Ц.Даваасүрэн, Д.Өнөрболор нарыг залуусаар сольж чадсангүй

НЭМЭЛТ: 11.30 цаг

БХБ-ын сайд Ц.Даваасүрэн, УИХ-ын гишүүн Д.Өнөрболор нарыг залуусаар сольж чадсангүй. Тодруулбал, заалнаас нэр дэвшүүлсэн хүмүүсийн санал хураалтын тооллого амжилт олсонгүй. Заалнаас нэр дэвшилтүүд бүгд унажээ.

Ингэснээр,

1. Цэрэнпилийн Даваасүрэн Булган, Орхон, Хөвсгөл аймгийн IV тойрогт нэр дэвших хэвээрээ
2. Дамдинсүрэнгийн Өнөрболор Дархан-Уул, Сэлэнгэ, Төв аймгийн V тойрогт нэр дэвших хэвээрээ
3. Өлзийбаярын Золбаяр Говьсүмбэр, Дорноговь, Дундговь, Өмнөговь аймгийн VII тойрогт нэр дэвших хэвээрээ
4. Пүрэвжавын Сайнзориг Сонгинохайрхан дүүргийн XI тойрогт нэр дэвших хэвээрээ
5. Батжаргалын Заяабал Говь-Алтай, Завхан, Увс, Ховдын II тойрогт нэр дэвших хэвээрээ үлдсэн байна.

ЭХЛЭЛ: 08.00 цаг

-Ц.Даваасүрэн, Д.Өнөрболор нарыг залуусаар солих санал хураалт шөнө 03.00 цаг хүрэв-

Удирдах зөвлөлийн хурлаа 14.00 цагт, Бага хурлаа 16.00 цагт товлон зарласан ч, шөнийн 10 цаг хүрч эхэлсэн. Улмаар МАН-ын Бага хурал шөнийн 03.00 цаг хүртэл үргэлжиллээ. 11.40 цагийн үед намын Удирдах зөвлөлөөс оруулж ирсэн 126 нэртэй тогтоолоо санал зөрөх, эсэргүүцэлгүйгээр баталчихсан. Хуулийн хугацаа 00.00 цагаас өмнө дуусгавар болох учиртай.

Харин Удирдах зөвлөлөөс орж ирсэн тогтоолыг баталсны дараа заалнаас нэрээ дэвшүүлэх үйл ажиллагаа явагдаж, шөнийн 03.00 цаг хүртэл сунжрав. Ингэхдээ,

Нэгт, Хөвсгөл, Орхон, Булганы тойрогт нэр дэвшигч БХБ-ын сайд Ц.Даваасүрэнтэй БХБ-ын дэд сайд Э.Золбоо өрсөлдөхөөр заалнаас нэрээ дэвшүүлэв.

Ц.Даваасүрэнгийн Хөвсгөл дэх мандатыг МАН Э.Золбоод өгөх хувилбар эртнээс яригдсан. Намын бодлогоор дэмжигдэхээс гадна ахмад гишүүдээсээ салах чигийг зоригтой баримталсан гэх хэлж болно. Золбоо нь Монгол Улсаас ОХУ-д суугаа элчин сайд Ө.Энхтүвшингийн хүү юм.

Хоёрт, Төв, Сэлэнгэ, Дарханы тойрогт нэр дэвшсэн УИХ-ын гишүүн Д.Өнөрболортой өрсөлдөхөөр сумын Засаг дарга С.Баярмаа заалнаас нэрээ дэвшүүлэв.

Гуравт, Дорноговь, Дундговь, Өмнөговь, Говь-Сүмбэрийн тойрогт нэр дэвшсэн Хэвлэлийн төлөөлөгч бөгөөд Ерөнхийлөгчийн Тамгын газрын Хэвлэл мэдээллийн албаны дарга Ө.Золбаяртай өрсөлдөхөөр Оюунбаатар заалнаас нэрээ дэвшүүлэв.

Говийн аймгуудад МАН-аас Б.Дэлгэрсайхан, АН-аас Ажнай Д.Бат-Эрдэнэ хамгийн хөл сайтай тул Ерөнхийлөгч У.Хүрэлсүх тохирох замаар өөрийн хүмүүсээ тэдэнтэй хөл шилжүүлнэ гэх агуулга анхаарал татаж ирсэн билээ.

Дөрөвт, Хотын орлогч П.Сайнзоригтой өрсөлдөхөөр ШӨХТГ-ын дарга асан С.Мөнхчулуун заалнаас нэрээ дэвшүүлэв.

Тавд, Завхан, Увс, Ховд, Говь-Алтайн II тойрогт нэр дэвшсэн Татварын ерөнхий газрын дарга асан Б.Заяабалтай БОАЖ-ын сайд асан Н.Цэрэнбат заалнаас нэрээ дэвшүүлэв.

Эдгээр нэр дэвшүүлэлтүүдэд санал хураалт явуулаад тооллого хийж, комисс ажиллуулсаар шөнө хагасалсан гэсэн үг. Нэгэнт Бага хурлаар баталсан 126 нэр дэвшигчийн нэртэй тогтоолын хавсралтад УЗ өөрчлөлт оруулах эрхтэй байдаг аж.

Учир нь нам, эвсэл бие даагчид тавдугаар сарын 25-наас өмнө нэр дэвшигчийн баримт бичгийг СЕХ-нд хүргүүлэх хуультай. Харин СЕХ нэр дэвшигчийн баримт бичгийг хүлээн авах хугацаа дууссанаас долоо хоногийн дотор бүртгэх эсэх асуудлыг шийдвэрлэж, тогтоол гаргана. Өөрөөр хэлбэл, зургаадугаар сарын 1-ний дотор нам эвслийн нэр дэвшигчид, бие даагчдыг бүртгэх эсэх асуудлыг шийдвэрлэх юм байна.

Энэ мэдээнд өгөх таны үнэлгээ

Хуваалцаарай Жиргээрэй