр нэр бүхий 13 ажилтан, үүний дотор албаны дарга, Гаалийн Улсын ахлах байцаагч, Гаалийн Улсын байцаагч нарын зурагтай, их хэмжээний хөрөнгө орлоготой байна, хууль ёсны орлого мөн үү, цаана нь хууль бус хөрөнгө орлого байгаа юм биш биз гэсэн хэвлэлийн хардах эрхийн хүрээнд мэдээлэл гарсан байсан. Энэ мэдээллийг гарсан цагаас нь хойш Гаалийн байгууллага хүлээн авч зохих хэмжээний ажлуудыг хийгээд байна. Энэ тухай товч мэдээлэл хүргэе

Нийт гаалийн ажилчид, Улсын байцаагчид тус оны хоёрдугаар сарын 14-ний дотор тухайн жилийнхээ олсон орлого, хөрөнгийн байдлаа хуулийн дагуу АТГ-д мэдүүлж, шалгуулдаг. Энэ хөрөнгө орлогын мэдүүлэгт оролцдоггүй нэг ч гаалийн Улсын байцаагч байхгүй. 

Үндэслэлгүй баяжсан байж болзошгүй хэмээн мэдээлэл гаргасан хэвлэлийн байгууллагуудад манай Гаалийн ерөнхий газраас хүндэтгэлтэй хандаж байгаа. Иймд Авлигын эсрэг хуулийн 6.2-д заасны дагуу АТГ-д тус мэдээллийг шалгуулахаар хандсан

Тодруулбал нэр дурдагдсан 13 ажилтны хөрөнгө орлогыг хууль ёсоор олсон уу, эзэмшсэн үү, хөрөнгө орлогоо хуулийн дагуу АТГ-д шалгуулж байсан эсэхийг Гаалийн ерөнхий газраас АТГ-д шалгуулахаар хүсэлт өгсөн. Одоогоор АТГ дээр хөрөнгө орлоготой холбоотой шалгалтууд хийгдэж байна. 

-Гаалийн Улсын байцаагч өөрийн цалин орлогоор тэрбумтан болох боломжтой эсэх нь иргэд, олон нийтийн дунд эргэлзээ, хардлагыг төрүүлээд буй?

-Гаалийн улсын байцаагчийн тусгайлсан цалин гэж байхгүй. Төрийн тусгай албан хаагчдын цалингийн шатлалаар явдаг. Цалингийн шатлалыг Засгийн газар тогтоолоороо баталдаг. Цалин нь ажилласан жилээс нь хамаардаг. Дөнгөж шинээр орсон гаалийн улсын байцаагч 1.4 сая төгрөгийн цалинтай. Энэ мэдээлэл бол нийтэд ил байдаг. 

Хэрэв хилийн боомтод ажиллаж байгаа тохиолдолд ээлжийн амралтаа авахаас бусад үед хил дээр тасралтгүй ажилладаг учраас хилийн нэмэгдэл авдаг юм. Мөн зэрэг дэвийн нэмэгдэл авна. Үр дүнтэй, зөрчил илрүүлээд сайн ажилласан тохиолдолд үр дүнгийн урамшуулал авдаг. Энэ бол шинээр ажилд орсон хүний цалин юм. Цаашлаад ажилласан жилээс хамаарч нэмэгдэл бодогдоно. Тухайлбал би ГЕГ-ийн хэлтсийн дарга, одоогоор 22 жил ажиллаж байна. Миний үндсэн цалин хоёр сая төгрөг. Үүн дээр сая дурдсан нэмэгдлүүдийг авдаг гэсэн үг.

-Тус алба хаагчдын хувьд хэдэн жил, ямар ажил үүргийг гүйцэтгэж байсан юм бол?

-Хэвлэлийн байгууллага болон иргэдийн зүгээс үндэслэлгүй баяжсан гэх мэдээлэл яваад буй. Энэ нь дан ганц үндсэн цалин болон бусад нэмэгдлийг тооцсон дүн биш. Тухайн хүмүүсийн гэр бүлийн гишүүдийн орлого үүн дээр нэмэгдэх нь тусдаа асуудал. Гэхдээ тухайн орлого бүгд хууль ёсных байх ёстой. 

Энд нэр дурдагдсан ажилтнуудын 3-25 жилийн туршлагатай байцаагчид. Гаалийн тухай хуулиар гаалийн улсын байцаагч томилогдсон газраа хоёр жил ажилладаг. Хоёр жилийн дараа бусад гаалийн газар, хилийн боомтуудаар сэлгэж ажилладаг гэсэн үг. Нэр дурдагдсан гаалийн улсын байцаагчид бүгд хилийн гаалийн боомт, гүний гаалийн байгууллага, бусад гаалийн бүх газарт дамжиж ажилласан. Зөвхөн нэг газраа урт хугацаанд ажилласан байцаагч байхгүй.

-Тухайн ажилтнуудын байр суурь?

-Одоогоор нэр дурдагдсан хүмүүс “хууль бус орлого олсон зүйлгүй” гэж мэдэгдсэн. Нэр дурдагдсан 13 хүний хоёр нь Гаалийн байгууллагад ажилладаггүй. Нэг нь тэтгэвэртээ гарч, нөгөө нь өөрийн хүсэлтээр ажлаа өгсөн.

Одоогоор Гаалийн Ерөнхий газраас гаалийн улсын ахлах байцаагч Б.Охиноо, Б.Солонго, Б.Төгсбаяр, Т.Дулмаа, Л.Долгормаа, гаалийн улсын байцаагч Ж.Алтанчимэг, Ч.Байгалмаа, Д.Саранцэцэг, Х.Энхтуяа, Д.Цэцэгсүрэн, Ж.Булга нарыг АТГ-т шалгагдаж байна. Шалгалтын ажиллагаа дуусмагц бил эргэн мэдээлэл өгөх боломжтой.

-Өмнө нь гаалийн байцаагчид хууль бусаар хөрөнгөжсөн хэмээн шалгагдаж байсан удаа бий юу?

-Тийм тохиолдол байхгүй.

О.ОНОН

Энэ мэдээнд өгөх таны үнэлгээ

Хуваалцаарай Жиргээрэй