Агуулгын хураангуй
- Намрын ээлжит чуулганаа нээсэн ч хуралдаж чадсангүй,
- ХЗДХ-ийн сайдаа огцруулсан ч орны томилгоог нь албажуулж чадсангүй,
- Төсвийн тодотголоо өргөн барьсан ч ээлжит бус чуулганаар үр дүнд хүрээгүй, ээлжит чуулганд хэлэлцүүлж чадахгүй долоо хоног өнгөрлөө.
Энэ амралтын өдрүүдэд Н.Учрал МАН-ынхаа хуваагдлын асуудлыг цэгцэлж, учраа олохгүй бол ирэх долоо хоногт ч ирц бүрдэхгүй, удаан үргэлжилвэл Засгийн газрыг унагах АН-ын акц өргөжих шалтгаан болно.
Агуулгын дэлгэрэнгүй
3.5 тэрбумын дуулиан дэгдээсэн ээлжит бус чуулган даваа гарагт хаасан. Угтаа Засгийн газраас өргөн мэдүүлсэн 2026 оны төсвийн тодотголыг хэлэлцэн, батлахаар эхлүүлсэн ч үр дүнд хүрээгүй. Иймд мягмар гарагт буюу |2026.09.15|-нд албан ёсоор нээлтээ хийсэн намрын ээлжит чуулганы хамгийн эхний хэлэлцэн батлах асуудал төсвийн тодотгол болсон.
Энэ долоо хоногт гурван удаа УИХ-ын ээлжит чуулганыг хуралдуулах тов байсан хэдий ч нээлтээ хийснээс өөр гавьяагүй, ирцээ ч бүрдүүлж чадалгүй ирэх долоо хоног руу давуулчихлаа.
Хуульд зааснаар УИХ-ын чуулган хуралдахын тулд нийт гишүүдийн 50-иас дээш хувь буюу хамгийн багадаа 64 гишүүн ирцээ бүртгүүлэх шаардлагатай. Ирц бүрдэхгүй байгаа нь өнгөн талдаа УИХ дахь намын бүлгийн даргын чадваргүйгийнх, нөгөө талд Н.Учрал Засгийн газрынхаа гишүүнийг чөлөөлөх, томилох асуудлаа хэлэлцүүлж чадахгүй байгаа нь нам дотроо хүчгүйдсэнийг нь харуулж байна.
Н.Учралын танхимд 30-ийн талын таван сайд буй. Нэрлэвэл, С.Амарсайхан, Б.Алдаржавхлан, Ч.Номин, Ц.Идэрбат, Ц.Сандаг-Очир.
Тэднээс нэгийг нь сугалчихсан, оронд нь 30-ийн талаас урваж 38-д нэгдсэн Г.Тэмүүлэнг томилж буй нь Л.Оюун-Эрдэнэ, Д.Амарбаясгалан нарын дургүйг хүргэв. Ирцээрээ тэргүүлдэг А.Ариунзаяа гишүүн хүртэл чуулганаа тасалж, 30-ийн талаас нийт 16 гишүүн хуралдаанд суусангүй. Тэдэнд хүч нэмж, Шадар сайд Н.Номтойбаяр Үндэсний эвслийн гурван гишүүний хамт ирцээ бүртгүүлсэнгүй.
30-ийн талын сайд нараас Б.Алдаржавхлан 14.00 цагийн чуулганд аль эрт 11.00 цагт ирцээ бүртгүүлж, огцорсон С.Амарсайхан тасалж, Ц.Идэрбат орон нутгийн томилолтод явж, Ч.Номин, Ц.Сандаг-Очир нар нэг цаг хүртэлх хугацаанд хоцорч орж, ирцээ бүртгүүлжээ.
Хөшигний ард, Н.Учрал 30-ийн талын сайд нараас "шүд сугалсаар" байх нюанс яригдаж байна. Одоогийн байдлаар АТГ-т шалгагдаж байгаа Ч.Номингийн гэрт нэгжлэг хийсэн гэх мэдээлэл байна.
Мөн орон нутгийн томилолттой гэх агуулгаар пүрэв гарагийн чуулгандаа суугаагүй Ц.Идэрбатын эсрэг акц эхлээд байна. Тухайлбал, өчигдөр Хүнс, хөдөө аж ахуй, хөнгөн үйлдвэрийн яамны гадаа 21 аймгаас ирсэн малын эмч нар вакцины санхүүжилтээ авахыг шаардаж буйгаа илэрхийллээ. Гурвалсан гэрээгээ төр биелүүлэхгүй, малын эмч нарын ажлыг үнэлэхгүй, 3 тэрбум гаруй төгрөгөөр хийсэн ажлынх нь хөлсийг өгөөгүй гэх шалтгааны улмаас Ерөнхий сайдад өргөх бичиг өгөхөө мэдэгдэв. Эл үйл явдал зүгээр нэг давхцал биш ээ.
МАН-ын хуваагдал эрх баригч намын алдааг отож суудаг сөрөг хүчинд сайхан боломж вий
МАН-д 30|38-ын тал бий болоод жил гаруйн хугацаа өнгөрлөө. Ийм хуваагдал байхгүй гэж 38-ын тал буюу Ерөнхийлөгч У.Хүрэлсүх, Н.Учрал нарын талын хүмүүс ам нээдэг. Сүүлд МАН-ын генсек ч үүнийг ярьж байв. Харин 30-ийн талынхан бол ийм хуваагдал байгаа талаараа удаа дараа хэлсээр ирсэн. Чуулган эхлэхийн өмнө ч тэд Булганд цуглан, амралтын газарт хоёр хоног амрахдаа "Улс орныхоо талаар ярилцсан" гэх.
Эл хуваагдлаа бушуу засахгүй бол Н.Учралд халгаатай. Түүний Засгийн газар байгуулагдаад таван сар гаруйн хугацаа өнгөрч байна. Анх танхимаа бүрдүүлсэн цагаас нь эхэлж огцруулах талаар ярьсаар байгаа АН-ынхан дуулианд ₮3.5 тэрбумын санхүүжилтийн агуулгыг ярьсаар, Н.Учралыг "итгэл үзүүлэх тогтоолоо УИХ-д оруулж ир" гэх шахалт үзүүлчхээд харзнаж байна.
МАН хагарал бутралын асуудлаа нэг тийш болгохоор 590 гишүүнтэй бага хурлаа хуралдуулахаар болсон гэх мэдээлэл бий. Одоогийн байдлаар өдөр, цаг нь тодорхойгүй. Тус хурлаа эл өдрүүдэд хийж, Н.Учрал 30-ийн талынхантайгаа гар барих хэрэгцээгээ гүйцэлдүүлэхгүй бол МАН-ын дотоод хагарал эрх баригч намын алдааг отож суудаг сөрөг хүчинд сайхан боломж болох вий.
О.ОНОН
АНХААРУУЛГА: Уншигчдын бичсэн сэтгэгдэлд Eguur.mn хариуцлага хүлээхгүй болно. Манай сайт ХХЗХ-ны журмын дагуу зүй зохисгүй зарим үг, хэллэгийг хязгаарласан тул Та сэтгэгдэл бичихдээ бусдын эрх ашгийг хүндэтгэн үзнэ үү.