Д.Алтантуяа: П.Батчулуун эмч 2 сая төгрөг өгөөд уучлалт гуйсан. Би уучлаагүй, хууль шийдэх байх

“Хууран мэхэлж хүний эд, эрхтнийг авсан” гэмт хэрэгт холбогдуулан П.Батчулуун эмчийг хоёр шатны шүүхээр 2 жил 6 сар хорих ял оноосон. Энэ хэрэгтэй холбогдуулан донор болж хохирсон талийгаачийн ар гэрийнхэн өчигдөр хэвлэлийн бага хурал хийж өөрийн байр сууриа илэрхийлсэн. Иймд бид талийгаач А-гийн ээж Д.Алтантуяатай ярилцлаа.

Хэрэг явдлын эхлэл 2023 оны наймдугаар сарын 5-6-ныг шилжих шөнө болсон. Өдгөө хохирогч донор хэмээгдээд буй А гэх бүсгүй зам тээврийн осолд орж, тархины үхжилттэй хэмээн оношлогдсон учир эмч нарын зүгээс ар гэрийнхэнд нь донор болгох хүсэлтийг тавьсан байдаг.

Улмаар осолд орсон эмэгтэйн ар гэрийн зүгээс элэг, бөөр болон дагалдах судаснуудыг авахыг зөвшөөрсөн гэх боловч шөрмөс, түүний бэхлэгдэх хэсэг буюу толгойн шөрмөсийг тойг яс, шаант ясны бэхдэгдэх хэсгийн хамт, саран жийргэвч шөрмөс semimembronosus шөрмөсийг шаант ясны дээд булуутай хамт, хоёр дунд чөмгөний доод булуу, archillis шөрмөс, peroneus longus шөрмөс, tibialis anterior шөрмөс зэрэг хүний доод мөчдийн эд, хүний эрхтэн болох цөсний хүүдий зэргийг нь аваад ар гэрт нь хүлээлгэн өгсөн. Иймд донорын биеэс зөвшөөрөөгүй эд эрхтнийг авсан хэмээн гомдол гаргаснаар Эрүүл мэндийн яамны Эрүүл мэндийн Хөгжлийн төвийн Эс, эд, эрхтэн шилжүүлэн суулгах үйл ажиллагааг зохицуулах албаны даргаар ажиллаж байсан П.Батчулуун яллагдсан юм.

Охиноо осолд орсныг анх дуулаад ГССҮТ-д очин, хүний ээж л болсон хойно гар хөлийг нь барьж үзсэн. Яг л бидний гар хөлтэй ижил бүлээхэн мэдрэгдэж байсан. Гэтэл тархины үхжилттэй хэмээн оношлогдож эмч нарын зүгээс танай охины бусад эрхтэн хэвийн ажиллагаатай, шинжилгээгээр эрүүл гэж гарсан. Иймээс элэг, хоёр бөөрийг нь донор болгооч хэмээн хүссэн. Өмнө нь донор гэж сонсож байснаас өөр зүйлгүй манай гэр бүлийнхэнд энэ том цохилт болж, эхэндээ зөвшөөрөөгүй.

Хүүхэд минь босоод ирэх юм шиг санагдаад, зөндөө уйлсан, өмөрсөн. Гэсэн ч нэгэнт охин минь найдваргүй юм бол донор хүлээн шаналдаг хүмүүст тус болох сон гэсэндээ гарын үсэг зурахаар шийдсэн. Үүнийг сонссон манай хүүхдүүд дургүйцэж байсан ч "ээж ингэж шийдсэн бол яах вэ" гээд үг дуугүй л гарын үсэг зуруулсан.

Тухайн үед зөвхөн элэг бөөрийг л авна гэж хүссэн. "Өөр зүйл авахгүй биз дээ" гэж лавлан асуухад "Өө нээрээ, тухайн эрхтний ойр хавийн судсыг мөн авах байх шүү" гэсэн. Тэгэхэд нь "Ямар шаардлагатай гэж судас авах гэж байгаа юм" хэмээхэд "эрхтэн шилжүүлэхэд судас гэмтэлтэй байдаг учир авах шаардлагатай" гэж хариулсан л даа.

Гэтэл охиноо оршуулахаар болоход хөлийг нь төмөр утсаар яраад оёчихсон байсан. Яагаад зөвшөөрөөгүй эд эрхтнийг авсан юм бэ гэхэд "элэг, бөөр авахад хөл дагалдах ёстой" гэж хэлсэн. Үүний дараа харин "миний буруу" гээд хоцорсон.

-Та яагаад өчигдөр гарч ирж мэдээлэл хийх болов?

-Миний талийгаач охин болон ар гэрийнхнийг нь олон нийтийн сүлжээгээр буруутан болгож байгаа учраас сэтгэл өвдөөд мэдээлэл хийж байна. Ард иргэдэд энэ хэргийн талаар үнэн зөв мэдээллийг өгөхийг хүссэн юм. Өндөлзөх ч ясгүй болгоод орхисон охины минь арьсыг нь ядаж тайван үлдээгээд өгөөч л гэж гуймаар байна.

