Ц.Сувдмаа: Дээл оёх яг бясалгал шиг, хорт хавдрын дараах өдрүүдийг ч үйлээ урлаад давсан

"Миний амьдар яг л кино шиг. Гэхдээ би даван туулж чадсан. Хөдөлмөрлөөд, мөрөөдлөө биелүүлээд сайхан амьдарч байна" хэмээн инээмсэглэх ярих энэ эмэгтэйг Ц.Сувдмаа гэдэг.

Тэрбээр угалзтай монгол гутлаар алдартай Завхан аймгийн Их-Уул сумын уугуул. 16 настай байхдаа сумын эмнэлэгт асрагчаар ажиллаж, хөдөлмөрийн гараагаа эхлүүлсэн байна. Тэр үедээ өөртөө дээл, гутал хийж өмсөн хүмүүс ур хийцийг нь магтсанаас хойш оёх, урлах үйлэнд дурлах болжээ. "Би ажилдаа дурлаж, жаргаж хийдэг. Хүний хамгийн нандин мөчдөө өмсөх хувцсыг урладаг учраас сайхныг бодож ерөөл хэлж шагладаг даа" гэнэ.

Малчин эзэгтэйн эгэл жирийн амьралаар амьдарч байсан тэрбээр 2011 онд "бамбайн хорт хавдрын гуравдугаар шат" гэх онош сонсжээ. Энэ хүнд мэдээтэй давхцан анхны амьдрал нь бүтэлгүйтсэн байна. Ингээд Хөвсгөл аймгийн Шинэ-Идэр сумаас гурван хүүхдээ дагуулаад хотод ирэв. Түүнд амьдралын хүнд үеүүдийг туулахад зүү утас, оёдлын машин нь хамгийн том хань болсон гэнэ. Тэрбээр "Юм оёх бол маш удаан суудаг, тэвчээр шаардсан ажил. Тиймдээ ч би ажлаасаа олж авсан зан чанараараа амьдралын олон нугачааг давсан гэж боддог" хэмээн хуучилсан юм.

Ц.Сувдмаа 2023 онд Өвөрмонголд очиж ажилласан ч эх орныхоо үнэ цэнийг илүү их мэдэрсэн учраас удалгүй буцаж ирсэн. Тэрбээр 10 гаруй жил тасралтгүй дээл оёсон тул байнгын үйлчлэгчидтэй болж, наадам, хуримын захиалгандаа дарагдан сууна. Охиноо Урлах эрдэм дээд сургуульд орсон тухай "Тэр чинь л миний мөрөөдөл байхгүй юу. Энэ бизнесээ илүү томруулж, охиндоо өвлүүлэх, хамтдаа олон гоё дээл урлахыг хүсэж байна" хэмээн бахархал дүүрэн өгүүлнэ.

Ярилцлагын дэлгэрэнгүйг:

Д.ХАДААН

Өөрийн сэтгэгдлээ илэрхийл

Share Tweet