СТАТИСТИК: Монгол шиг хүн амынхаа 5 хувьд л вакцин захиалсан нь Африкийн орнууд байна

Блумберг агентлаг дэлхийн улс орнуудын вакцин захиалалт, вакцинжуулалтын процессоор дата мэдээлэл үүсгэж байгаа юм. Шинэчлэгдсэн мэдээллээр 10.8 сая тун вакцин дэлхий даяар хийгдээд байна. Үүний 3.5 сая нь АНУ-ын иргэдэд хийгджээ.

Вакцинтай холбоотой асуудлаар улс орнууд хоёр ангилагдаж буй.

Нэгдүгээрт, ДЭМБ-ыг хүлээлгүй аль нэг вакцины үр дүнд нь шууд итгэж захиалан, хүн амаа вакцинжуулж эхэлсэн улсууд.

Үүнд:

1. БНХАУ - 4,500,000 тун
2. АНУ -  3,489,090 тун
3. Израил - 950,000    тун
4. Их Британи  - 947,206 тун
5. ОХУ - 440,000 тун  
6. ХБНГУ - 165,575 тун
7. Канад - 98,769 тун 
8. Бахрайн - 59,351 тун
9. Польш - 36,300 тун
10. Итали - 34,901 тун
11. Дани - 29,483 тун
12. Португали - 26,850 тун
13. Мексик - 24,998 тун
14. Словени - 9,750 тун
15. Чили - 8,638 тун
16. Хорват - 7,864 тун
17. Оман - 6,516 тун
18. Австри - 6,000 тун
19. Унгар - 5,110 тун
20. Болгар - 4,739 тун
21. Румын - 2,778 тун
22. Кувэйт - 2,500 тун
23. Литва - 2,270 тун
24. Финланд - 1,767 тун
25. Грек - 1,763 тун
26. Луксембург - 1,200 тун
27. Эстони - 884 тун
28. Aргентин - 700 тун  вакцин хийснээрээ бичигдэж байна.

Хоёрдугаарт, ДЭМБ-аас ямар нэг вакциныг батламжлахыг хүлээж буй орнууд. Тэдний олонх нь ДЭМБ-ын КОВАКС хөтөлбөрт нэгдэн орсон бөгөөд, уг тусламжийн шугамаар вакцины эхний тунгуудаа авах хүлээлттэй байгаа.

Энд Монгол Улс багтаж байна. Арванхоёрдугаар сарын 31-нд ДЭМБ Pfizer/Biotech компанийн хамтарсан вакциныг баталснаа зарласан. Үүгээр КОВАКС хөтөлбөр хэрэгжиж эхлэх учиртай юм. Иймд нэгдүгээр сарын 5-нд ДЭМБ хуралдаж, вакциныг улс орнуудад ямар хүртээмжтэй хуваарилах талаар хэлэлцэнэ.

Харин үүнээс өмнө дэлхийн бараг бүх улс орнууд вакцины урьдчилсан захиалгаа хийчхээд байгаа билээ. Тэдний хүн амынхаа хэдэн хувийг вакцинжуулах хэмжээний тунг урьдчилан захиалсан байгаагаар Блумберг агентлаг мөн инфографик гаргасан байгаа юм.

Үүнийг харвал Монгол Улс хүн амынхаа 5 хувийг вакцинжуулах буюу 165 мянган тун вакциныг л захиалсан байна. Энэ нь гэхдээ улсаа төлөөлөн бие дааж хийсэн биш, КОВАКС хөтөлбөрийн хүрээнд хийсэн захиалга юм. Бид үүнийг өмнө нь мэдээлсэн.

Тэгвэл ихэнх орнууд хүн амынхаа 100 хувьд хүрэх тунг захиалсан нь эндээс харагдаж байна. Канад улс 300 хувь буюу хүн амаа гурван удаа вакцинжуулахад хүрэлцэхүйц тун захиалснаараа нэгдүгээрт бичигдэж байна. Цаашлаад Гаити, Кондурас, Тайланд гэхчлэн орнууд хамгийн багадаа хүн амынхаа 10 хувьд ноогдох тунг захиалжээ.

Харин Монгол Улстай ижил 5 хувийн вакцин захиалсан зөвхөн Африкийн улсууд байгаа нь үүнээс харагдаж байгаа юм. Үүнд:

• Ангол
• Бутан
• Камбож
• Молдав
• Морокко
• Мозамбек
• Өмнөд Судан
• Тунис
• Өмнөд Африк
• Нигер зэрэг буурай хөгжилтэй 94 улс нэрлэгдэж байна.

Харин уг статистикийг ашиглан Visual Capitalist сайт дараах инфографикийг бэлтгэжээ.

Энд улс орнууд ямар нэг олон улсын хөтөлбөр хүлээлгүй, шууд хийсэн вакцины захиалгууд харагдаж байна. Зүүн эгнээнд вакцины нэр, үйлдвэр байгаа бол баруун талд улс орнууд жагсжээ. Үүнд Монгол Улс байхгүй. Учир нь эхнээсээ дөрөвт бичигдэж буй КОВАКС хөтөлбөрт нэгдэн орсон. Өөрөөр хэлбэл КОВАКС-ын захиалсан 700 сая тунгаас бялуу хүртэхээр хүлээж буй гэсэн үг.

ДҮГНЭЛТ: Вакцинжуулалт эхлүүлсэн орнууд нэг талаар сайшаалтай ч нөгөө талаар олон улсын байгууллагаас батлаагүй, эрсдэлтэй үйлдэл хийж буй сул талтай. Дэлхийн түүхэнд нэг жилийн дотор вакцин гаргасан ийм удаа байхгүй бөгөөд ер бусын хурдан хийгдсэн гэдгээрээ коронавирусийн вакцин хардлага төрүүлсэн хэвээр буй.

Харин нөгөө талаар ДЭМБ аль нэг вакцин батламжлахыг хүлээсэн ч ихэнх орнууд урдьдчилсан захиалгаа хийчихсэн байна. Манай улс маш бага хүн амтайн хувьд үүнд өндөр тунгаар орох боломж байсан. Гэвч Африкийн буурай хөгжилтэй орнуудын жагсаалтад ингэж нэгдэж, зөвхөн КОВАКС-ын далбаан дор 5 хувийн квотод оржээ.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй