"Эрдэнэ монгол"-оос ИНХ-ын тогтоолыг "Хүчингүй болго" гэж Засаг даргад албан бичиг явуулжээ

Баянхонгороос хамаг малаа орхин давхиад ирсэн 20 гаруй малчин өчигдөр УУХҮЯ-ны гадаа мэдээлэл хийлээ. Дахиад л “Эрдэнэ монгол” компани. Канадын 100 хувийн хөрөнгө оруулалттай, Гүйцэтгэх захирлаар нь Ерөнхийлөгч асан Н.Багабандийн охин Б.Баярмаа ажилладаг, “Баян хөндий” алтны ордод тусгай зөвшөөрөл эзэмшдэг.

Өдгөө малчдыг уул уурхайн эсрэг, газар шорооныхоо төлөө тэмцэхээр мушгиж ойлгодог болсон цаг. “Ээ, тэд орчин үе мэдэхгүй, хөгжил мэдэхгүй” гэж ярина. “Өчнөөн ажлын байр бий болно, сум нутаг нь хөгжинө” гэнэ. “Гадаадын том компани юу гэж л сүйрүүлж, үйрүүлээд тавьчих вэ, нөхөн сэргээлтээ хийнэ шүү дээ” гэцгээнэ. Бас зарим нь “Өрсөлдөгч компаниас нь мөнгө авчхаж” гэж ярина. Гэхдээ хаврын ид мал төллөлтөөр, их ажлын дундуур хотоо, гэрээ хаяад тэд Улаанбаатарт, яамны гадаа, олон арван камер, микрофоны урд цээж төвхөлзүүлэн мэдээлэл хийж байна.

Бид өмнө нь “Эрдэнэ монгол” компанийн хууль зөрчсөн байж болзошгүй хэд хэдэн өнцгүүдийг баримттай мэдээлсэн нь нэгдүгээр сард юм. Харин малчид дахин ирж, УУХҮЯ, БОАЖЯ-нд албан шаардлага хүргүүлсэнтэй холбогдуулан, дахин шинэ мэдээлэл танилцуулж байна.

БАГИЙН ИНХ-ЫН ТОГТООЛЫГ ӨГӨХГҮЙ ДАРЖЭЭ

Хуулиараа, уул уурхайн ашиглалтын тусгай зөвшөөрөл авахын тулд байгаль орчны нарийвчилсан үнэлгээгээ батлуулсан, ирүүлсэн байх ёстой. Харин “Эрдэнэ монгол” компани 2019 онд тусгай зөвшөөрөл авсан мөртлөө 2020 оны байдлаар байгаль орчны нарийвчилсан үнэлгээгээ ирүүлээгүй байсныг БОАЖЯ-ны албан тоотоос харж болдог.

Мөн 2021 оны зургадугаар сард, Баянхонгор аймаг бүх нийтийн хөл хориотой байх үед багийн ИНХ-ыг хуралдуулж, байгаль орчны нарийвчилсан үнэлгээгээ хэлэлцүүлсэн байдаг. Уг нь хуулийн дагуу хурлын товыг 14 хоногийн өмнө зарлан мэдэгддэг ч тэгээгүй, хөл хориотой байсан учир олон төлөөлөл оролцож чадаагүй энэ хурлаар байгаль орчны нарийвчилсан төлөвлөгөөгөө батлуулсан түүхтэй.

Тэгвэл, энэ оны гуравдугаар сарын 6-нд багийн ИНХ-ыг дахин хуралдуулжээ. Үүгээр өмнөх хөл хориотой үеэр хийгдсэн хурлаар гарсан тогтоол болох: Байгаль орчны нарийвчилсан үнэлгээг хүчингүй болгох тогтоолыг баталсан байна. ИНХ-ын төлөөлөгчдийн дийлэнх нь гарын үсэг зурснаар, тэр тогтоолыг үүгээр хүчингүй болгожээ.

Бичлэгт, хурлын дараа тогтоол хүчингүй болсныг зарлаж байна.

Гэтэл багийн ИНХ-ыг даргалж байсан Б.Батжаргал одоо 2022.03.06-ны шинэ тогтоолыг өөртөө аваад өгөхгүй байгаа гэдэг мэдээллийг малчид өгч байна. Эхэндээ тэр “Тогтоолыг шивж, баталж өгнө, асуудалгүй” гэж ярьж байсан ч сүүлдээ шалтаг шалтгаан хэлсээр одоо тогтоолыг хав даржээ. Энэ тогтоол Улаанбаатарт ирж, өчигдрийн алба шаардлагуудын хамт хавсаргагдсан бол “Эрдэнэ монгол”-ын Байгаль орчны нарийвчилсан үнэлгээ хүчингүй болох эрсдэл үүсэх байсан юм.

Малчдын хэлж буйгаар, Б.Батжаргалд “Эрдэнэ монгол” компаниас мөнгө өгсөн гэх. Тэд “Уг нь бидэнтэй эхнээсээ хамт тэмцэж явсан залуу. Гэнэт л тэдний талд орсон байна. Бид мэдэлгүй хурал даргалагчаараа тавьсан нь алдаа боллоо” хэмээн ярьж байна.