Мөн ард нь үлдсэн гурван хүү нь хүнд байна шүү дээ. Цахимд ээжийнх нь талаар бичсэн байхыг уншина, ангийн найзууд нь хэлж, гадуурхах тохиолдол ч байна.

-Донор болгохоор хүлээн зөвшөөрсөн тэр хуудсан дээр ямар ямар эрхтэн авна гэж бичсэн байсныг санаж байна уу?

-Эхний байдлаар элэг, бөөр л авна гэдгээ хэлсэн учраас гарын үсэг зурсан. Одоогоор тухайн цаасан дээр юу юу гэж бичсэн байсныг санахгүй байна. Канондоод гаргачихсан бичгийн цаасан дээр л зураад үлдээсэн. Эргүүлж, тойруулж харах тэнхэл тухайн цаг үед байгаагүй л дээ. Гэхдээ би элэг, бөөрийг л авна гэхийг нь сонссоноо, мөн өөр эрхтэн авна гэдгээ ч тэр эмч нар танилцуулаагүй болохыг сайн санаж байна.

Хэрэв хөлийн судас, шөрмөс болоод бусад эрхтнийг тэгж сэглэхийг нь мэдсэн бол элэг бөөрийг нь өгөхийг ч зөвшөөрөхгүй байсан. Ямар эх хүн хүүхдээ тийм байдалтай хөдөөлүүлэхийг хүсэх юм бэ.

-П.Батчулуун эмч танай гэр бүлээс албан ёсоор уучлалт гуйсан уу?

-Охин минь өнгөрснөөс жил гаруй хугацаа өнгөрсний дараагаар буюу өнгөрсөн оны 11 сард өмгөөлөгчөөр минь дамжуулан "уулзаж, уучлалт гуймаар байна" гэж хэлсэн. Тухайн үед манай өвгөний бие муу, эмчилгээний зардал ч байхгүй, хүнд байсан л даа. Тэгээд юу гэж хэлхийг нь сонсохоор очиход "Миний буруу, уучлалт гуйж байна" гэдгээ хэлээд хувийнхаа зүгээс өгч байна гээд 2 сая төгрөг өгсөн. Түүнийгээ нөхөн төлбөр өгсөн гэж ойлгоод яваад байж магадгүй. Тэр мөнгө миний охиноос авсан эд эрхтэнтэй харьцуулахад мөнгө биш. Мөн үр хүүхдийнхээ эд эрхтний араас мөнгө нэхэмжлээд яваад байна гэх нь ташаа ойлголт.

П.Батчулуун эмчийн биеийн байдал хүнд байгааг би дуулсан. Гэхдээ энэ хэрэг цаашид хэрхэх талаар хууль л шийдэх байх. Миний зүгээс тухайн эмчийг насныхаа эцэст ингэж зовоосой гэж хүсээгүй. Гэсэн ч охины минь эд эрхтнийг гэр бүлээс нь зөвшөөрөлгүйгээр авсанд гомдолтой хэвээр. Уучилж чадахгүй байна.

Ер энэ Монгол улс маань донорын хуулиа эргэж хараасай, гэмгүй хүмүүс, түүний ар гэр, эмч нар гээд хохирогч цаашид нэмэгдэхийг хэн ч таашгүй л болчихлоо.

-Анх осол гаргасан жолоочийг ялласан зүйл бий юу. Тухайн жолоочийн зүгээс танай гэр бүлд нөхөн олговор, оршуулгын зардал олгосон уу?

-Осол гаргасан жолооч ямар нэгэн ял шийтгэл аваагүй. Охин минь гарцгүй газраас зам гарсан гэх тул жолоочийн буруу болоогүй өнгөрсөн. Бид оршуулгын зардалд 28 сая гаруйг зарцуулсан.

Гэтэл тус хэрэг гарснаас хойш гурван сарын дараа буюу 11 сард уг жолооч бидэнтэй нэг удаа холбогдсон. Тухайн үед 10 сая төгрөг өгнө гэж байсан. Яг үнэндээ охиноо алдсан бид мөнгөөр ч яах вэ дээ. 8 сая төгрөг өгөөд дахиж холбоо бариагүй.

Анх охиныг минь алдахад эмнэлэг дээр ирээд "гурван хүүхдийг нь надад өгчих. Би өсгөөд өгье" гэж үрээ алдаад өмөрч суух надад хэлсэн. Тэгэхэд нь би "Чи юу ярин вэ. Эхийг нь дайрч хөнөөчхөөд гурван хүүхдийг нь авъя гэх юм. Эх хүн мөн үү" гээд хэлсэн. Харин одоо тэр насаар нь өсгөөд өгнө гэж том ам гараад байсан хүний сүүдэр нь ч үгүй л байна.

О.ОНОН

Энэ мэдээнд өгөх таны үнэлгээ

Хуваалцаарай Жиргээрэй