ХЭРЭГ: 13 настай хүү моринд чирэгдэж нас баржээ

-ХҮҮХДИЙН ЭСРЭГ ГЭМТ ХЭРЭГ ЭЦЭГ, ЭХ АСРАН ХАМГААЛАГЧИЙН ХАЙХРАМЖГҮЙ БАЙДЛААС БОЛДОГ-

Хэнтий аймгийн Өмнөдэлгэр суманд 13 настай хүү моринд чирэгдэн нас барсан харамсалтай хэрэг болжээ. Тодруулбал, тухайн сумын эмнэлэгт энэ сарын 7-ны өдөр бага насны хүүхэд биедээ ил харагдах шархтай нас барсан ирсэний дагуу цагдаагийн байгууллагад мэдээлэл хүргүүлжээ.

Эмнэлгийн тэмдэглэлд дурьдагдсанаар нас барсан хүү моринд чирэгдэж хоёр бугалаганы ар, нүүр хацар орчим зулгаралттай, баруун нүд хөхөрч хавдсан байдалтай нас барсан байжээ.

Харин эх сурвалжийн мэдээллээр талийгаач хүү Улаанбаатар хотын харъяат бөгөөд зуны амралтаараа тус аймагт очсон байсан аж. Харамсалтай хэрэг гарсан өдөр хүү морь унаж хурдан давхиснаар мориноосоо шидэгдэж хүнд бэртэл авч, улмаар эмнэлэг хүргэгдэх замдаа амьсгал хураасан байна.

Уг хэргийг Хэнтий аймаг дахь цагдаагийн газарт Эрүүгийн хэрэг үүсгэн шалгаж эхэлсэн бөгөөд гэрчүүдээс тайлбар мэдүүлэг авч шалгаж байна.

СЭРЭМЖЛҮҮЛЭГ: Сурагчдын амралт эхэлж бага насны хүүхдүүд хөдөө болон хотод эцэг эхийн хараа хяналтгүй байснаас үүдэн олон төрлийн гэмт хэргийн золиос болж амь нас эрүүл мэндээрээ хохирч байна.

Албанаас өгч буй мэдээллээр зуны амралт, баяр наадам эхэлж байгаатай холбогдуулан иргэд бага насны хүүхдээ аялал зугаалгаар авч явахдаа хараа хяналтгүй байлгаснаар гол осолдох, моринд чирэгдэж нас барах, тогонд цохиулан нас барах болон эрүүл мэндээрээ хохирч байгаа харамсалтай мэдээлэл нэмэгдэж байгаа талаар мэдээлж байна.

Иймээс иргэн та болзошгүй аюулаас урьдчилан сэргийлж бага насны хүүхдээ байнгын хараа хяналттай байлгаж, асран хамгаалах хуулиар хүлээсэн үүргээ гүйцэтгэхийг зөвлөж байна. Мөн наадмын өдрүүдэд бага насны хүүхдээ түлэгдэх болон төөрөх, автомашины осол зэрэгт өртүүлэхгүй урьдчилан сэргийлэхийг анхааруулж байна.

Г.ҮҮЛТ

Өөрийн сэтгэгдлээ илэрхийл

Share Tweet