Махны үнэ хянах дургүй салбар толгойлсон “СААД”

-МАХНЫ ҮНЭД МАНАЙ ЯАМ ХЯНАЛТ ТАВЬЖ “ЧАДАХГҮЙ” БУЮУ САЙДЫН ЭМГЭНЭЛТЭЙ ҮГ-

70 сая толгой мал тоолуулсан МАН-ын үед мах магнаг болж, Ч.Улаан сайдын үед үнэ нь 10 мянга хол давсан гэх хэлц шахуу үг гараад байна.

Уг нь хэдхэн сарын өмнө У.Хүрэлсүх сайд мах, гурилын үнэ тэнгэрт хадвал Ч.Улаан сайд толгойгоороо хариуцаарай гэж хатуухан сануулсан. Гэтэл Ерөнхий сайдынхаа үгийг сайд мартчихсан уу, эсвэл хангамж хариуцсан байхад үнэ өсөх нь маньд хамаагүй гээд орхичихсон уу. Бүү мэд.

Ямартай ч тэрээр баасан гарагийн /2020.01.31/ УИХ-ын нэгдсэн чуулганы хуралдааны үеэр, Махны үнэд манай яам хяналт тавьж чадахгүй. Бид хангамжийг тогтвортой байлгах, нэмэгдүүлэх тал дээр хяналт тавьж ажилладаг. Махны үнэд манай яам хариуцлага хүлээхгүй. Үүнд ШӨХТГ хяналт тавих ёстой” хэмээн хээв нэг ярьж олныг ихэд эгдүүцүүлэв.

Энэ бол салбар хариуцсан сайдын амнаас гарч боломгүй үг. Байж боломгүй алдаа. Гэвч У.Хүрэлсүх сайд толгойг нь илж, дуугүй суусаар байгаа.

Харин одоогоос яг гурван долоо хоногийн өмнө УИХ-ын гишүүн Б.Пүрэвдорж: БНХАУ-ын махны үйлдвэрийн  эздийг дэмжсэн бодлого явуулж Хятад компаниудад мах экспортлох зөвшөөрөл олгосон. Нийтдээ махны квот авсан 12 компанийн ес нь Хятадын компани хэмээн мэдэгдэж, огцруулах хуулийн төслийг  өргөн барьсан юм. Харин ХХААХҮЯ-ны сайд Ч.Улаан “Би огцрохгүй. Надад буруу байхгүй. Хамт шалгуулъя” гэж хэлээд гүрийж гүлдийгээд улайхгүй зогсож харагдсан.

-САЙН ХҮРГЭН АХ ХЭДИЙ Ч, МОНГОЛ ТӨРИЙН СААР СААД-

Улайдаггүй тодотголтой Ч.Улаан сайд зөвхөн энэ удаад махны үнийн асуудлаар ч маапаан тарьж байгаа юм биш л дээ.

Хагас жилийн өмнө хадам дүү болох О.Даваасүрэнгийн “Бээжин интосикэйшн интернэйшнл трейд” ХХК-нд хонь, ямааг амьдаар нь экспортлох давуу эрх олгож, хилээр мал амьдаар нь гаргах зөвшөөрөл өгсөн нь илчлэгдсэн. Үүнийхээ хариуд хэвлэлээр сайн гэгч балбуулж, цуцалж байв.

Мөн сайдын эхнэрийнх бас нэг төрсөн дүү О.Оюун-Эрдэнэ нь ХХААХҮЯ-нд зөвлөх хийдэг. Сайд нь яамандаа ургийн модыг ургуулсан гэгддэг хүн.

Үүнээс харахад хадмуудынхаа аж амьдралд санаа тавьдаг хэрнээ ард түмнийхээ хэрчим маханд санаа тавьж чадахгүйгээ тун ч бардам хэлэх. Ар өврийн хаалгыг эхнэрийнхээ дүү нарт нээж өгдөг сайн хүргэн ах ч, салбар яамныхаа бодлогын түвшинг гэр бүлийн хүрээнээс хэтрүүлж хардаггүй Монгол төрийн саар саад аж.

Харин саяхан Төрийн ордны баячуудад зориулан үзэсгэлэн зохион байгуулаад амжив. Нийтийг хамарсан үйл явдал зохион байгуулахыг хорьчхоод байхад давуу эрхийг тэр эдэлсэн.

Парламентад олон сонгогдсон гишүүн, МАН-ын ахмад зүтгэлтэн, сайдын сэнтийд зургаантаа заларсан хуучин бууны хугархай, нэг иймэрхүү.

Тэрбээр 1992 оноос хойш дөрвөн удаа Сангийн сайд, нэг удаа Шадар сайд, энэ удаа ХХААХҮ-ийн сайдаар ажиллаж байна. 2012 онд Н.Энхбаярыг даган урваж, 2016 онд намдаа эргэн ирж байснаараа урвагч тодотголтой болж байв. Сайдаар зургаан удаа сонгогдсон, ахмад гишүүдийн нэг гэдгээс өөр гялайж гялтайх зүйлгүй.

Товчхондоо бол тодроогүй дүр. Сүүлийн үед саар нэрээр тодрох болоод байгааг нь дурдахад нэг ийм.

Өөрийн сэтгэгдлээ илэрхийл

Share Tweet