Их Британийн ерөнхий сайд өөрчлөгдөж л байдаг харин Ларри муур байсаар л

Их Британийн бас нэг ерөнхий сайд албан тушаалаа хүлээлгэн өгч байгаа ч Даунинг Стритэд амьдардаг Ларри муур хаашаа ч явахгүй.

Тус улсын Ерөнхий сайд Кир Стармер огцорсноор сүүлийн арван жилд Их Британи долоо дахь ерөнхий сайдаа томилох боллоо. Харин энэ хугацаанд 19 настай Ларри Даунинг Стритийн аравдугаар байр дахь хамгийн тогтвортой оршин суугч байсаар ирэв. Даунинг Стритийн аравдугаар аравдугаар байранд Их Британийн ерөнхий сайд амьдардаг.

Анх 2011 онд Даунинг Стритэд ирснээсээ хойш Лаари зургаан ерөнхий сайдын нүүрийг үзлээ. Тодруулбал Дэвид Кэмерон, Тереза Мэй, Борис Жонсон, Лиз Трасс, Риши Сунак нар болон хамгийн сүүлд Стармер Даунинг Стритэд амьдарсан. Одоо Ларри Британийн улс төрийн хамгийн танигдсан дүрүүдийн нэг болсон.

Их Британийн засгийн газрын мэдээллээс харвал Даунинг Стритийн аравдугаар байранд 1735 оноос хойш удирдагчид амьдарч иржээ. Харин 1880-аад оноос эхлэн аравдугаар байр болон төрийн бусад барилгуудад хулганын асуудалтай тэмцэх гэж муур байршуулж эхэлсэн байна.

Ларри муур гэж хэн бэ?

Хүрэн, цагаан өнгийн судалтай Ларриг “Battersea Dogs & Cats Home” амьтан хамгаалах төвөөс үрчлэн авч, 2011 оны хоёрдугаар сарын 11-нд Даунинг Стритэд авчирчээ. Ларри албан ёсоор “хулгана агнуурын ахлах ажилтан” гэсэн цол хүртсэн Даунинг Стритийн анхны оршин суугч муур болсон юм.

Түүний үүрэгт зочдыг угтах, хамгаалалтын байдлыг шалгах аж. Мөн Их Британийн засгийн газрын вэбсайт дээр хошигнон тайлбарласнаар “эртний тавилгуудыг унтахад хэр тохиромжтойг турших” зэрэг багтдаг байна.

Ларрид аравдугаар байрны хулганын асуудлыг шийдэх даалгавар өгсөн ч албаныхны хэлснээр урт хугацааны шийдэл одоогоор “тактикийн төлөвлөлтийн шатанд” явж байгаа аж.

Даунинг Стрийтэд ирэхээсээ өмнө Ларри микрочипгүй, эзэнгүй тэнүүчилж яваад олдож, амьтан хамгаалах байгууллагад хүргэгдсэн юм.

Өнөөдөр тэр Их Британийн улс төрийн бэлгэ тэмдэг болсон гэж хэлж болно. Шүтэн бишрэгчид нь түүний хөдөлгөөнийг цахим орчинд ажигладаг байна. Мөн Ларригийн албан бус Х хаяг 800 мянга гаруй дагагчтай. Тэр Даунинг Стрит дэх томоохон үйл явдлуудын үеэр байнга харагддагаас гадна АНУ-ын Ерөнхийлөгч Доналд Трамп болон тэргүүн хатагтай Меланиа Трамп зэрэг айлчлан ирсэн өндөр албан тушаалтай зочдын хамт гэрэл зурагт орж байсан аж.

Ларри аравдугаар байрны дотор чөлөөтэй явдаг бөгөөд Даунинг Стритийн ажилтнууд түүний хоол хүнс өгч, эмнэлэгт үзүүлдэг. Их Британийн засгийн газар мэдээлснээр түүнийг тэжээх зардлыг татвар төлөгчдийн мөнгөнөөс гаргадаггүй  байна.

Эх сурвалж: USA Today

Өөрийн сэтгэгдлээ илэрхийл

Share Tweet