Перу улсын Антапаккайн зэсийн уурхайд халдлага болж, ажилчдын байр галд өртсөний дараа “Glencore” компани тус уурхайн үйл ажиллагааг зогсоохоор болжээ.
Компани мэдэгдэлдээ, ажилчдын аюулгүй байдалд энэ үйл явдал заналхийлсэн тул эрх баригчдыг эв нэгдэл хийгээд хувийн өмчийг хамгаалсан арга хэмжээ авах ёстой гэсэн байна.
“Glencore”-иос олон нийтэд мэдээлснээр, Антапаккайн уурхай оршдог Эспинар мужийн оршин суугч хэсэг иргэд баасан гарагт уурхайн кэмп дээр ирж, үйл ажиллагаагаа зогсоохыг шаардсанаас гадна Перу улсын Ерөнхийлөгч Дина Болуартег огцрохыг шаардсан албан бичиг хүргүүлэхийг компанид тулгасан байна. Дараа нь хэсэг хүмүүс уурхайн байгууламжууд руу хүч хэрэглэн нэвтэрч, ажилчдын эд зүйлсийг хулгайлж, ажилчдын байрладаг хэсэгт гал тавьжээ.
Нэгдүгээр сарын эхнээс хойш энэ мэтийн халдлагууд гарах нь эрс нэмэгдсэн тул уурхай зэсийн баяжмалын нийлүүлэлтээ зогсоогоод байсан юм. Өнгөрсөн оны сүүлээр тус улсын өмнөх Ерөнхийлөгч Педро Кастиллог баривчилснаас болж Перу даяар эмх замбараагүй байдал үүсээд байна.
“Bloomberg”-ийн тооцоолсноор энэхүү үйл явдал нь бараг дөрвөн тэрбум ам.долларын өртөг бүхий зэсийн нийлүүлэлтийг тасалдуулах эрсдэлтэй гэнэ.
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.