БНСУ-д хятад охиныг мансууруулаад, хүчирхийлсэн монгол оюутанд таван жилийн ял оноожээ

БНСУ-д хамт суралцаж байсан хятад охиныг мансууруулж улмаар хүчирхийлсэн гэх 22 настай монгол оюутанд шүүхээс таван жилийн хорих ял оноосон талаар тус улсын хэвлэл мэдээллийн хэрэгслүүд мэдээлэв.

Тодруулбал, БНСУ-д сурдаг, 22 настай, монгол оюутан А нь өнгөрсөн гуравдугаар сарын 20-нд хамт суралцаж байсан Хятад охин болох Н-тэй хамт согтууруулах ундаа ууж, улмаар гэртээ аваачжээ. Тэгснийхээ дараа архинд нь хар тамхи хийн мансууруулж байгаад тухайн охиныг хүчирхийлж, биед нь зохисгүй байдлаар халдсан гэнэ. Эл хэргийн шүүх хурал өчигдөр буюу энэ сарын 16-нд болсон.

Сөүл хотын шүүхээс хар тамхины хуулийг зөрчсөн болон бэлгийн хүчирхийлэл үйлдсэн хэмээх үндэслэлээр монгол оюутан А-д таван жилийн хорих ялыг оноожээ.

Энэ тухай хохирогч охин хэлэхдээ, "Би түүнийг хэзээ ч өршөөхгүй. Миний бие одоо ч маш зовиуртай байна. Маш их гомдолтой байна” гэсэн байна.

Сэжигтэн А нь эхэндээ хохирогчийг хүчирхийлснээ хүлээн зөвшөөрөхгүй байсан бөгөөд, хар тамхи хэрэглүүлээгүй хэмээн мэдүүлжээ. Гэвч хохирогчийн биед хийсэн шинжилгээгээр хохирогчийн биеэс хар тамхи илэрсэн аж. Тэрбээр үүнийгээ тайлбарлахдаа “Би хар тамхи уулгаагүй. Харин Монголоос авчирсан навчин тамхи байсан” хэмээн мэдүүлсэн аж. Шүүхэд мэдүүлсэн хамгийн сүүлийн мэдүүлэгтээ,

"Би хийсэн хэрэгтээ маш их гэмшиж байна. Энэ миний амьдралд том сургамж боллоо” хэмээжээ.

Эх сурвалж: https://n.news.naver.com/

Өөрийн сэтгэгдлээ илэрхийл

Share Tweet