Дийлэнх хүүхдүүд үл хайхрах хүчирхийлэлд өртдөг

Сүүлийн жилүүдэд 14 хүртэлх насны хүүхдүүдийн 47 хувь нь ямар нэгэн төрлийн хүчирхийлэлд өртдөг талаар судалгаагаар гарчээ.

Дийлэнх тохиолдолд үл хайхрах хүчирхийлэлд өртдөг талаар судалгаанд онцолжээ. Үл хайхрах хүчирхийлэл нь /Neglect as Violence/ гэж хүүхэд, ахмад настай хүн, хөгжлийн бэрхшээлтэй хүн зэрэг хараат байдалд оршдог хүнийг зориуд эсвэл санаандгүй байдлаар үл хайхарч, тэдэнд шаардлагатай анхаарал, халамжийг үзүүлэхгүй байхыг хэлдэг. Энэ төрлийн хүчирхийлэл нь тухайн хүний бие махбод, сэтгэл санаа, нийгмийн харилцаанд ноцтой хохирол учруулдаг юм.

Үл хайхрах хүчирхийллийн төрөл

1. Физик үл хайхрах байдал:
   • Хоол хүнс, хувцас, орон байр зэрэг суурь хэрэгцээг хангахгүй байх.
   • Эрүүл мэндийн үйлчилгээ авах боломжийг хязгаарлах эсвэл зугтаах.
2. Сэтгэл санааны үл хайхрах байдал:
   • Хайр халамж, харилцааг орхих.
   • Сэтгэл санааны дэмжлэггүй үлдээх.
3. Боловсролын үл хайхрах байдал:
   • Хүүхдийг сургуулиас завсардуулах эсвэл сурч боловсрох боломжийг хязгаарлах.
4. Хөгжлийн түвшинд үл хайхрах байдал:
   • Хүүхдийн хөгжилд шаардлагатай орчинг бүрдүүлээгүй байх.
   • Хүүхдийн авьяас чадварыг хөгжүүлэх боломжийг хаах.
5. Эдийн засгийн үл хайхрах байдал:
   • Ахмад настай болон хөгжлийн бэрхшээлтэй хүний санхүүгийн хэрэгцээг үл хангах.
   • Тэдний өмч хөрөнгийг буруугаар ашиглах.

Дээрх хүчирхийллүүдээс гарах үр дагавар нь тухайн хохирогчийн бие махбод, сэтгэл санаа, нийгмийн амьдрал, боловсрол болон ирээдүйн хөгжилд ноцтой нөлөө үзүүлдэг. Энэ үр дагавар нь хохирогчийн нас, нөхцөл байдал, хүчирхийлэл хэр удаан үргэлжилснээс хамааран янз бүр байж болно. Жишээ нь: сэтгэлзүйн хувьд өөртөө итгэлгүй байх, мөн физик болон физиологийн хүрээнд дархлааны дутагдалд орох гэх мэт асуудлууд үүснэ.

Үл хайхрах хүчирхийлэл нь нийгэмд далд байдлаар оршдог ч гүн гүнзгий хор хөнөөл учруулдаг асуудал юм. Үүнийг арилгахын тулд төр, иргэд, гэр бүлийн оролцоо зайлшгүй шаардлагатай. Хамгийн чухал нь бусдын хэрэгцээ, оршихуйд хүндэтгэлтэй хандах, анхаарал тавих нь хүчирхийллээс урьдчилан сэргийлэх гол алхам юм.

Б.НОМТ

Өөрийн сэтгэгдлээ илэрхийл

Share Tweet