Нийгмийн

Зорилтот бүлгийн 1000 малчин өрхөд тусламжийн багц хүргүүлжээ

НҮБ-ын ХХААБ,  ХХААХҮЯ-тай хамтран “Зорилтот бүлгийн малчин өрхийн амьжиргааг зудын эрсдэлээс хамгаалахад дэмжлэг үзүүлэх” техник туслалцааны төслийн хэрэгжүүлж байна.

Энэ хүрээнд зудын эрсдэл ихтэй байгаа Архангай, Баянхонгор, Говь-Алтай, Дундговь, Өвөрхангай, Төв аймгийн  53 сумын зорилтот бүлгийн 1000 малчин өрхөд 405 тонн хорголжин тэжээл, 50 тонн уургаар баялаг рапсын шахдас, 5 тонн амин дэм эрдэсийн нэмэлтүүдийг хүргэх тусламжийн цуваа өнөөдөр орон нутаг руу хөдөллөө.  Энэхүү үйл ажиллагаанд ХХААХҮ-ийн сайд З.Мэндсайхан, ХХААХҮЯ-ны  Төрийн нарийн бичгийн дарга Т.Жамбалцэрэн, Зам, тээврийн хөгжлийн яамны Төрийн нарийн бичгийн дарга С.Батболд НҮБ-ын ХХААБ-ын суурин төлөөлөгч Винод Ахужа болон  холбогдох бусад албаны төлөөлөл оролцлоо.

Өвөлжилт хүндэрсэн 6 аймгийн зорилтот бүлгийн малчид буюу хонин толгойд шилжүүлснээр 300 ба түүнээс цөөн тооны малтай, хөдөлмөрийн насны, өрх толгойлсон, олон хүүхэдтэй, хөгжлийн бэрхшээлтэй гэр бүлийн гишүүнтэй, мал аж ахуйгаас өөр амьжиргааны эх үүсвэргүй, отор нүүдэл хийх бүл, чадал муутай нийгмийн зорилтот бүлгийн  1000 өрхийг сонгон амьжиргааны хөрөнгийг хамгаалах хүмүүнлэгийн яаралтай тусламжийг үзүүлж байгаа юм.  Зам, тээврийн хөгжлийн яамнаас тусламжийн цувааг аян замдаа саадгүй  хүрэхэд мэргэжлийн хяналт, удирдлагаар ханган ажиллахаар болжээ.

Нэг жилийн хугацаанд хэрэгжих техник туслалцааны энэ төслийн хүрээнд  гамшгийн эрсдэлийг бууруулах орон нутгийн нөөц боломжийг олон улсад мөрдөгддөг заавар стандартын дагуу бэхжүүлэх үйл ажиллагаа төлөвлөгдсөн байгаа ажээ.

Монгол улсад хүнсний аюулгүй байдал, хөдөө аж ахуйн хүмүүнлэгийн багийг ахалдаг НҮБ-ын Хүнс, хөдөө аж ахуйн байгууллага  (FAO) нь сүүлийн таван жилд зудад нэрвэгдсэн 21,240 малчин өрхийн амьжиргааг  хамгаалахад 2.4 сая ам.долларын хүмүүнлэгийн яаралтaй тусламжийг олгосон байна.

Энэ мэдээнд таны өгөх үнэлгээ
Like
Love
Haha
Wow
Sad
Angry
Таг

Холбоотой мэдээ

Хариулт үлдээх

АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.

Back to top button