Дарья Билодид: Хүрлийн төлөө барилдахыг хүсээгүй ч ээж минь “Миний төлөө аваарай” гэсэн

Украйны жүдоч Дарья Билодид өчигдөр Олимпоос хүрэл медаль хүртсэн юм. Алтан медаль авах гэж Токиод ирсэн түүний хувьд хүрэл медаль хүртсэн нь маш чамлалттай байгаа нь түүний царайнаас, хөдлөлөөс нь харагдаж байв.

Тэгвэл Дарья Билодид өөрийн цахим хуудастаа ийн бичжээ.

Тэрбээр, "Хэнд ч хэлээгүй нууц.
Зургаан настай байхдаа би нэг мөрөөдөлтэй болсон. Тэр мөрөөдөл маань энэ бүх жилүүдэд миний бодолд байж, энэ олон саад бэрхшээл болгоныг даван туулахад тусалсан. Би Олимпоос алтан медаль авна гэж мөрөөдсөөр ирсэн. Надад асар хэцүү байсан ч би их олон зүйлээс татгалзаж, заримдаа өлсөж цанган, маш их бэлтгэл сургуулилт хийсээр ирсэн. Энэ тухайгаа хэнд ч ярьж байгаагүй. Үүнийг зөвхөн миний гэр бүл, ойр тойрныхон маань л мэддэг. Миний ямар хүнд зам туулсныг тэд мэднэ. Энэ бүхэн ганцхан олимпын алтан медалийн төлөө байсан.

Өнөөдөр би Токиогийн олимпоос хүрэл медаль авлаа. Ялагдсаныхаа дараа финалд шалгарсан ч би сэтгэл санаагаар унаж, зүрх эмтэрч, хүрэл медалийн төлөө барилдахыг огтхон ч хүсээгүй, миний гол мөрөөдөл биелээгүй болохоор энэ бүхнээс татгалзахыг хүссэн.

Сэтгэл санаа бүр “тэг” болтлоо унасан. Гэвч намайг өдөөсөн цорын ганц зүйл бол дэвжээ рүү гарахаас өмнө ээжийн минь захисан үг байв. Ээж маань “Энэ медалийг миний төлөө аваарай” гэж хэлсэн. Тэгээд би үүнийг хийж чадлаа. Аавынхаа, ээжийнхээ төлөө. Учир нь, тэд үүнийг хүртэх гавъяатай улс. Энэ медалиа тэдэндээ зориулж байна. Хайртай та бүхэндээ үнэхээр баярлалаа. Намайг бууж өгмөөр санагдах тэр үед цааш алхахад хэрэгтэй үгсийг хэлж ярин үргэлж миний дэргэд байж, намайг дэмжсэн та бүхэндээ баярлалаа.

Одоо энэ медалийн үнэ цэнийг ухаарч байна. Энэ медаль надад яг л алтан медаль шиг санагдаж байна. Яагаад гэвэл, бид олон саад бэрхшээлийг даван туулсан ч эцсийг нь үзэж чадлаа. Хүссэндээ хүрч чадаагүй ч гэлээ би медаль авч, амьдралдаа сайхан түүхийг үлдээж чадлаа.Мөрөөдөл минь байсаар байгаа. Мөрөөдлөө биелүүлэх боломжийг хэн нэгэн булааж авахыг би зөвшөөрөхгүй” гэжээ.

О.АНАР

Өөрийн сэтгэгдлээ илэрхийл

Share Tweet