С.Амарсайхан: Намайг чөлөөллөө ч миний үнэт зүйл, үзэл бодлыг хэн ч чөлөөлж чадахгүй

УИХ-ын гишүүн, ХЗДХ-ийн сайд асан С.Амарсайхан нь албан тушаалаасаа огцорсон тухай асуудлаар болон дараагийн ХЗДХ-ийн сайдын албан тушаалд томилогдох Г.Тэмүүлэнгийн тухай (2026.09.21) хэвлэл мэдээлэлд өөрийн байр сууриа илэрхийллээ.

Тэрбээр:

"Хулгай зэлгий, хууль бус асуудал, зохион байгуулалттай, гэмт хэрэгтэй тэмцэхтэй холбоотой мэдээлэл би хийсэн. Хууль бус бусармаг үйл ажиллагаатай эвлэрээгүйнхээ төлөө би нэг битгий хэл 20 удаа ажлаа өгсөн ч надад харамсах зүйл байхгүй. Засгийн газар нь хүртэл дуугарч чадахаа больтол барьцаалагдчихсан байна. Хэдий богино хугацаанд ажилласан ч би хар тамхитай холбоотой асуудал, хууль бус алт олборлолттой холбоотой асуудал, төрийн байгууллага дахь явцуу эрх ашгийн сонирхлоо гүйцэлдүүлдэг бүлэглэлүүд гэх мэт асуудлууд дээр ажилласан.

Намайг өнөөдөр чөлөөлж болно. Гэвч миний үнэт зүйл, үзэл бодлыг хэн ч чөлөөлж чадахгүй.

МУ-д өнөөдөр дотоод аюулгүй байдал хутганы ирэн дээр байна. Гэвч бүх түвшинд нуун дарагдуулж ирсэн. Үндэсний аюулгүй байдалтай холбоотой асуудлаар би цаашид ч шүгэл үлээнэ. Надад дурдаагүй сэдэв, нэр олон бий. Намайг албан тушаалаас хөндийрүүлж болно. Гэхдээ миний олж харсан улс орны аймшигтай хувь заяатай холбоотой асуудал, мэдээлэл, баримт нотолгооноос намайг устгачихдаггүй юм бол намайг хэзээ ч холдуулж чадахгүй. Би ХЗДХ-ийн сайдын ажлыг аваад таван сарын хугацаа болсон. Энэ бол том бүлэглэл, том сүлжээ. Энийг илчлэхэд таван сараар зогсохгүй олон жилийн хугацаа хэрэгтэй."

Тэрбээр ХЗДХ-ийн дараагийн сайдыг томилох асуудал дээр захиж хэлэх захиас байгаа тухайгаа мөн ХЗДХ-ийн сайдад томилогдохоор яригдаж буй УИХ-ын гишүүн Г.Тэмүүлэнг дэмжиж байгаагаа илэрхийлсэн юм.

"Дараагийн сайдад асар их дарамт ирнэ. Маш их хатруу зарчим шаардлагатай. Ажлыг нь хийлгэхгүй байх оролдлого, янз бүрийн нөлөөллүүд гарч ирнэ. Гэр бүл, үр хүүхэд, амь нас, эрүүл мэндээр нь барьцаалах гэж оролдоно. Зугтаж ухарч болохгүй."

Өөрийн сэтгэгдлээ илэрхийл

Share Tweet