УИХ дахь Ардчилсан намын бүлгийн 41 гишүүн өнөөдөр (2026.10.12) хуралдаж, бүлгийн даргаа нууц санал хураалтаар сонголоо. Бүлгийн даргад УИХ-ын гишүүн Б.Түвшин, Х.Тэмүүжин нар нэр дэвшсэнээс Б.Түвшин 24 хүний саналаар сонгогдов.
УИХ-ын гишүүн Б.Түвшинг өнөөгийн Ерөнхийлөгчийн "захиалгаар" АН-ын бүлгийн даргад нэр дэвшүүлсэн гэдэг яриа гарсан бол нөгөө талд бие даасан намын статусаа бэхжүүлэхийн тулд О.Цогтгэрэл Х.Тэмүүжинд бүлгээ шилжүүлэх сонирхол байсан гэдэг. Б.Түвшин гишүүн Хан-Уул дүүргээс ҮБХ-д нэр дэвшин сонгогдож, ирэх оны сонгуульд нэр дэвших эрхээ халаасалсан билээ.
Харин энэ талаар АН-ын дарга О.Цогтгэрэл өнөөдөр сэтгүүлчдэд мэдээлэл өгөхдөө “АН-ын зүгээс Засгийн газрыг огцруулах улс төрийн шаардлагаа тавиад явна. УИХ дахь АН-ын бүлгийн даргаар шинээр сонгогдох хүнтэйгээ хамтраад энэ асуудлаа үргэлжлүүлэн тавина. Б.Түвшин, Х.Тэмүүжин нарын хэн нь ч сонгогдсон УИХ дахь АН-ын бүлгийг удирдаад аваад явчих боломжтой нэр дэвшигчид гэж харж байгаа. Намайг Бүлгийн даргын ажлаа өгөхийг дотроосоо шахаж шаардсан зүйл байхгүй” хэмээв.
Түүнчлэн тэрбээр АН-ын Үндэсний бодлогын хороонд ТЕСО группийн ажилтнууд олноор байдаг гэдгийг үгүйсгээд ҮБХ-ны гишүүдийн тоог өргөтгөх шаардлагатайг онцоллоо. “Зөвхөн Үндэсний бодлогын хорооны гишүүн УИХ-д нэр дэвшинэ” гэдэг заалт намайг дарга болохоос өмнө АН-ын дүрэмд оруулсан байсан. Бид өөрсдийгөө чөдөрлөсөн дүрмийн энэ заалтыг өөрчлөх хэрэгтэй. Бодоод үз дээ, 126 гишүүнтэй парламентад ҮБХ-ны 300 хүнээс л сонгож нэр дэвшүүлнэ гэдэг байж болохгүй. Тиймээс ҮБХ-ны гишүүдийн тоог нэмж өргөтгөх шаардлагатай гэж би үздэг. Намын их хурлаараа дүрмийн энэ том өөрчлөлтийг хийх ёстой” гэсэн юм.
Г.САНСАР
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.
Daisogiinhan hovdiin buzar guilagchinguud