УИХ-ын чуулганы баасан гарагийн /2023.06.23/ нэгдсэн хуралдаан эхэллээ. Хуралдааны эхэнд “Авлигатай тэмцэх үндэсний хөтөлбөр батлах тухай” Улсын Их Хурлын тогтоолын төсөл /Засгийн газар 2023.06.16-ны өдөр өргөн мэдүүлсэн, хэлэлцэх эсэх/-ийг хэлэлцэж эхлэв.
Хууль санаачлагчийн мэдээллийг ХЗДХ-ийн сайд Х.Нямбаатар танилцуулав.
Тэрбээр "2016 онд УИХ-аас 51-р тогтоолоор баталсан Авлигтай тэмцэх үндэсний хөтөлбөрийн хэрэгжих хугацаа 2023 онд дуусч байгаа бөгөөд уг хөтөлбөрийн хэрэгжилтийн үр дагаврыг хэлэлцэхэд дунджаар 75 хувьтай гарсан байна. Ийнхүү Монгол Улсын авлигтай тэмцэх ажилд ахиц гарч байгаа бөгөөд ялын бодлогыг чангаруулж, хэрэгжилтийг сайжруулах, шүүх прокурор хууль сахиулах байгууллагын бие даасан хараат бус байдлыг бэхжүүлэх, төсөв санхүүгийн ил тод байдал зэрэг үргэлжүүлэн сайжруулах шаардлагатай байна.
Авлигын төсөөллийн дүнгээр 180 орноос:
- 2017 онд 103
- 2018 онд 93
- 2019 онд 106
- 2020 онд 111
- 2021 онд 110
- 2022 онд 116 байрт эрэмбэлэгдсэн байна.
Төсөөллийн индекс нь манай улсад өгч буй төсвийн байгууллагын үнэлгээ бөгөөд Авлигатай тэмцэх үндэсний хөтөлбөрийг хэрэгжүүлснээр ахиц гарах ач холбогдолтой.
Улстөрд нөлөө бүхий этгээд эрх мэдлээ урвуулан ашиглаж, бусдад давуу байдал олгох нь даамжирч, иргэдийн боломжийг хязгаарлан, эдийн засаг, нийгэм, боловсрол зэрэг бүхий л салбарт тэгш бус байдал үүсгээд байна.
Хөтөлбөрийн төсөлд нийт 10 зорилго, 46 зорилт туссан бөгөөд үүнийг хэрэгжүүлэхэд 203 үйл ажиллагааг тусгалаа" гэлээ.
Үрэглжлүүлэн Байнгын хорооны хуралдаанаар хэлэлцсэн санал дүгнэлтийг АБГББХ-ны дарга Б.Энх-Амгалан гишүүн танилцуулав.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.