72 настай иргэн ₮180 саяыг дахин төлөвлөлтийн компанид залилуулж, айлын хашаанд амьдарч байна

72 настай С.Батсуурь гуайн насаараа амьдарсан хашааны газар төлөвлөлтөд орж, улсад 182 сая төгрөгөөр үнэлж зарсан. Орох орон гэр, өөрт байгаа ганц хөрөнгөө боломжийн мөнгөөр сольчихсон учраас мөнгөө баталгаатай хөрөнгө болгоод авья гэж шийдээд “Шинэ толгойт” дахин төлөвлөлтийн орон сууцны хороолол төслийн туслан гүйцэтгэгч “Ивээл цамхаг” ХХК-д нэг өрөө байр 2 ширхэг, хоёр өрөө байр 1 ширхэгийг захиалж, 100 хувь төлөлт хийж, 180 сая төгрөг өгсөн.

Тухайн үед 2022 оны II улиралд ашиглалтад орно гэсэн. Гэвч үүнээс хойш даруй 3 жил өнгөрч, С.Батсуурийнх, хүүгийнх нь, охиных нь тус тусдаа гэр барьж айлын хашаанд амьдарч байна. “Өвөөгийнх нь нас дийлэх эсэхийг мэдэхгүй ч, өлсгөлөн зарлахад оролцоно. Ганц байсан хөрөнгөө алдчхаад насны эцэст хүний царай харж, зүдэрч явна даа” гээд тэр уйлав.

-Та хүү, хүргэнтэйгээ нийлээд гурван айлын байр захиалсан юм байна. Тухайн үеийн дахин төлөвлөлтийн төсөл учраас итгэлтэй байсан уу?

-Хүүгийнх нэг өрөө байр 44 сая төгрөг, хүргэнийнх нэг өрөө байр 44 сая төгрөг,  өвөө нь өөрөө хоёр өрөө байр захиалж 80 сая төгрөг бэлнээр өгсөн. 2021 онд мөнгө авах үеэрээ 2022 оны хоёрдугаар улиралд ашиглалтад орчихно л гэсэн. Байгаа ганц хөрөнгөө улсдаа зарчихсан хүн чинь мөнгө төгрөгөө алдчихвий гэж хаширлаад төр засгаас хэрэгжүүлж байгаа гэр хорооллыг орон сууцжуулах хөтөлбөр нь илүү найдвартай гэж бодоод энэ компанид мөнгөө өгсөн.  “Стандарт проперти групп” ХХК нь гэр хорооллын дахин төлөвлөлтийн төслийн хүрээнд Сонгинохайрхан дүүргийн 1, 2, 20-р хороонд “Шинэ толгойт” хэрэгжүүлэгчээр албан ёсоор шалгарч, “Ивээл цамхаг” гэж энэ компанийг туслах гүйцэтгэгчээр оруулсан. Тэгээд энэ компани 9 давхар орон сууц дээр 100 хувийн төлөлтөөр захиалга авсан. Төр засгаас явуулж байгаа төсөлд орчихвол найдвартай гээд л мөнгөө өгчихсөн байхгүй юу.

-Гэтэл ...?

-Гэтэл тэрнээс хойш хэчнээн жил өнгөрөв. Анх харуулсан 2 давхар краказ тэр хэвээрээ. Хэчнээн явж, хөөцөлдөв. Хууль мэдэхгүй болохоор ингээд ард түмнийг дээрэмдээд авчихдаг юм байна. Бид нар айлын хашаанд айлын гэрт дөрвөн жил амьдарч байна. Заримдаа ууртай үедээ хөөх юм. Заримдаа  овоо сайхан зантай байх юм. Мөнгө төгрөгөө алдсан хүн бусдыг царайчлаад л явж байна. Монгол хүмүүс байж энэ олон хүнийг хохироочхоод олдохгүй байгаа шүү дээ, эзэд нь.

-Цаашдаа ямар бодол байна?

-Бэлэн мөнгөө өгөөд захиалсан 174 хүн байгаагаас 16 нь суулт хийгээд 5 хонож байна. Цаашдаа өлсгөлөн зарлана. Насаараа хураасан өмч хөрөнгөө хулхидуулаад үр удмаараа гудамжид гарлаа.  Миний төр засаг энэ луйварчдаас мөнгө төгрөгийг минь салгаж авч өгөөч гэж гуймаар байна. Насны эцэст хүн царайчлаад юу юу ч үгүй ингэж явна гэдэг хэцүү юм байна. Томчууд болгон л гэр хорооллыг орон сууцжуулна, дахин төлөвлөнө гэж сайхан ярьсан учир бид итгэсэн шүү дээ. Түүнээс биш мөнгөө бариад бэлэн сайхан байр авчихсан бол өнөөдөр хэдэн хүүхэдтэйгээ аз жаргалтай л амьдарч байх байлаа гээд харамсах юм даа. Ерөөсөө мөнгөө бүгдийг нь өгөөд за удахгүй шинэ байртай болчих юмчинь гээд айлын хашаа, гэрт орцгоосон. Хүн болж төрөөд ганц босгосон хөрөнгөөр минь хэдэн хүн чанаргүй залуус тоглочихлоо. Анхнаасаа мөнгөө бэлнээр авч ирээрэй гээд байсан нь ийм учиртай байж гэж одоо боддог. Хэдэн хүүхдээ орох оронтой болгочхоод сэтгэл тайван нүд анихын тулд өвөө нь мөнгөө олж автлаа энд хэвтэнэ.

Бороо, цас хаялсан хуйсагнасан энэ өдрүүдэд настан нимгэхэн хувцастай суулт хийж байна. Ядрах тул тэр хэсэг хэвтэнэ. Хэн нэгэн асуудлыг нь сонсоход уйлна. Бас төр засаг л миний мөнгийг олж өгч чадна хэмээн залбирах аж.

“Ивээл цамхаг” гэх энэ компани уг төслийг авсан “Стандарт проперти” ХХК-ийн туслан гүйцэтгэгч нь бөгөөд төслийн хүрээнд 9 давхар нэг орон сууц барина гэж 174 хүнээс мөнгө авсан. Үүний 70 хувь нь 100 хувь төлөлт хийжээ. Мэдээж хэрэг бүгд л дахин төлөвлөлтийн төсөл учраас найдвартай хэмээн итгэсэн нь энэ. Гэвч байдал бишдэж ирэхэд захиалагч нар уулзаад асуудлаа ярихад гэрээнүүд нь өөр өөр, дөрвөн өөр хүний дансаар мөнгө авсан, гэрээнээ гүйцэтгэгч талын хүлээх үүрэг, хугацаанаас шалтгаалсан алданги зэргийг тусгаагүй байсан. Мөн хохирогч нарыг өргөдөл гомдлоо нэгтгээд явж байхад тус компани БЗД дээр дахиад сонгон шалгаруулалтад ороод ялчихсан байжээ.

Б.ХАШ-ИЛД

Энэ мэдээнд өгөх таны үнэлгээ

Хуваалцаарай Жиргээрэй