Н.Одончимэгт авлига өгсөн хэрэгт холбогдсон “Ванхүү” ХХК-ийн барьсан эмнэлгийн агуулах ашиглалтад оров

Сүхбаатар дүүргийн “Сэлбэ” нэгдсэн эмнэлэгт дүүргийн төсвийн хөрөнгө оруулалтаар 10х8 метр хэмжээтэй хүчилтөрөгчийн агуулах барьж, ашиглалтад орууллаа. Тус агуулахад хийн хуваарилагч буюу манифолд төхөөрөмжөөр нийт 72 баллон хүчилтөрөгчийг хийн хоолойн системээр эмнэлэгтэй холбож, яаралтай тусламжийн тасаг, эрчимт эмчилгээ болон зайлшгүй шаардлагатай өрөөнүүдэд хүчилтөрөгч нийлүүлэх юм. 

Хүчилтөрөгчийн агуулахын барилгын зураг төслийг “Дукат” ХХК боловсруулж, ерөнхий гүйцэтгэгчээр “Ванхүү” ХХК ажиллаж, нийслэлийн Хөрөнгө оруулалтын газар захиалагчийн техникийн хяналтыг гүйцэтгэсэн байна.

Эргэн сануулахад, Өнгөрөгч арван сард Нийслэлийн Сүхбаатар дүүргийн ЗДТГ-ын даргын үүргийг түр орлон гүйцэтгэгч Н.Одончимэг авилга албан тушаалаа урвуулан ашигласан хэргээр үйлдэл дээрээ АТГ-т баригдсан.

Холбогдсон хэргийг тодруулбал, нэгдсэн эмнэлгийн барилгын ажлын тендертэй холбоотой 55 сая төгрөгийн авлига авч байгаад үйлдэл дээрээ баригдсан гэх мэдээлэл цацагдаад байгаа юм. Түүний гэрээс 400 сая төгрөг хурааж, 48 цаг саатуулсан талаар хуулийн байгууллага мэдээлсэн. Прокуророос түүнийг үргэлжлүүлэн нэг сарын хугацаатайгаар цагдан хорих таслан сэргийлэх арга хэмжээ авхуулах саналаа өчигдөр нийслэлийн Сүхбаатар дүүргийн Эрүүгийн хэргийн анхан шатны шүүхэд хүргүүлж байсан.

Улмаар Н.Одончимэгт авилга өгсөн хэмээн Ванхүү ХХК"-ийн гүйцэтгэх захирал Б.Боролзойхүү, Зөвлөх инженер Ч.Ганчөдөр" нар шалгагдаж байсан түүхтэй.

Дараа нь хахууль өгсөн гэх "Ванхүү" ХХК-ийн удирдлагуудыг цагдан хорихоос татгалзаж, Н.Одончимэгийг нэг сар цагдан хорихоор болсон ч зургаан хоног цагдан хориод 2024 оны 10 дугаар сарын 22-ны өдөр суллаж байсан билээ.

Улмаар хэрэг хянан шийдвэрлэгдэж дуусах хүртэл Н.Одончимэгт хилийн хориг тогтоож мөрдөн шалгах ажиллагааг үргэлжлүүлж буй.

О.ОНОН

Энэ мэдээнд өгөх таны үнэлгээ

Хуваалцаарай Жиргээрэй