Дорнод аймгийн засаг дарга Ш.Ёл: Нөмрөгийн дархан цаазат газрын 80 хувийг шатаасан байна
Дорнод аймгийн Халхгол суманд байрлах Нөмрөгийн дархан цаазат газарт энэ сарын 8-ны өдөр дэгдсэн түймрийг цурамд оруулсан байна. Одоогоор түймэр бүрэн унтраагүй байгаа бөгөөд урьдчилсан байдлаар дархан цаазат газрын 80 хувь нь шатжээ.
Энэ тухай Дорнод аймгийн засаг дарга Ш.Ёл "Хэний зөвшөөрлөөр дархан цаазат газарт нэвтэрснийг нь хуулийн хүрээнд шалгаж, тогтоо. Дархан цаазат газрын 80 хувийг шатаасан, тэнд нэг ч ан амьтангүй боллоо. Хохирлын хэмжээг яаралтай нарийвчлан тогтоож, хуулийн дагуу шалга" хэмээн холбогдох албаны хүмүүст үүрэг өгөв.
Түймэр гарсан тус өдөр Мобиком корпорацын захирлууд тэргүүтэй таван машин хүн цэнгэг усны тул загас барихаар Хил хамгаалах ерөнхий газрын харьяа Хилийн цэргийн 0198-р ангийн захирагч, хурандаа н.Гантөгсийн зөвшөөрлөөр дархан цаазат газарт нэвтэрчээ. Улмаар Мобиком Корпорацийн Япон захирлын "Nissan Patrol-Y62" маркийн 60-11 ... улсын дугаартай машин дархан цаазат газарт зорчих үед доод хэсэгт нь өвс их хэмжээгээр орооцолдож шатсаны улмаас гал түймэр гарсан байна.
Б.САНАА
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.