МИАТ-ийн түрээсэлж буй онгоцны үйлчлэгч "Англи хэлтнүүд урагш суу" гэж суудал өөрчлөн, дотоодын зорчигчдыг дорд үзжээ

Энэ сарын 14-ний өдөр МИАТ ТӨХК-ийн түрээсэлж буй CRJ-200 маркийн онгоцоор Баян-Өлгий аймгийн Өлгий хот руу ниссэн иргэн гомдолтой буйгаа илэрхийлжээ. Тэрбээр, онгоцны үйлчлэгч нь зорчигчдыг "Англи хэлтэй нь урагшаа суу" гэж хэлээд, тийзэнд бичигдсэн суудлыг өөрчилсөн гэлээ.

МИАТ ТӨХК-иас орон нутгийн нислэгийг нэмэгдүүлэх хүрээнд ӨАБНУ-ын "CEM AIR" компанийн CRJ-200 маркийн онгоцыг түрээслэн ашиглаж байгаа.

Долдугаар сарын 4-нөөс есдүгээр сарын 19 хүртэл,

1.  Ховд аймгийн Ховд хот руу 810-902 мянга төгрөг, 
2.  Баян-Өлгий аймгийн Өлгий хот руу 810-902 мянга төгрөг
3.  Увс аймгийн Улаангом хот руу 800-852 мянган төгрөг
4.  Завхан аймгийн Улиастай хот руу 633-752 мянган төгрөг
5.  Говь-Алтай аймгийн Алтай хот руу 733-852 мянган төгрөг
6.  Хөвсгөл аймгийн Мөрөн хот руу 500-680 мянган төгрөг
7.  Өмнөговь аймгийн Даланзадгад хот руу 500-680 мянган төгрөг 
8.  Дорнод аймгийн Чойбалсан хот руу 537-617 мянган төгрөгөөр хоёр талдаа нисэхээр байгаа юм.

2007 оноос хойш Баян-Өлгий аймаг руу нисээгүй МИАТ ТӨХК энэ сарын 4-ний өдөр тус CRJ-200 онгоцоор нислэг үйлдсэн. 50 хүний суудалтай энэ хөлөг долдугаар сарын 4-нд Өлгий хотод амжилттай газардсанаас хойш тус чиглэлийн нислэг долоо хоногт хоёр удаа тогтмол хийгдэж байна.

Тэгвэл долдугаар сарын 14-ний баасан гарагт үйлдэгдсэн нислэгийн үеэр, онгоцны үйлчлэгч гадаадын иргэн нь "Англи хэлтнүүд урагшаа сууна" гэсэн байна. Уг нь тухайн иргэн а1 буюу хамгийн урд талын суудлын тийз захиалсан байжээ. Онгоцны үйлчлэгчийн хэлсний дагуу зорчигчид суудлаа сольж, монгол иргэд хойш суусан гэдгийг иргэн хэлж байгаа юм.

Олон улсад баримталдаг нислэгийн дүрмээр бол тийзэнд заасан суудлыг сольж болохгүй. Ачаа тээш алдагдахаас эхлээд нислэгийн аюулгүй байдалд ямар нэг эрсдэл учирвал, зорчигчдыг тийзэн дэх суудлыг дугаараар нь тулгадаг онцлогтой.

Энэ талаар МИАТ ТӨХК-иас тодруулахад "Зорчигчдын суудлыг тэгж дураар сольж болохгүй. Ийм асуудал болсон бол бидэнд албан ёсоор гомдол гаргах учиртай" гэсэн тайлбар өглөө.

Г.САНСАРМАА

Энэ мэдээнд өгөх таны үнэлгээ

Хуваалцаарай Жиргээрэй