Л.Оюун-Эрдэнэ: Санхүү, хууль, уул уурхайгаар мэргэшсэн хүн “Оюу толгой” ХХК-ийн ТУЗ-д орно

ЗГХЭГ-ын дарга Л.Оюун-Эрдэнэ мэдээлэл хийлээ.

Тэрээр, “Өнгөрсөн хугацаанд “Оюутолгой” компанийн манай ТУЗ бусад компанийн ТУЗ-тай харьцуулахад мэргэжлийн ур чадвар хангалттай бус байна гэж дүгнэхээс аргагүй байдалд хүрсэн. Энэ бол хувь хүмүүсийн асуудал бус улсын эрх ашиг. Тийм учир шалгуурыг адилхан өндөр болгосон. Гүний уурхайтай холбоотой мэргэжлийн хүн, төсөл удирдсан хүн байж Монгол улсыг төлөөлнө. Хоёрдугаарт, олон улсын банк санхүүгийн мэргэжлийн хүн байх ёстой. Олон улсын мэргэшсэн эрхзүйч хүн байх зайлшгүй байх хэрэгтэй.

Засгийн газрын хуралдаанд шалгуур үзүүлэлтийг оруулж ирж, сайдуудын саналыг авч батлах хурал боллоо. Олон улсын нийтлэг жишгээр ажлын байрны тодорхойлолтыг авна. Нэг жилийн хугацаатай байна. Ажлын хэсэг гарсан байгаа. Одоо байгаа ТУЗ-ийн гишүүдээс ч гэсэн шалгалт авч тэнцэх, тэнцэхгүйг харна гэж ойлгож болно. Англи хэлний шалгалт бас авна. Сонгон шалгаруулалтыг нээлттэй явах уу, яах вэ гэдгийг ярилцаж байна. Дэлхийн том корпорацтай дэлхийн дүрмээр л ажиллах ёстой.

Санхүү, хууль, уул уурхайн чиглэлээр мэргэшсэн хүмүүс л “Оюу толгой” ХХК-ийн ТУЗ-д  Монголын талыг төлөөлнө. Бид зөвхөн “Рио Тинто” гэдэг компанитай хамтран ажиллах бус, бусад хувьцаа эзэмшигчтэй ижил тэгш харьцах ёстой. Энэ бол бидний барьж байгаа стратегийн нэг зорилт гэж хэлж болно. Монголын талын ногдол ашгийг хэрхэн наашлуулах вэ гэдэг дээр арга зам эрэлхийлж байна.

Маш олон баримтаар баталгаажсан маргаан гарвал Арбитрын шүүх дээр очно. Иймд бид хэлцэл хийхээс өөр гарцгүй. Ингэхийн тулд бид санхүүгийн удирдлагын менежментийн зардал, гаалийн татвар зэрэг нарийн асуудал руу орно” гэлээ.

Энэ мэдээнд өгөх таны үнэлгээ

Хуваалцаарай Жиргээрэй