"ЭРДЭНЭ МОНГОЛ"-ООС СУМЫН ЗАСАГ ДАРГАД "ТОГТООЛЫГ ХҮЧИНГҮЙ БОЛГО" ГЭЖ АЛБАН БИЧИГ ЯВУУЛЖЭЭ

Дараа нь, гуравдугаар сарын 15-нд "Эрдэнэ монгол" ХХК-иас Шинэжинст сумын Засаг дарга Б.Бат-Эрдэнэд хандан албан бичиг явуулжээ.

Үүндээ "Багийн ИНХ хуралдаж, өмнөх тогтоолыг хүчингүй болгосныг олж мэдлээ" хэмээн дурдаад, холбогдох хууль тогтоомжуудыг зөрчсөн байна гэж бичжээ.

Чингээд төгсгөлд нь "Манай өргөдлийг хүлээн авч, энэ тогтоолыг хүчингүй болгож өгнө үү" гэж хүссэн нь анхаарал татна. Мөн Петер Акерлийн оронд Б.Баярмаа гарын үсгээ зурчихжээ.

ХУДАЛДАГДСАН ГЭХ ӨНЦГҮҮД

Тэдний, эдний талд гэсэн яриа энд гарах болоод удаж байгаа. Өчигдөр л гэхэд “Эрдэнэ монгол” талаас хоёр залуу гэнэт гарч ирээд, малчдын мэдээллийг бужигнуулсан. Нэг нь “Би үзэл бодлоо л хэлэх гэсэн юм. Энэ компани олон ажлын байр бий болгоно. Манайхан буруу ойлгоод байгаа юм. Өөрсдөө ухсан газраа нөхөн сэргээ” гэж ярив. Түүнийг гэнэтхэн яриа өгч эхлэхтэй зэрэгцэн өмнө нэгэн анхаарал татах албан тушаал бүхий эрхэм “Тэр залуу яриа өгье гэж байна” хэмээн зангаж харагдсан.

Залууг Ж.Даваажаргал гэдэг бөгөөд аав ээж нь Шинэжинст, Баян-Өндөр сумын улс аж. “Эрдэнэ монгол”-д ажилд орно гэж ярьдаг хэмээн нутгийн малчид дараа нь тайлбарлалаа.

Ер түүнчлэн иргэдийг “Ажилд зуучилна, төсөл хэрэгжвэл ийм болно” гэх агуулгаар сургалтад хамруулдаг бөгөөд үүнд ирсэн хүмүүст 300 мянган төгрөг өгөөд явуулдаг гэх. Мөртлөө одоо “18 хүний хоёр нь л ажлын байртай болох боломжтой. Үлдсэнд нь жолооч, тогооч, цэвэрлэгч гэх мэт ажил л олдоно” гэж ярьж байгаа талаар тэндхийн иргэн мэдээлж байв.

Мөн оюутнуудад 500 мянган төгрөгийн тэтгэлэг өгдөг, тэр нь “Эрдэнэ монгол”-д талтай ханддаг айлын хүүхдүүдэд очдог гэдгийг өчигдөр ирсэн малчид ярьж байна. Тогтоол өгөхгүй дарсан багийн ИНХ-ын даргалагч Б.Батжаргал, хэвлэлийн хурлын үеэр гэнэт гарч ирсэн Ж.Даваажаргал гээд худалдагдсан гэх өнцгүүд ийн яригдсаар, малчдын энгэр цээжийг доргиож байна.

7.5 ТЭРБУМЫГ “УГААХ” ТББ-Т Б.БАЯРМАА, А.БИЛГҮҮН НАР ХУВЬ ЭЗЭМШИЖ БАЙНА

Орон нутгийн хамтын ажиллагааны гэрээ 2021 оны долдугаар сарын 20-нд зурагдсан байдаг. Гэрээнд хэд хэдэн анхаарал татах агуулга бий нь:

• Дөрвөн жилийн хугацаанд орон нутгийн хөгжилд 7.5 тэрбумын хөрөнгө оруулалт хийнэ. Үүнийгээ ТББ-аар дамжуулан олгоно.
• 2021 онд гурван тэрбумыг хөрөнгө оруулахдаа: Энэ гэрээ батлагдвал 25 хувийг нь, нарийвчилсан үнэлгээ батлагдмагц 25 хувийг нь, барилгын зөвшөөрлүүд бүртгэгдмэгц 25 хувийг нь гэх байдлаа олгоно гэж заасан.

Энэ нь аймгийн удирдлагуудын шууд захиран зарцуулалтад орох мөнгө гэж ойлгогдож байна. Тэр логикоор авлигын шинжтэй байх магадлал бий. Мөн 7.5 тэрбумын хөрөнгө оруулалт нь дамжиж орох ТББ нь “Хонгор нутгийн хөгжил НҮТББ” гэдгийг эх сурвалжууд мэдээллээ.

Тэгвэл, “Хонгор нутгийн хөгжил” НҮТББ-ын улсын бүртгэлийг шүүж үзвэл:

• Анхбаярын Билгүүн
• Багабандийн Баярмаа
• Пагваагийн Эрдэнэбилэг нар хувьцаа эзэмшигчээр,
• Хатанбаатарын Дэмбэрэл Гүйцэтгэх захирлаар бүртгүүлсэн байна.

Энэ ТББ 2021 оны есдүгээр сард, Орон нутгийн хамтын ажиллагааны гэрээ зурагдсаны дараа байгуулагджээ.

Өмнөх нийтлэлийг энд дарж уншина уу.

Энэ мэдээнд өгөх таны үнэлгээ

Хуваалцаарай Жиргээрэй